អូស្ត្រាលីបោះបង់ចោលឧទ្ធម្ភាគចក្រយោធាTaipan នៅក្រោយគ្រោះថ្នាក់សម្លាប់ទាហាន៤រូប
រដ្ឋមន្រ្តីក្រសួងការពារជាតិអូស្ត្រាលីប្រកាសបញ្ឈប់មុនកាលកំណត់ នូវការហោះហើររបស់ឧទ្ធម្គាគចក្រយោធាប្រភេទប្រភេទTaipan MRH-90 បន្ទាប់ពីមានគ្រោះថ្នាក់ធ្លាក់ឧទ្ធម្ភាគចក្រកាលពីខែកក្កដា ដែលបានសម្លាប់ទាហានអូស្ត្រាលី៤នាក់។ តាមប្រមុខការពារជាតិអូស្ត្រាលីការសម្រេចចិត្តបោះបង់ចោលឧទ្ធម្ភាចក្រប្រភេទ Taipan ជាការសម្រេចចិត្តដាច់ដោយឡែក គ្មានជាប់ពាក់ព័ន្ធនឹងការដំណើរការស៊ើបអង្កេតលើគ្រោះថ្នាក់ធ្លាក់ឧទ្ធម្ភាគចក្រដែលត្រូវការពេលវេលាយ៉ាងតិច១ឆ្នាំ។
ចុះផ្សាយនៅថ្ងៃ៖
ស្តាប់ - ០៣:០៦
កងទ័ពអូស្ត្រាលីមានគម្រោងបោះបង់ចោល ឈប់ប្រើឧទ្ធម្គាចក្រប្រភេទTaipan MRH-90 នៅខែធ្នូចុងឆ្នាំ ២០២៤។ ប៉ុន្តែ តាមការប្រកាសរបស់រដ្ឋមន្រ្តីការពារជាតិអូស្ត្រាលី លោក Richard Marles នៅថ្ងៃសុក្រនេះ ឧទ្ធម្ភាគចក្រប្រភេទTaipan MRH-90 នឹងត្រូវដកលែងឲ្យប្រើប្រាស់មុនកាលកំណត់ នៅបន្ទាប់ពីមានគ្រោះថ្នាក់ធ្លាក់ឧទ្ធម្ភាគចក្រយោធាប្រភេទនេះ កាលពីខែកក្កដា ដែលបានសម្លាប់ទាហានអូស្ត្រាលី៤នាក់។ តាមប្រមុខការពារជាតិអូស្ត្រាលី អូស្ត្រាលីនឹងទិញឧទ្ធម្គាគចក្រអាមេរិកប្រភេទBlack Hawk មកជំនួស ឧទ្ធម្ភាគចក្រចាស់ Taipan។
ចាប់តាំងពីកើតមានគ្រោះថ្នាក់ធ្លាក់ឧទ្ធម្ភាគចក្រ ដែលគេមិនទាន់ដឹងពីមូលហេតុ កងពលទ័ពអាកាសអូស្ត្រាលីដែលមានឧទ្ធម្ភាគចក្រTaipan MRH-90 ចំនួន៤៧គ្រឿង បានផ្អាកកម្មភាពទាំងស្រុង នៅក្នុងអំឡុងពេលរង់ចាំការស៊ើបអង្កេត។ ប៉ុន្តែ តាមរដ្ឋមន្រ្តីការពារជាតិអូស្ត្រាលី មានការស៊ើបអង្កេតចំនួន៤ ទៅលើគ្រោះថ្នាក់ធ្លាក់ឧទ្ធម្ភាគចក្រTaipan MRH-90 ដែលនៅក្នុងនោះ ការស៊ើបអង្កេតមួយត្រូវការពេលវេលាយ៉ាងតិច១ឆ្នាំ។
ឧទ្ធម្ភាគចក្រ ប្រភេទTaipan MRH-90 ផលិតដោយក្រុមហ៊ុនអឺរ៉ុបធ្លាក់ចូលទៅក្នុងមហាសមុទ្រក្បែរដ្ឋQueenland នៅក្នុងអំឡុងពេលហាត់សម មុននឹងត្រូវចូលរួមក្នុងសមយុទ្ធ Talisman Sabre ដែលជាសមយុទ្ធទ្រង់ទ្រាយធំជាមួយកងទ័ពសម្ព័ន្ធមិត្តអាមេរិក ជប៉ុន បារាំង អាល្លឺម៉ង់ និងកូរ៉េខាងត្បូង។ គ្រោះធ្លាក់ឧទ្ធម្ភាគចក្រយោធារបស់អូស្ត្រាលីបានទៅ ផ្អាកព្យួរសមយុទ្ធដែលគេគ្រោងរៀបចំ នៅខែសីហា។
មន្រ្តីយោធាអូស្ត្រាលីធ្លាប់ទាមទារជាច្រើនលើកឲ្យបញ្ឈប់ការហោះហើរឧទ្ធម្ភាគចក្រTaipanដោយសារតែបញ្ហាជួសជុលនិងការប្តូរគ្រឿងបន្លាស់។ នៅដើមឆ្នាំនេះ កងពលទ័ពអាកាសឧទ្ធម្ភាគចក្រត្រូវសំចតយានយន្តរបស់ខ្លួនចោលរយៈពេលមួយខែ ក្រោយពីឧទ្ធម្ភាគចក្រមួយគ្រឿងខូចម៉ាស៊ីន។
នៅថ្ងៃសុក្រ រដ្ឋមន្រ្តីការពារជាតិអូស្ត្រាលី លោក Richard Marles ទទួលស្គាល់ការខ្វះខាតនៅក្នុងប្រតិបត្តិការទ័ពអាកាស ដោយគ្មានឧទ្ធម្ភាចក្រប្រភេទTaipan។ ប៉ុន្តែ បើតាមលោក Richard Marles អូស្ត្រាលីនឹងបង្កើនល្បឿនក្នុងការចរចាដើម្បីឲ្យធ្វើយ៉ាងណាឲ្យកងពលទ័ពអាកាសអូស្ត្រាលីទទួល និងប្រើប្រាស់ឧទ្ធម្ភាគចក្រអាមេរិកក្នុងពេលឆាប់ៗខាងមុខ។
នៅខែមករាដើមឆ្នាំនេះ អូស្ត្រាលីធ្លាប់ប្រកាសគម្រោងចង់ទិញឧទ្ធម្ភាគចក្រយោធា ប្រភេទBlack Hawksចំនួន៤០គ្រឿងផលិតដោយក្រុមហ៊ុនអាមេរិក Lockheed Martin ក្នុងតម្លៃ១៨០០លានដុល្លារ។ ប៉ុន្តែ សព្វថ្ងៃនេះ អូស្ត្រាលីបានទទួលឧទ្ធម្ភាគចក្រអាមេរិកតែ៣គ្រឿងប៉ុណ្ណោះ ដែលចាប់ហោះសាកល្បងនៅខែកញ្ញានេះ។ ដើម្បីប៉ះប៉ូវការខូចខាតដោយសារគ្មានឧទ្ធម្គាគចក្រប្រើប្រាស់គ្រប់គ្រាន់ រដ្ឋមន្រ្តីការពារជាតិលោក Richard Marles អះអាងថា អូស្ត្រាលីនឹងបញ្ជូនទាហានរបស់ខ្លួនឲ្យទៅចូលរួមហាត់សមប្រើប្រាស់ឧទ្ធម្ភាគចក្រជាមួយប្រទេសសម្ព័ន្ធមិត្តដូចជាអាមេរិកជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ