នាយករដ្ឋមន្រ្តីជប៉ុនទៅហ៊្វូគូស្ហ៊ីម៉ា នៅមុនប្រកាសថ្ងៃបង្ហូរទឹកចេញពីរោងចក្រនុយក្លេអ៊ែរ
ប្រមុខរដ្ឋាភិបាលជប៉ុន លោកហ្វូមីអូ គីស៊ីដា បានធ្វើទស្សនកិច្ច រយៈពេលខ្លីនៅមជ្ឈមណ្ឌលនុយក្លេអ៊ែរហ៊្វូគូស្ហ៊ីម៉ា នៅថ្ងៃអាទិត្យទី២០សីហា មួយថ្ងៃក្រោយវិលត្រលប់ពីជំនួបកំពូលជាមួយប្រធានាធិបតីអាមេរិក និងប្រធានាធិបតីកូរ៉េខាងត្បូង នៅ Camp David សហរដ្ឋអាមេរិក។ នាយករដ្ឋមន្រ្តីជប៉ុនធ្វើដំណើរទៅកាន់រោងចក្រនុយក្លេអ៊ែរ នៅមុនប្រកាសថ្ងៃដែលត្រូវបង្ហូរទឹកកាកសំណល់ចេញពីរោងចក្រនុយក្លេអ៊ែរហ៊្វូគូស៊្ហីម៉ា ទៅក្នុងទឹកសមុទ្រ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:២១
នៅក្នុងដំណើរទស្សនកិច្ចរយៈពេលខ្លី កាលពីថ្ងៃអាទិត្យទី ២០សីហា នៅរោងចក្រនុយក្លេអ៊ែរហ៊្វូគីស្ហ៊ីម៉ាដែលខូចខាតដោយសាររលកយក្សស៊ូណាម៉ី និងគ្រោះរញ្ជួយដីកាលពីឆ្នាំ ២០១១ នាយករដ្ឋមន្រ្តីជប៉ុន លោកហ្វូមីអូ គីស៊ីដាបានចូលទៅមើលទីតាំងបន្សុទ្ធទឹកកាកសំណល់ចេញពីរោងចក្រនុយក្លេអ៊ែរដែលរដ្ឋាភិបាលរបស់លោកគ្រោងនឹងបង្ហូរចូលទៅក្នុងទឹកសមុទ្រ នៅក្នុងពេលឆាប់ៗខាងមុខ។
រដ្ឋាភិបាលរបស់លោកគីស៊ីដាមានគម្រោងបង្ហូរទឹកចេញពីរោងចក្រនុយក្លេអ៊ែរហ៊្វូគូស្ហ៊ីម៉ា ដែលបន្សុត លែងមានសារធាតុវិទ្យុសកម្ម ប្រមាណ ១លាន៣សែនតោនចូលទៅក្នុងមហាសមុទ្រប៉ាស៊ីហ្វិក ប៉ុន្តែ នៅមិនទាន់កំណត់ថ្ងៃច្បាស់លាស់ ដោយសារមានបាតុកម្មជំទាស់តវ៉ាពីសហគមន៍អ្នកនេសាទជប៉ុន និងប្រទេសជិតខាង ដូចជាចិន និងកូរ៉េខាងត្បូង។
នៅក្រោយធ្វើទស្សនកិច្ចនៅរោងចក្រនុយក្លេអ៊ែរហ៊្វូគូស្ហ៊ីម៉ា នៅថ្ងៃអាទិត្យ លោកនាយករដ្ឋមន្រ្តីជប៉ុន ហ្វូមីអូ គីស៊ីដា បាននិយាយប្រាប់អ្នកកាសែតថា រដ្ឋាភិបាលរបស់លោកនៅមិនទាន់បានកំណត់ថ្ងៃដែលត្រូវបង្ហូរទឹកកាកសំណល់ចេញពីមជ្ឈមណ្ឌលនុយក្លេអ៊ែរទៅក្នុងទឹកសមុទ្រនៅឡើយទេ។ តាមលោកគីស៊ីដា លោកគ្រោងនឹងជួបប្រធានសមាគមអ្នកនេសាទជប៉ុន នៅថ្ងៃចន្ទ នៅមុនពេលលោកបើកកិច្ចប្រជុំគណៈរដ្ឋមន្រ្តីនៅសប្តាហ៍ក្រោយដើម្បីសម្រេចថ្ងៃដែលត្រូវបង្ហូរទឹកចេញពីរោងចក្រនុយក្លេអ៊ែរទៅក្នុងទឹកសមុទ្រ។ កាសែតក្នុងស្រុកជប៉ុនធ្លាប់ចុះផ្សាយថា ប្រតិបត្តិការបញ្ចេញទឹកកាកកសំណល់ពីរោងចក្រនុយក្លេអ៊ែរទៅក្នុងទឹកសមុទ្រនឹងអាចចាប់ផ្តើមនៅចុងខែសីហា។
ទឹកកាកសំណល់ចេញពីរោងចក្រនុយក្លេអ៊ែរដែលក្រុមហ៊ុនជប៉ុនតិបកូត្រូវបន្សុទ្ធមុននឹងបង្ហូរទៅក្នុងទឹកសមុទ្រ ជាទឹកភ្លៀងនិង ទឹកក្រោមដីនៅទីតាំងមជ្ឈមណ្ឌល រួមទាំងទឹកដែលគេប្រើសម្រាប់ធ្វើឲ្យត្រជាក់ម៉ាស៊ីនប្រតិករ។ តាមក្រុមហ៊ុនតិបកូ គេចាំបាច់ត្រូវបង្ហូរទឹកកាកសំណល់ចេញពីរោងចក្រនុយក្លេអ៊ែរ ដើម្បីយកកន្លែងសម្រាប់ការងាររុះរើរោងចក្រនុយក្លេអ៊ែរដែលមួយភាគត្រូវឆេះខូចបំផ្លាញដោយគ្រោះរញ្ជួយដី និងអាចគ្រោះថ្នាក់លេចធ្លាយសារធាតុវិទ្យសកម្ម។ មួយវិញទៀត គេត្រូវការកន្លែងសម្រាប់ដាក់ធុងស្តុកទឹកកាកសំណល់ជាច្រើនទៀតដែលនៅមានសារធាតុវិទ្យុសកម្មដែលគេត្រូវបន្សុទ្ធ។
ទីភ្នាក់ងារថាមពលនុយក្លេអ៊ែរអន្តរជាតិ AIEAធ្លាប់បើកភ្លើងខៀវ យល់ព្រមតាមគម្រោងស្នើឡើងដោយរដ្ឋាភិបាលជប៉ុន ដែលចង់បង្ហូរទឹកកាកសំណល់ចេញពីមជ្ឈមណ្ឌលនុយក្លេអ៊ែរហ៊្វូគូស្ហ៊ីម៉ាចូលទៅក្នុងសមុទ្រ។ នៅក្នុងរបាយការណ៍របស់ខ្លួនកាលពីខែកក្កដា ទីភ្នាក់ងារAIEAនិយាយថា បើសិនគេបង្ហូរបន្តិចម្តងៗ និងមានការគ្រប់គ្រងល្អ នោះទឹកចេញពីមជ្ឈមណ្ឌលនុយក្លេអ៊ែរហ៊្វូគូស្ហ៊ីម៉ាដែលបានច្រោះបន្សុទ្ធរួចហើយដែលគេបង្ហូរទៅក្នុងសមុទ្រ នឹងមានផលប៉ះពាល់តិចតួចដល់បរិស្ថាន និងសុខភាពមនុស្ស។
យ៉ាងណាក៏ដោយ គម្រោងរបស់ជប៉ុនចង់បង្ហូរទឹកចេញពីមជ្ឈមណ្ឌលនុយក្លេអ៊ែរហ៊្វូគូស្ហ៊ីម៉ាទៅក្នុងសមុទ្របានបង្កឲ្យមានភាពចម្រូងចម្រាសខ្លាំងជាមួយចិន និងកូរ៉េខាងត្បូង រួមទាំងសហគមន៍អ្នកនេសាទជប៉ុននៅហ៊្វូគូស្ហ៊ីម៉ា។ ក្រៅពីបារម្ភពីផលប៉ះពាល់ដល់ការបំពុលទឹក និងជីវិតសត្វសមុទ្រដោយវិទ្យុសកម្ម ប្រជាជនជប៉ុននៅហ៊្វូគូស្ហ៊ីម៉ាបារម្ភខ្លាចថា ការបង្ហូរទឹកចេញពីរោងចក្រនុយក្លេអ៊ែរអាចប៉ះពាល់ដល់កេរ្តិ៍ឈ្មោះ មុខរបរអាជីវកម្មលក់គ្រឿងសមុទ្រដែលពួកគេទើបស្តារឡើងវិញបានបន្តិច នៅក្រោយជួបវិបត្តិជិត១០ឆ្នាំដោយសារគ្រោះមហន្តរាយនៅហ៊្វូគូស្ហ៊ីម៉ា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ