ឥណ្ឌា៖ បាត់ខ្លួនយ៉ាងហោចទាហាន២៣នាក់ ក្នុងគ្រោះទឹកជំនន់នៅតំបន់ហិម៉ាឡៃយ៉ា
មានទាហានឥណ្ឌាយ៉ាងហោចណាស់ ២៣នាក់បានបាត់ខ្លួន នៅក្នុងគ្រោះទឹកជំនន់ដ៏ទាន់ហន់មួយ នៅតំបន់ជ្រលងភ្នំហិម៉ាឡៃយ៉ា ភាគឦសាននៃប្រទេសឥណ្ឌា ដែលជាតំបន់ភ្នំដាច់ស្រយាលជាប់ព្រំដែននឹងនេប៉ាល់។
ចុះផ្សាយនៅថ្ងៃ៖
ស្តាប់ - ០២:២១
ដោយហេតុតែភ្លៀងធ្លាក់ខ្លាំងខុសប្រក្រតី បឹង Lhonak និងស្ទឹង Tista បានឡើងកម្ពស់ទឹក៤ម៉ែត្រកន្លះលើកម្រិតធម្មតា ហើយជន់ជោរបង្កជាទឹកជំនន់យ៉ាងគំហុក និងភ្លាមមួយរំពេច។ នេះបើតាមសេចក្តីថ្លែងការណ៍របស់យោធាឥណ្ឌា ដោយលម្អិតថា ទាហាន២៣នាក់បានបាត់ខ្លួន ហើយរថយន្តរបស់ពួកគេបានលិចអស់ តែអាជ្ញាធរកំពុងបើកប្រតិបត្តិការស្វែងរកហើយ។
បើតាមរូបភាពបង្ហោះដោយអ្នកនាំពាក្យយោធា ទឹកជំនន់ខាប់ពណ៌ដីបានហូរធ្លាក់ដូចទឹកជ្រោះចាក់លើជ្រលងភ្នំ ដែលគ្របដណ្តប់ទៅដោយព្រៃឈើ ហើយហូរកញ្ជ្រោលទៅកាត់ផ្លូវ និងអូសពាំយកបង្គោលភ្លើងទៅជាមួយផង។ ក្នុងវីដេអូផ្សេងទៀត ដែលចែកចាយដោយយោធាដដែល ទឹកបានជន់លិចក្រុង លិចអាគារស្នាក់នៅដល់ជាន់ទីមួយ។
នៅឥណ្ឌាទឹកជំនន់និងការហូរបាក់ដី តែងតែកើតឡើងជាញឹកញាប់ និងបង្កការខូចខាតយ៉ាងខ្លាំង ជាពិសេសនៅរដូវវស្សាម៉ូសុង ពីខែមិថុនាដល់ខែកញ្ញា។ តាមធម្មតា ចូលដល់ខែតុលា ភ្លៀងលែងសូវធំហើយ។ ប៉ុន្តែបើតាមអ្នកជំនាញ ការប្រែប្រួលអាកាសធាតុបានធ្វើឱ្យតំបន់ហិម៉ាឡៃយ៉ា ប្រឈមមុខនឹងការរងគ្រោះមហន្តរាយទឹកជំនន់ កាន់តែញឹកញាប់ និង ក្នុងកម្រិតកាន់តែធ្ងន់ធ្ងរ។
បឹងឡូណាក់ ស្ថិតនៅតំបន់ភ្នំហិម៉ាឡៃយ៉ា ក្បែរជើងកំពូលភ្នំទឹកកក Kangchenjunga ដែលជាកំពូលភ្នំខ្ពស់ជាងគេបំផុតទីបី នៅលើពិភពលោក។ ការឡើងកម្តៅអាកាសធាតុបានធ្វើឱ្យផ្ទាំងទឹកកកលើកំពូលភ្នំហិម៉ាឡៃយ៉ា រលាយយ៉ាងលឿនរហ័សមិនធ្លាប់មានទេ។ នៅចន្លោះឆ្នាំ២០១១ ដល់ឆ្នាំ ២០២០ ភ្នំទឹកកកហិម៉ាឡៃយ៉ា បានរលាយក្នុងកំរិត ៦៥% លឿនជាង កាលពីមួយទសវត្សរ៍មុន។ នេះបើតាមរបាយការណ៍ របស់មជ្ឈមណ្ឌលអន្តរជាតិដើម្បីការអភិវឌ្ឍតំបន់ភ្នំ ចេញផ្សាយកាលពីខែមិថុនាឆ្នាំ២០២៣ ដោយព្យាករថា យោងតាមកំរិតនៃការបញ្ចេញឧស្ម័នកាបូនិកសព្វថ្ងៃ ផ្ទាំងទឹកកកនឹងរលាយបាត់អស់៨០%នៃទំហំបច្ចុប្បន្ន នៅដំណាច់សតវត្សរ៍នេះ។ ការរលាយផ្ទាំងទឹកកកលើកំពូលភ្នំ នឹងបង្កើនបរិមាណខ្សែទឹក បូកផ្សំនឹងសំណង់ខុសក្បួនខ្នាតទៀត ការខូតខាតដោយគ្រោះទឹកជំនន់រឹតតែធ្ងន់ធ្ងរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ