អតីតប្រធានក្រុមហ៊ុនរឺណូ ថាការចាប់ខ្លួនរូបលោកគឺជាអំពើក្បត់និងជាការរៀបចំទុកជាមុន
លោកការឡូស ហ្គោន អតីតប្រធានសម្ព័ន្ធរថយន្តកូនកាត់បារាំង-ជប៉ុន រឺណូ-នីសាន់ បាននិយាយថា ការចាប់ខ្លួនរូបលោកកាលពីពេលកន្លងទៅ គឺជាអំពើក្បត់ ហើយវាគឺជាគម្រោការណ៍ដែលបានរៀបចំទុកជាមុនយ៉ាងម៉ត់ចត់ ពីសំណាក់ក្រុមហ៊ុនជប៉ុន នីសាន់។ នេះ បើយោងតាមព័ត៌មានដំបូងបំផុត ដែលលោកហ្គោនបានប្រាប់ទៅកាន់កាសែតជប៉ុន The Nikkei ក្នុងបទសម្ភាសន៍មួយនាថ្ងៃពុធនេះ។
ចុះផ្សាយនៅថ្ងៃ៖ កែប្រែថ្ងៃទី៖
ភ្លាមៗក្រោយពីបានឮនូវការអះអាងរបស់លោកការឡូស ហ្គោន អ្នកនាំពាក្យរបស់ក្រុមហ៊ុនរថយន្តនីសាន់ បានវាយបកវិញថា នាយកប្រតិបត្តិរបស់ក្រុមហ៊ុននីសាន់បច្ចុប្បន្នគឺលោក ហ៊ីរ៉ូតូ បានបដិសេដជាដាច់ខាតចំពោះការលើកឡើងរបស់លោកការឡូស ហ្គោនដែលថា ការចាប់ខ្លួនរូបលោកគឺជាការរៀបចំទុកជាមុន និងជាអំពើក្បត់។
បន្ថែមលើនេះ អ្នកនាំពាក្យដដែលនេះ បាននិយាយថា មូលហេតុពិតប្រាកដនៅពីក្រោយការចាប់ខ្លួន លោកការឡូស ហ្គោន គឺដោយសារលោកមានជាប់ពាក់ព័ន្ធនឹងការកេងបន្លំថវិកាខុសនឹងច្បាប់របស់ប្រទេសជប៉ុន។
សូមរឮកជូនថា លោក ការឡូស អតីតមេដឹកនាំសម្ព័ន្ធរថយន្តដ៏ល្បីនិងធំក្នុងលោក រឺណូ-នីសាន់-មីតស៊ូប៊ីស្ហី ត្រូវបានអាជ្ញាធរជប៉ុនចាប់ខ្លួនកាលពីថ្ងៃទី១៩ ខែវិច្ឆិកាឆ្នាំ២០១៨ កន្លងទៅ ពីបទពាក់ព័ន្ធកេងបន្លំថវិកា។
លោកហ្គោន រងបទចោទចំនួន៣ ដាច់ដោយឡែកពីគ្នា ក៏ប៉ុន្តែ នៅគ្រាកន្លងមក លោកការឡូស ហ្គោនបានបដិសេដចំពោះរាល់ការចោទប្រកាន់អស់។ លោកហ្គោន ត្រូវព្រះរាជអាជ្ញាជប៉ុនចោទថាបាន មិនបានរាយការណ៍អំពីចំណូលថវិការបស់លោកនៅចន្លោះឆ្នាំ ២០១០-២០១៥ដែលមានចំនួន៤៦ ០០០ លានដុល្លារ និងបន្តធ្វើដូច្នោះទៀតរយៈពេល៣ឆ្នាំ។
មិនតែប៉ុណ្ណោះរហូតមកដល់ពេលនេះ ព្រះរាជអាជ្ញាជប៉ុន នៅតែបន្តឃុំខ្លួនលោក ហ្គោន ហើយមិនព្រមអនុញ្ញាតឲ្យលោកនៅក្រៅឃុំឡើយ ទោះបីជាមានការស្នើសុំ ដោយបង់ប្រាក់ធានាជាច្រើនលើកច្រើនសារយ៉ាងណាក៏ដោយ។ តុលាការជប៉ុនថា ការសម្រេចបែបនេះ គឺដោយសារបារម្ភខ្លាច លោកហ្គោន អាចទៅបំផ្លាញភ័ស្តុតាងបាន ពេលនៅក្រៅឃុំ។
សូមជ្រាបថា ទោះបីជាតុលាការជប៉ុនសម្រេចបន្តឃុំខ្លួន លោកការឡូស ហ្គោន យ៉ាងណាក្តី ក៏ប៉ន្តែ រហូតមកទល់នឹងពេលបច្ចុប្បន្ននេះ តុលាការជប៉ុន នៅមិនទាន់បានរកឃើញភ័ស្តុតាងបញ្ជាក់ថារូបលោកពិតជាបានប្រព្រឹត្តដូចបទចោទប្រកាន់នោះទេ។
ទាក់ទងនឹងការឃុំខ្លួនលោកហ្គោននេះដែរ ក្រុមគ្រួសាររបស់លោក បាននិយាយថា លោកហ្គោន កំពុងត្រូវគេដាក់ឲ្យស្ថិតក្នុងស្ថានភាពលំបាកពេកហើយ។ មិនតែប៉ុណ្ណោះ នៅពេលថ្មីៗកន្លងមកនេះ សូម្បីតែលោកប្រធានាធិបតីបារាំងអេម៉ានុយអែល ម៉ាក្រុង ក៏បានចេញមុខរិះគន់ចំពោះការបន្តឃុំខ្លួនលោកការឡូស ហ្គោន ពីសំណាក់អាជ្ញាធរជប៉ុនដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ