កំពូលមហាសេដ្ឋីរបស់ឥណ្ឌា Adani កំពុងជួបរឿងអាស្រូវ បង់ខាតយ៉ាងមហាសាល
សហគ្រាសAdani ប្រជុំក្រុមហ៊ុនដ៏ធំជាងគេរបស់ឥណ្ឌា ដែលរកស៊ីឡើងមានបានដល់កំពូល ក្នុងជំនួញវត្ថុធាតុដើមនិងកំពង់ផែ កំពុងរងព្យុះខ្មៅងងឹតបោងបក់ ធ្លាក់ដាំក្បាលខាតអស់ជាង ១០០ពាន់លានដុល្លារក្នុងរយៈពេលតែមួយសប្តាហ៍។ ភាគហ៊ុនរបស់អាដានី បានធ្លាក់ថ្លៃចំនួន៥ថ្ងៃជាប់គ្នាមកហើយ។ បន្ទាប់ពីខាតបង់អស់ជិត៣០% នៅក្នុងទីផ្សារមូលប័ត្រប៊ុមបេ កាលពីថ្ងៃពុធ និង-២៦,៥០%ទៀតនៅថ្ងៃព្រហស្បតិ៍ទី ២កុម្ភៈនេះ។
ចុះផ្សាយនៅថ្ងៃ៖
ស្តាប់ - ០១:៥៣
តាំងពីសប្តាហ៍មុនមក សហគ្រាសក្រុមហ៊ុនអាដានី របស់កំពូលមហាសេដ្ឋីឥណ្ឌា ឈ្មោះ Gautam Adani បានខាតប្រាក់អស់១០៤ពាន់លានដុល្លារ និងបង់ខាតទ្រព្យផ្ទាល់ខ្លួនអស់ជាង៤០ពាន់លានដុល្លារទៀត។ នេះបើតាមចំណាត់ថ្នាក់ Forbes ដែលបានដកលោកចេញពីចង្កោម១០នាក់ដំបូងនៃមហាសេដ្ឋីមានទ្រព្យច្រើនជាងគេបំផុតនៅលើពិភពលោក។
ជាការបាត់បង់ដ៏ច្រើននិងលឿនរហ័សជ្រុល ប៉ុន្តែមិនថ្វីទេ ព្រោះកាលពីលោកឡើងមានក៏លឿនដូចព្រួញដែរ។ ៥ឆ្នាំចុងក្រោយនេះ ភាគហ៊ុនរបស់ក្រុមហ៊ុនលោកបានហក់ឡើងជាង១០០០% ហើយថ្ងៃនេះមហាសេដ្ឋីលេខមួយឥណ្ឌា (ចំណាត់ថ្នាក់ឆ្នាំ២០២១) នៅសល់ប្រាក់៧៥ពាន់លានដុល្លារទៀត។
ជាលទ្ធផល នៅថ្ងៃព្រហស្បតិ៍ ភាគហ៊ុនរបស់ក្រុមហ៊ុនចំនួន៥ទៀតនៃសហគ្រាសក្រុមហ៊ុនអាដានី ក៏ធ្លាក់ចុះស្ររតាមដែរ (១០%សម្រាប់សាខា Adani Green Energy, Adani Ports, Adani Total Gas និងAdani Transmission ព្រមទាំងAdani Wilmarអស់៥%)ហើយត្រូវផ្អាកសកម្មភាពលើទីផ្សារភាគហ៊ុនឥណ្ឌាជាស្វ័យប្រវត្តិ។ បើតាមភ្នាក់ងារ Bloomberg ភាគហ៊ុនរបស់សហគ្រាសក្រុមហ៊ុនអាដានីដាំក្បាលចុះខ្លាំងបន្ថែមទៀត បណ្តាលមកពីមានព័ត៌មានថាបណ្តាញធនាគារស្វីស ដែលសុំមិនបញ្ចេញយោបល់ លែងឱ្យអាដានីជំពាក់។ ហើយក្រុមធនាគារនៅអាមេរិកផ្សេងទៀតក៏ធ្វើតាមស្វីសដែរ។
ដើមហេតុដែលនាំឱ្យពិភពអាដានី រង្គោះរង្គើដល់ថ្នាក់នេះ គឺរបាយការណ៍របស់ Hindenburg Research ក្រុមហ៊ុនវិនិយោគដ៏តូចមួយរបស់អាមេរិក។ កាលពីសប្តាហ៍មុន ក្រុមហ៊ុនអាមេរិកបានចោទសហគ្រាសអាដានីឥណ្ឌា ថាមានលួចបន្លំគណនីតាំងពីជាច្រើនទសវត្សរ៍មកហើយ។ អាដានីបានឆ្លើយបកទៅវិញចំនួន ៤១៣ទំព័រ ដើម្បីការពារខ្លួន ដោយយល់ថាមានការវាយប្រហារដោយចេតនានិងដោយគ្មានហេតុផល។ អាដានីគ្រោងនឹងប្តឹង Hindenburg Research នៅតុលាការ តែ Hindenburg ទាយថាភាគហ៊ុនសហគ្រាសក្រុមហ៊ុនអាដានីនឹងធ្លាក់ថ្លៃ។ សម្រាប់ពេលនេះអាដានីបង់ខាតមែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ