សង្គ្រាមនៅហ្កាហ្សា៖ លោកប្លីងកិន ទៅដើមបូព៌ាជាលើកទី៥ ដើម្បីស្វែងរកដំណោះស្រាយ
លោកប្រមុខការទូតអាមេរិក អង់តូនី ប្លីងកិន បានចាប់ផ្តើមធ្វើដំណើរ ទៅបណ្តាប្រទេសតំបន់ដើមបូព៌ាជាថ្មីម្តងទៀត ក្នុងកម្មវត្ថុសង្ឃឹមស្វែងរកដំណោះស្រាយ ដល់សំណុំរឿងសង្គ្រាមនៅតំបន់ហ្កាហ្សា។ សង្គ្រាមនេះកំពុងតែឈានចូលដល់ខែទី៥ហើយ ខណៈសំឡេងតវាទាមទារ ឲ្យមានដំណោះស្រាយការទូត និងបទឈប់បាញ់ បានផុសផុលឡើងកាន់តែខ្លាំង ស្របពេលដែលចំនួនជនស៊ីវីលប៉ាឡេស្ទីនស្លាប់កាន់តែច្រើន។
ចុះផ្សាយនៅថ្ងៃ៖
ស្តាប់ - ០៣:២៤
នេះជាលើកទី៥ហើយ ដែលលោកអង់តូនី ប្លីងកិន ប្រមុខការទូតអាមេរិក បានធ្វើដំណើរទៅដើមបូព៌ា បន្ទាប់ពីសង្គ្រាមនៅហ្កាហ្សា បានផ្ទុះឡើងមក។ ទៅដល់អារ៉ាប៊ីសាអូឌីត កាលពីរសៀលថ្ងៃចន្ទ លោកប្លីងកិន បានបន្តដំណើរនៅថ្ងៃអង្គារនេះ ទៅអេហ្ស៊ីប និងបន្ទាប់មកទៀតទៅកាតា។ អេហ្ស៊ីបនិងកាតា គឺជាប្រទេសសម្របសម្រួលដ៏សំខាន់បំផុត នៅក្នុងសំណុំរឿងសង្គ្រាម រវាងអ៊ីស្រាអែល និងប៉ាឡេស្ទីន។ បន្ទាប់ពីនេះ លោកប្លីងកិន នឹងបន្តដំណើរទៅកាន់អ៊ីស្រាអែល និងតំបន់ស៊ីសហ្សកដានី។
ដំណើរទៅដ៏ញឹកញាប់របស់លោកប្លីងកិននេះ បានបង្ហាញអំពីការយកចិត្តទុកដាក់បំផុតរបស់សហរដ្ឋអាមេរិក ដើម្បីស្វែងរកដំណោះស្រាយឲ្យបានឆាប់ ដល់សង្រ្គាមនៅហ្កាហ្សា។ កាលពីថ្ងៃចន្ទទី៥កុម្ភៈដែរ លោករដ្ឋមន្ត្រីការបរទេសបារាំងថ្មី Stéphane Séjourné បានធ្វើដំណើរទៅជួបថ្នាក់ដឹកនាំអ៊ីស្រាអែល និងតំណាងប៉ាឡេស្ទីន នៅក្នុងកម្មវត្ថុដូចគ្នា ពោលគឺឈានទៅរៀបចំ ឲ្យមានការទម្លាក់អាវុធ រឺកាន់តែល្អប្រសើរជាងនេះ គឺដំណោះស្រាយសន្តិភាពយូរអង្វែង រវាងអ៊ីស្រាអែល និងប៉ាឡេស្ទីន។
យោងតាមប្រភពមន្ត្រីការទូត គឺលោកអង់តូនី ប្លីងកិនគាំទ្រផែនការចរចានៅប៉ារីស កាលពីចុងខែមករា រវាងអាមេរិក កាតានិងអេហ្ស៊ីប។ តែផែនការនេះ ត្រូវឲ្យភាគីហាម៉ាស និងអ៊ីស្រាអែលទទួលយក។ ប្រភពពីក្រុមហាម៉ាសបញ្ជាក់ថា ផែនការនេះកំណត់ពីការផ្អាការប្រយុទ្ធរយៈពេល៦សប្តាហ៍។ ក្នុងអំឡុងពេលនេះ អ៊ីស្រាអែល សុខចិត្តដោះលែងអ្នកទោសប៉ាឡេស្ទីន ពី២០០ទៅ៣០០នាក់ ហើយជាថ្នូរវិញ ក្រុមហាម៉ាសសុខចិត្តដោះលែងចំណាប់ខ្មាំង ៣៥ ទៅ៤០នាក់។ បន្ថែមពីនេះ ត្រូវបញ្ជូនស្បៀងនិងជំនួយសប្បុរសធម៌ចូលទៅហ្កាហ្សា ពី២០០ទៅ៣០០រថយន្តកាមីញ៉ុង ក្នុងមួយថ្ងៃ។
ក៏ប៉ុន្តែ ក្រុមហាម៉ាមិនទទួលយកផែនការនេះ ដោយពួកគេបានទាមទារ ថាត្រូវតែ បិទបញ្ចប់សង្គ្រាមជាស្ថាពរ មិនមែនផ្អាកត្រឹមតែ៦សប្តាហ៍ទេ។ ផ្ទុយទៅវិញ លោកណេតាន់យ៉ាហ៊ូ បានថ្លែងកាលពីថ្ងៃចន្ទថា ក្រុមហាម៉ាសបានទាមទារនូវអ្វីដែលអ៊ីស្រាអែល មិនអាចធ្វើបានជាដាច់ខាត។ អ៊ីស្រាអែលនឹងមិនបិទបញ្ចប់សង្គ្រាមជាស្ថាពរជាដាច់ខាត ដរាបណាមិនទាន់បោសសំអាតក្រុមហាម៉ាសអស់ពីតំបន់ហ្កាហ្សា ហើយដរាបណាក្រុមនេះ មិនដោះលែងចំណាប់ខ្មាំងទាំងអស់ទេនោះ។
យ៉ាងណាក៏ដោយ សម្រាប់ពេលនេះ ការបាញ់ប្លោងនិងទំលាក់គ្រាប់នៅតែសកម្មដដែល នៅតំបន់រ៉ាហ្វា និង ខាន់យូណែស ខាងត្បូងហ្កាហ្សា។ គិតជាសរុប យោងតាមអាជ្ញាធរសុខាភិបាលហាម៉ាស ដែលគ្រប់គ្រងតំបន់ហ្កាហ្សា គឺមានមនុស្សស្លាប់ ចំនួន២៧៤៧៨នាក់ ដោយក្នុងនោះមានស្លាប់៩៩នាក់ នៅរវាងពីយប់ថ្ងៃចន្ទ ដល់ព្រឹកថ្ងៃអង្គារនេះ។ ដោយឡែក លោក Yoav Gallant រដ្ឋមន្ត្រីការពារជាតិអ៊ីស្រាអែល បានអះអាងថា មេក្លោងរបស់ក្រុមភេរវកម្មហាម៉ាស ឈ្មោះ Yahya Sinouar បានប្តូរទីតាំងលាក់ខ្លួនពីមួយទៅមួយ នៅភាគខាងត្បូងហ្កាហ្សា ដោយយកប្រជាជនស៊ីវីលធ្វើជាខែល។
គួរបញ្ជាក់ថា ទុក្ខលំបាករបស់ជនភៀសខ្លួនប៉ាឡេស្ទីន ប្រមាណ៤ខែមកនេះ គឺធ្ងន់ធ្ងរខ្លាំងណាស់។ ទីក្រុងរ៉ាហ្វា ភាគខាងត្បូងហ្កាហ្សា ដែលមុនសង្គ្រាមមានមនុស្សរស់នៅប្រមាណ ២៧ម៉ឺននាក់ ពេលនេះ គឺមានមនុស្សកកកុញ ដល់ទៅប្រមាន១លាន៣សែននាក់។ យោងតាមអង្គការសហប្រជាជាតិ ជនភៀសខ្លួនប៉ាឡេស្ទីនម្នាក់មានទឹកប្រើប្រាស់ ចំនួនតែ១លីត្រកន្លះទៅ២លីត្រក្នុងមួយថ្ងៃ សម្រាប់បរិភោគ ធ្វើម្ហូបអាហារ និងលាងសម្អាតអនាម័យ។ ករណីជំងឺរាករូសជា ពិសេសទៅលើកុមារ សំបូរកាន់តែខ្លាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ