ទីផ្សារភាគហ៊ុនចាប់ងើបវិញក្រោយក្រុមហ៊ុនEvergrandeបង់ការប្រាក់ឲ្យម្ចាស់បំណុល
ទីផ្សារភាគហ៊ុនអឺរ៉ុប និងអាស៊ី បានចាប់ស្ទុះងើបឡើងមកវិញបន្តិចនៅថ្ងៃសុក្រ ទី២២ តុលា ដោយសារតែបញ្ហាបំណុលរបស់ក្រុមហ៊ុនអចលនទ្រព្យយក្សចិន Evergrande មិនសូវធ្ងន់ធ្ងរខ្លាំងដូចមុន។ Evergrande នៅទីបំផុត អាចបង់ការប្រាក់ឲ្យទៅម្ចាស់បំណុលមុនថ្ងៃផុតកំណត់ ជាហេតុនាំឲ្យទីផ្សារហិរញ្ញវត្ថុជួបភាពធូរស្រាលវិញខ្លះ។
ចុះផ្សាយនៅថ្ងៃ៖
ស្តាប់ - ០២:១០
ទីផ្សារភាគហ៊ុនបានស្ទុះងើបឡើងមកវិញបន្តិច ក្រោយពេលដែលវិនិយោគិនលែងសូវបារម្ភខ្លាំងដូចមុនទៀតថាក្រុមហ៊ុនអចលនទ្យព្យដ៏ធំរបស់ចិន Evergrande នឹងត្រូវដួលរលំក្ស័យធន។
បើយោងតាមប្រព័ន្ធផ្សព្វផ្សាយរដ្ឋចិនកាលពីថ្ងៃសុក្រ ទី២២ តុលា ក្រុមហ៊ុន Evergrande បានធ្វើការទូទាត់បង់ការប្រាក់ឲ្យម្ចាស់បំណុលមួយថ្ងៃមុនពេលកំណត់នាចុងសប្តាហ៍នេះ។ ដូច្នោះក្តីរំពឹងដែលថាក្រុមហ៊ុនអាចនឹងដើរគេចផុតពីគ្រោះក្ស័យធនក៏ចាប់មានពន្លឺមកវិញខ្លះ។
នៅមួយរយៈមុន វិបត្តិជន់លិចក្នុងបំណុលជាង ៣០០ ពាន់លានដុល្លាររបស់ក្រុមហ៊ុនអភិវឌ្ឍន៍អចលនទ្រព្យដ៏ធំរបស់ចិនដូចជា Evergrande បានធ្វើឲ្យប៉ះពាល់យ៉ាងខ្លាំងដល់អារម្មណ៍អ្នកវិនិយោគ និងបង្កឲ្យមានក្តីបារម្ភថាបើ Evergrande ដួលរលំ នោះសេដ្ឋកិច្ចទាំងមូលនឹងរងផលប៉ះពាល់ជាក់ជាមិនខាន។
ក្រោយបានបង់ការប្រាក់ទៅឲ្យម្ចាស់បំណុល តម្លៃភាគហ៊ុនរបស់ Evergrande ក្នុងទីក្រុងហុងកុង បានកើនឡើងជាង ៤ %នៅថ្ងៃសុក្រ។ យ៉ាងណាក៏ដោយ ក្រុមអ្នកសង្កេតការណ៍បានព្រមានថាអនាគតរបស់ក្រុមហ៊ុន Evergrande នៅតែស្ថិតក្នុងភាពស្រពេចស្រពិលនៅឡើយ ព្រោះថាក្រុមហ៊ុននៅមានបំណុលជាច្រើនផ្សេងទៀតដែលត្រូវសងមុនដំណាច់ឆ្នាំ២០២១នេះ។
គួររំឭកថា កាលពីឆ្នាំទៅមិញ រដ្ឋាភិបាលទីក្រុងប៉េកាំងបានចាប់បង្ក្រាបទម្លាប់ខ្ចីប្រាក់ដោយគ្មានភាពប្រុងប្រយ័ត្នរបស់ក្រុមហ៊ុនអភិវឌ្ឍន៍អចលនទ្រព្យ។ វិធានការនេះបានធ្វើឲ្យប៉ះពាល់ដល់សមត្ថភាពក្រុមហ៊ុនក្នុងការបញ្ចប់គម្រោងសាងសង់របស់ពួកគេ។
ក្រុមហ៊ុនអចលនទ្រព្យចិនជាច្រើនមានដូចជា Evergrande Sinic និង Fantasia បានធ្លាក់ខ្លួនក្នុងវិបត្តិបំណុល ហើយប្រឈមនឹងការក្ស័យធន។ បញ្ហានេះបានបង្កឲ្យមានការខឹងសម្បា និងការតវ៉ាដ៏កម្រជាសាធារណៈពីអ្នកទិញផ្ទះ អ្នកផ្គត់ផ្គង់ និងវិនិយោគិននៅចិនដែលព្រួយបារម្ភពីប៉ះពាល់ធ្ងន់ធ្ងរដែលនឹងអាចកើតចេញពីការដួលរលំរបស់ក្រុមហ៊ុនអចលនទ្រព្យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ