ក្រុមប្រឹក្សាសន្តិសុខអ.ស.ប. ថ្កោលទោសតាលីបង់ ដែលបំបិទសិទ្ធិសេរីភាពស្ត្រីអាហ្វហ្កានីស្ថាន
ថ្ងៃព្រហស្បតិ៍ ទី២៧ ខែមេសា ក្រុមប្រឹក្សាសន្តិសុខអង្គការសហប្រជាជាតិ បានមូលមតិគ្នាជាឯកច្ឆ័ន្ទ ថ្កោលទោស រដ្ឋាភិបាលអាហ្វហ្កានីស្ថាន កាន់កាប់ដោយពួកតាលីបង់ ដែលរំលោភបំពាននិងបំបិទសិទ្ធិសេរីភាពស្ត្រី។ សេចក្តីសម្រេចរបស់ក្រុមប្រឹក្សាសន្តិសុខ ដែលទទួលការគាំទ្រពីប្រទេសប្រមាណ៩០ផ្សេងទៀតផង បានអំពាវនាវឲ្យរដ្ឋាភិបាលតាលីបង់ ដកចោលវិធានការនានាដែលរឹតត្បិតសិទ្ធិសេរីភាពនារី តួយ៉ាង ការហាមមិនឲ្យស្រីធ្វើការនៅអង្គការអន្តរជាតិ និងហាមឃាត់មិនឲ្យនារីរៀនសូត្របានខ្ពង់ខ្ពស់ ជាដើម។
ចុះផ្សាយនៅថ្ងៃ៖
ស្តាប់ - ០២:៣៤
«ពិភពលោក មិនអាចស្ងាត់ស្ងៀម ក្រពាត់ដៃ ឈរមើល នារីអាហ្វហ្កានីស្ថាន ត្រូវលុបចោលចេញពីសង្គម នោះទេ។» នេះជាប្រសាសន៍របស់ ឯកអគ្គរដ្ឋទូតអេម៊ីរ៉ាត់អារ៉ាប់រួម អ្នកស្រី Lana Zaki Nusseibeh ដែលបានចូលរួមសរសេរសេចក្តីអំពាវនាវ ជាមួយអ្នកតំណាងប្រទេសជប៉ុន។
ក្នុងសេចក្តីអំពាវនាវរួម ក្រុមប្រឹក្សាសន្តិសុខអង្គការសហប្រជាជាតិ ប្រកាសឲ្យ ពួករដ្ឋអំណាចតាលីបង់ ត្រឡប់មកពិចារណាពីគោលនយោបាយរបស់ខ្លួន និងដកចោលវិធានការទាំងឡាយ ដែលកំពុងតែអនុវត្ត ប្រឆាំងនឹងសិទ្ធិនារីនិងក្មេងស្រី។ សិទ្ធិជាមូលដ្ឋានរបស់ស្ត្រីនិងក្មេងស្រី ដែលអង្គការសហប្រជាជាតិ គូសបង្ហាញប្រាប់ទៅ ពួកតាលីបង់ គឺ ការទទួលបានការសិក្សាអប់រំ សិទ្ធិធ្វើការងារប្រកបរបបវិជ្ជាជីវៈ សិទ្ធិដើរហើរចរាចរណ៍ និង សិទ្ធិចូលរួមសកម្មភាពជីវភាពសង្គម ហើយព្រមទាំងសិទ្ធិចូលរួមជីវភាពនយោបាយ។
ជិត២ឆ្នាំហើយ ដែល ពួកតាលីបង់ឡើងកាន់កាប់អំណាចនៅអាហ្វហ្កានីស្ថាន។ រយៈពេលនេះ ពួកតាលីបង់ដែលកាន់សាសនាអ៊ីស្លាមដ៏តឹងតែង បានរឹតបន្តឹងសិទ្ធិនារីភេទ បញ្ជាឲ្យទទូលស្បៃបិទមុខ ហាមឃាត់មិនឲ្យស្ត្រីរៀនសូត្របានខ្ពស់ ហើយខែធ្នូឆ្នាំទៅមិញ រដ្ឋអំណាចតាលីបង់ ក៏ថែមទាំងបានហាមប្រាមមិនឲ្យនារី ធ្វើការនៅអង្គការសង្គមស៊ីវិលអន្តរជាតិ។ ចំណុចនេះ ក៏ប៉ះពាល់ដល់ស្ត្រីដែលបំពេញការងារឲ្យ អង្គការសហប្រជាជាតិ ដែរ។ ចំណាត់ការជាបន្តបន្ទាប់របស់ រដ្ឋអំណាចតាលីបង់ ត្រូវ អង្គការសហប្រជាជាតិ ថ្កោលទោសថាជា«រំលោភបំពានសិទ្ធិមនុស្ស និង គោលការណ៍មនុស្សធម៌»។
អង្គការសហប្រជាជាតិ ក៏ស្នើឲ្យប្រទេសផ្សេងៗដែលមានឥទ្ធិពលលើពួកតាលីបង់ ឲ្យដាក់សម្ពាធលើ របបតាលីបង់នេះ ឲ្យដើរត្រង់ផ្លូវ។ អគ្គលេខាធិការអង្គការសហប្រជាជាតិ អង់តូនីញ៉ូ ហ្គូទែរស៍ គ្រោងនឹងរៀបចំកិច្ចប្រជុំមួយ នៅទីក្រុងដូហា ថ្ងៃទី១ទី២ឧសភា ដើមសប្តាហ៍ថ្មី ដើម្បីរកដោះស្រាយអន្តរជាតិរួមមួយ ពីស្ថានភាពដ៏លំបាកនៅអាហ្វហ្កានីស្ថាន។
ចំណែក អ្នកតំណាងប្រទេសរុស្ស៊ី បើទោះបីជាបានបោះឆ្នោតគាំទ្រសេចក្តីសម្រេចថ្កោលទោសរដ្ឋអំណាចតាលីបង់ ប៉ុន្តែ ឯកអគ្គរដ្ឋទូតរុស្ស៊ី លោក Vassili Nebenzia រិះគន់សហរដ្ឋអាមេរិកថា គួរតែដកទណ្ឌកម្ម ហើយអនុញ្ញាតឲ្យ ពួកតាលីបង់ ប្រើប្រាស់លុយ ដែលធានាការកណ្តាលអាមេរិក បានបង្កក ប្រមាណ ៧ ពាន់លានដុល្លារនោះ ទៅឲ្យរដ្ឋាភិបាលអាហ្វហ្កានីស្ថាន បានប្រើប្រាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ