ចិនជួបគ្រោះផ្ទុះរោងចក្រឧស្សាហកម្មថ្មីមួយទៀត
ព័ត៌មានស្តីពីគ្រោះថ្នាក់ផ្ទុះ ឆេះរោងចក្រ តែងកើតឡើងជាញឹកញយ នៅក្នុងប្រទេសចិន។ នៅថ្ងៃសៅរ៍ទី ១កក្កដា២០២៣នេះ រោងចក្រប្រេងគីមី Qiantai New Material បានផ្ទុះឆេះឡើង លាន់ស្នូរស្ទើរកកើកដី។ ទិដ្ឋភាពនៃគ្រោះថ្នាក់ ដ៏សន្ធោរសន្ធៅ ត្រូវបានផ្សព្វផ្សាយយ៉ាងលឿនរហ័សតាមបណ្តាញសង្គម Weibo។
ចុះផ្សាយនៅថ្ងៃ៖
ស្តាប់ - ០១:៥៧
អណ្តាតភ្លើងក្រហមឆ្អៅ អមដោយផ្សែងខ្មៅខ្មួរខ្មាញ់ អណ្តែតពេញផ្ទៃមេឃ ផ្ទុះចេញពីរោងចក្រប្រេងគីមី នៅវេលាម៉ោងជិត១២ថ្ងៃត្រង់... នៅក្នុងវីដេអូ បង្ហោះក្នុងបណ្តាញសង្គម គេឮសំឡេងក្រុមពន្លត់អគ្គិភ័យស្រែកបណ្តេញមនុស្សមិនឱ្យចូលជិតកន្លែងកើតហេតុ។
បើតាមទូរទស្សន៍ជាតិប្រចាំតំបន់ភាគកណ្តាលនៃប្រទេស មានប្រជាពលរដ្ឋរស់នៅជិតរោងចក្រប្រេងគីមី ជាច្រើនត្រូវបានជម្លៀសចេញ។ របាយការណ៍ក្រៅផ្លូវការរសាត់ក្នុងបណ្តាញសង្គមបានអះអាងថារោងចក្របានផ្ទុះក្រោយពីមានភ្លើងឆេះឃ្លាំងស្តុកប្រេងស៊ីលីកូន។ តែការអង្កេតកំពុងចាប់ផ្តើមប៉ុណ្ណោះ។ ហើយអាជ្ញាធរកំពុងសាកល្បងវាយតម្លៃការខូចខាត។
នេះមិនមែនជាលើកទីមួយទេ ដែលរោងចក្រឧស្សាហកម្មចិន រងគ្រោះថ្នាក់បែបនេះ។ កាលពីឆ្នាំទៅ អគ្គិភ័យបានឆាបឆេះរោងចក្រមួយនៅខេត្តហេណាន សម្លាប់មនុស្សអស់៣៨នាក់។ នៅឆ្នាំ២០២០ មានផ្ទុះរោងចក្រមួយក្នុងខេត្តហ៊ូបី ស្លាប់និងរបួសមនុស្ស៥នាក់។ ការរញ្ជួយដីដ៏តូចមួយកាលពីឆ្នាំ២០១៩ បានហែកដីឱ្យក្រហូង១២០ម៉ែត្រ ស្រូបនិងបំផ្ទុះរោងចក្រគីមីមួយ នៅក្រុងយ៉ានឆេង ខេត្តជៀនស៊ូ ដោយយកឆក់យកជីវិតមនុស្ស៧៨នាក់ទៅជាមួយផង។ ក្នុងឆ្នាំ២០១៩នោះដដែល មនុស្ស១៩នាក់បានស្លាប់ក្នុងគ្រោះផ្ទុះរោងចក្រនៅខេត្តស៊ីឈន់ ប៉ែកខាងលិចប្រទេសម្តង។ មុននោះទៅទៀត រថយន្តកាមីញ៉ុងដឹកផលិតផលគីមី មួយបានផ្ទុះនៅជិតក្រុងប៉េកាំង សម្លាប់មនុស្ស២២នាក់។
មហន្តរាយឧស្សាហកម្មដ៏ចម្បងដែលគេចងចាំខ្លាំងជាងគេ គឺការផ្ទុះឃ្លាំងផ្ទុកសារធាតុគីមី ៣០០០តោន នៅក្នុងក្រុងកំពង់ផែ ទៀនជីន នៅរដូវក្តៅឆ្នាំ២០១៥ ដែលកាលណោះ គ្រោះថ្នាក់បានផ្តាច់ជីវិតអស់១៦៥នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ