ចិន ៖ រលំអាគារស្នាក់នៅ មនុស្សរាប់សិបនាក់ជាប់កុននិងបាត់ខ្លួន
យ៉ាងហោច ២៣នាក់កំពុងជាប់កុនក្នុងគំនរថ្ម និងយ៉ាងហោច៣៩នាក់ផ្សេងទៀតទាក់ទងមិនបាន ឬបាត់ខ្លួន នៅក្នុងគ្រោះថ្នាក់ បាក់រំលំអាគារមួយ ដែល៨ជាន់ នៅភាគកណ្តាលនៃប្រទេសចិន។ គិតមកទល់រសៀលថ្ងៃសៅរ៍ទី ៣០មេសា គេនៅមិនទាន់ដឹងអំពីមូលហេតុនៃគ្រោះថ្នាក់នៅឡើយទេ និងក៏ពុំមានសេចក្តីប្រកាសជូនដំណឹងអំពីចំនួនអ្នកស្លាប់ដែរ។
ចុះផ្សាយនៅថ្ងៃ៖
ស្តាប់ - ០២:០៧
ជាអាគារ៨ជាន់ មានរោងកុន និងមានមួយផ្នែកជាសណ្ឋាគារ ហើយមួយផ្នែកទៀតជាផ្ទះស្នាក់នៅ បានរលំ ដោយគ្មានមូលហេតុ។ ពេញមួយយប់ថ្ងៃសុក្រឆ្លងចូលថ្ងៃសៅរ៍ ក្រុមអ្នកសង្គ្រោះ បានជួយមនុស្ស៥នាក់ឱ្យចេញរួចពីគំនរអាគារ។ ក្រុមអ្នកសង្គ្រោះបាននិងកំពុងបន្តប្រើគ្រប់មធ្យោបាយ វែកផ្លូវ ឈូសអារផ្ទាំងបេតុង និងចំរ៉ឹងដែករំដោះអ្នកជាប់កុន។ អ្នកសង្គ្រោះខ្លះទៀត ស្រែកទាក់ទងជាមួយជនរងគ្រោះ ដោយមានជំនួយពីសត្វឆ្កែ ឱ្យហិតរកទីតាំងមានជីវិត។
អាជ្ញាធរក្រុងមិនទាន់អាចពន្យល់អំពីមូលហេតុគ្រោះថ្នាក់ទេ ប៉ុន្តែទូរទស្សន៍ជាតិ CCTV បានគូសបញ្ជាក់ថា អ្នកប្រាស្រ័យក្នុងអាគារនេះបាននាំគ្នាជួសជុលក្នុងផ្ទះខ្លួនតាមចំណង់ រហូតមានការប្តូរផ្លាស់រចនាសម្ព័ន្ធរបស់អាគារ។
ប្រធានាធិបតីចិន លោក ស៊ីជីនពីង បានបញ្ជាឱ្យអាជ្ញាធរបើកអង្កេតស៊ីជម្រៅរកមូលហេតុនៃការរលំអាគារ និងរុករកសង្គ្រោះជីវិតអ្នកជាប់កុន ឱ្យដល់ទីបំផុត។ នេះបើតាមការជូនដំណឹងក្នុងសារព័ត៌មានរដ្ឋ។ អ្នកទទួលខុសត្រូវបក្សកុម្មុយនីស្តម្នាក់ បានធ្វើដំណើរទៅដល់កន្លែងកើតហេតុផ្ទាល់តែម្តង ដែលនេះសបញ្ជាក់ឱ្យឃើញអំពីភាពធ្ងន់ធ្ងរនៃគ្រោះថ្នាក់។ សេចក្តីថ្លែងការណ៍ដដែល រដ្ឋាភិបាលចិនបានថែមទាំងតែងតាំងទីប្រឹក្សាម្នាក់ឱ្យទៅដឹកនាំប្រតិបត្តិការ និងធ្វើអន្តរាគមន៍សង្គ្រោះបន្ទាន់ផង។
ដោយហេតុតែមិនគោរពច្បាប់សុវត្ថិភាពសាងសង់ និងភាពធូររលុងរបស់អាជ្ញាធរគ្រប់គ្រងសំណង់ គ្រោះមហន្តរាយប្រភេទនេះ តែងមានកើតឡើងជាញឹកញយនៅក្នុងប្រទេសចិន។ កាលពីខែមករា ការធ្លាយហ្កាស បានធ្វើឱ្យអាគារស្នាក់នៅមួយបានផ្ទុះឆេះរលំ ស្លាប់មនុស្សអស់១៦នាក់។ បំពង់បង្ហូរហ្កាសក្នុងសង្កាត់ស្នាក់នៅមួយក្នុងខេត្តហ៊ូបេ បានផ្ទុះដែរកាលពីខែមិថុនា២០២១ ស្លាប់មនុស្ស២៥នាក់។ ក្នុងខែដដែល មនុស្ស១៨នាក់បានស្លាប់ក្នុងគ្រោះអគ្គីភ័យក្នុងសាលារៀនវិជ្ជាជីវៈក្បាច់គុណ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ