អ៊ីស្រាអែលទាត់ចោលបទឈប់បាញ់មនុស្សធម៌ ស្នើឡើងដោយរដ្ឋមន្រ្តីការបរទេសអាមេរិក
អ៊ីស្រាអែលទាត់ចោលបទឈប់បាញ់មនុស្សធម៌ ស្នើឡើងដោយរដ្ឋមន្រ្តីការបរទេសអាមេរិកនៅថ្ងៃសៅរ៍ទី ៤ វិច្ឆិកា កងទ័ពអ៊ីស្រាអែលនៅបន្តប្រតិបត្តិការជើងគោកវាយប្រហារក្រុងហ្កាហ្សា បន្ទាប់ពីនាយករដ្ឋមន្រ្តីអ៊ីស្រាអែល លោកបេនចាមីន នេតាន់យ៉ាហ៊ូបដិសេធមិនស្តាប់ការទាមទាររបស់អាមេរិក។ នៅក្នុងជំនួបជាមួយនាយករដ្ឋមន្រ្តី អ៊ីស្រាអែល កាលបីថ្ងៃសុក្រ ប្រមុខការបរទេសអាមេរិកបានសុំឲ្យអ៊ីស្រាអែលអនុវត្តបទឈប់បាញ់មនុស្សធម៌ ដើម្បីការពារប្រជាជនស៊ីវិល ដែលកំពុងជាប់គាំង ២៩ថ្ងៃមកហើយ នៅក្នុងសង្រ្គាមប្រយុទ្ធគ្នារវាងអ៊ីស្រាអែល និងក្រុមហាម៉ាសក្នុងទឹកដី ហ្កាហ្សា។ បន្ទាប់ពីអ៊ីស្រាអែល រដ្ឋមន្រ្តីការបរទេសអាមេរិកធ្វើដំណើរទៅហ្សកដានីដើម្បីជួបប្រជុំជាមួយថ្នាក់ដឹកនាំ រដ្ឋមន្រ្តីការបរទេសរបស់ប្រទេសអារ៉ាប់ ក្នុងគោលដៅបញ្ចុះបញ្ចូលកុំឲ្យសង្រ្គាមនៅហ្កាហ្សា បែករីកសាយទៅជាសង្រ្គាមក្នុងតំបន់។
ចុះផ្សាយនៅថ្ងៃ៖
ស្តាប់ - ០៤:២០
សង្រ្គាមសងសឹករបស់អ៊ីស្រាអែលទៅលើក្រុមហាម៉ាសក្នុងទឹកដីហ្កាហ្សាបានឈានចូលដល់ថ្ងៃទី ២៩ គិតត្រឹមថ្ងៃសៅរ៍ទី ៤វិច្ឆិកា។ កងទ័ពជើងគោកអ៊ីស្រាអែលនៅបន្តប្រតិបត្តិការវាយប្រហារក្រុមហាម៉ាស បន្ទាប់ពីនាយករដ្ឋមន្រ្តីអ៊ីស្រាអែល លោកបេចាមីន នេតាន់យ៉ាហ៊ូ បដិសេធបទឈប់បាញ់មនុស្សធម្ម ស្នើឡើងដោយភាគីអាមេរិក។
កាលពីថ្ងៃសុក្រ ប្រមុខការបរទេសអាមេរិក លោកអង់តូនី ប្លីងកិនបានធ្វើដំណើរទៅទីក្រុងតែលអាវីវ ដើម្បីបញ្ជាក់ប្រាប់ភាគីអ៊ីស្រាអែលថា អាមេរិកចង់ឲ្យអ៊ីស្រាអែលអនុវត្តបទឈប់បាញ់មនុស្សធម៌ ដើម្បីអនុញ្ញាតឲ្យគេជម្លៀសប្រជាជនស៊ីវិល និងបញ្ជូនជំនួយស្បៀង ថ្នាំពេទ្យសម្រាប់ប្រជាជន ជាង២លាននាក់ ដែលកំពុងជាប់គាំង ក្នុងសង្រ្គាមប្រយុទ្ធគ្នា នៅហ្កាហ្សា។
នៅក្នុងជំនួបជាមួយនាយករដ្ឋមន្រ្តីអ៊ីស្រាអែល ប្រមុខការបរទេសអាមេរិកបញ្ជាក់ផងដែរពីសារៈសំខាន់នៃការការពារជីវិតប្រជាជនស៊ីវិល នៅហ្កាហ្សា និងថា អាមេរិកនៅតែរក្សាជំហរ ចង់ឲ្យបង្កើតរដ្ឋពីរ គឺរដ្ឋប៉ាឡេស្ទីន និងរដ្ឋអ៊ីស្រាអែល។ សម្រាប់រដ្ឋមន្រ្តីការបរទេសអាមេរិក រដ្ឋពីរ សម្រាប់ជនជាតិពីរ ជាមធ្យោបាយតែមួយគត់ដើម្បីធានាសន្តិសុខយូរអង្វែងរបស់រដ្ឋជ្វីហ្វអ៊ីស្រាអែល។
នៅក្រោយការវាយប្រហារទ្រង់ទ្រាយធំ របស់ក្រុមហាម៉ាសដែលបានសម្លាប់ប្រជាជនស៊ីវិលអ៊ីស្រាអែល និងជនបរទេស ជាង ១៤០០នាក់ កាលពីដើមខែតុលា អាមេរិកធ្លាប់ចេញមុខការពារអ៊ីស្រាអែល និងវេតូប្រឆាំងការទាមទារឲ្យមានបទឈប់បាញ់ ដូចការចង់បានរបស់អ៊ីស្រាអែល។ ប៉ុន្តែ នៅចំពោះមុខនៃការកើនឡើងចំនួនមនុស្សស្លាប់ ជាពិសេសប្រជាជនស៊ីវិលប៉ាឡេស្ទីន ដោយសារការវាយប្រហាររបស់អ៊ីស្រាអែល និងវិបត្តិមនុស្សធម៌នៅភាគខាងត្បូងហ្កាហ្សា រដ្ឋបាលលោកចូ បៃដិន បានបន្ទន់ជំហរ និងទាមទារឲ្យអ៊ីស្រាអែលអនុវត្តបទឈប់បាញ់មនុស្សធម៌ ពោលគឺផ្អាកការវាយប្រហារមួយរយៈ ដើម្បីបុព្វហេតុមនុស្សធម៌។
ប៉ុន្តែ ភាគីអ៊ីស្រាអែលស្តាប់មិនចូលត្រចៀកឡើយ។ នៅថ្ងៃសុក្រ ប្រមុខរដ្ឋាភិបាលអ៊ីស្រាអែលបានបញ្ជាក់ប្រាប់រដ្ឋមន្រ្តីការបរទេសអាមេរិក ថា អ៊ីស្រាអែលបដិសេធ មិនអនុវត្តបទឈប់បាញ់ ដរាបណាក្រុមហាម៉ាសមិនព្រមដោះលែងចំណាប់ខ្មាំង ជាង ២៤០នាក់ ដែលក្រុមហាម៉ាសចាប់យកទៅលាក់ ក្នុងរូងក្រោមដី នៅទឹកដីហ្កាហ្សា។
បន្ទាប់ពីវាយចូលឡោមព័ទ្ធទីក្រុងហ្កាហ្សា តាំងពីថ្ងៃព្រហស្បតិ៍ កងទ័ពអ៊ីស្រាអែលអះអាងនៅថ្ងៃសៅរ៍នេះថា បានបាញ់សម្លាប់ភេរវជនជាច្រើននាក់ និងកម្ទេចបានហេដ្ឋារចនាសម្ព័ន្ធរបស់ក្រុមហាម៉ាស នៅក្រុងហ្កាហ្សា ដែលអ៊ីស្រាអែលចាត់ទុកជាទីតាំងក្បាលម៉ាស៊ីនរបស់ក្រុមហាម៉ាសប៉ាឡេស្ទីន។
យោងតាមតួលេខរបស់ក្រុមហាម៉ាសដែលគ្រប់គ្រងតំបន់ហ្កាហ្សា តាំងពីឆ្នាំ ២០០៧ ការវាយប្រហាររបស់អ៊ីស្រាអែល នៅជាង៣សប្តាហ៍មកនេះ បានសម្លាប់មនុស្សជាង ៩ពាន់នាក់ ដែលនៅក្នុងនោះ ជាង ៣ពាន់នាក់ជាកុមារ។ នៅថ្ងៃសុក្រ អគ្គលេខាធិការអង្គការសហប្រជាជាតិបានសំដែងក្តីរន្ធត់ នៅចំពោះមុខការទម្លាក់គ្រាប់ បំផ្លាញ មន្ទីរពេទ្យ និងរថយន្តសង្រ្គោះបន្ទាន់មួយគ្រឿងកាលពីថ្ងៃសុក្រ ដែលបានសម្លាប់មនុស្ស១៥នាក់ និងរបួស ៦០នាក់។
កងទ័ពអ៊ីស្រាអែល ទទួលស្គាល់ថា ខ្លួនបានដៅវាយប្រហារឡានពេទ្យ ព្រោះវាមានដឹកសមាជិកក្រុមហាម៉ាស។ ការលើកឡើងរបស់អ៊ីស្រាអែល ដែលក្រុមហាម៉ាសបដិសេធដាច់អហង្កា។
ត្រលប់មកនិយាយពីប្រមុខការបរទេសអាមេរិក លោកអង់តូនីប្លីងកិនវិញ។ បន្ទាប់ពីចាកចេញពីអ៊ីស្រាអែល ដៃទទេ មិនបានទទួលបទឈប់បាញ់ពីភាគីអ៊ីស្រាអែល រដ្ឋមន្រ្តីការបរទេសធ្វើដំណើរនៅថ្ងៃសៅរ៍ ទៅប្រទេសហ្សកដានី ជាទីដែលលោកត្រូវជួបថ្នាក់ដឹកនាំ និងសមភាគី របស់ប្រទេសអារ៉ាប់ ដូចជា អេហ្ស៊ីប អារ៉ាប៊ី សាអូឌីត អេមីរ៉ាត អារ៉ាប់រួម កាតា ហ្សកដានី។ នៅក្នុងជំនួបជាមួយសមភាគីអារ៉ាប់ ដែលមួយចំនួនអាចដើរតួជាអាជ្ញាកណ្តាលជាមួយពួកហាម៉ាស ដូចជាប្រទេសកាតា រដ្ឋមន្រ្តីការបរទេសអាមេរិកគ្រោងបញ្ចុះបញ្ចូលជំរុញឲ្យមានការដោះលែងចំណាប់ខ្មាំង។ សម្រាប់រដ្ឋមន្រ្តីហ្សកដានីដែលជាម្ចាស់ផ្ទះ កិច្ចប្រជុំរបស់រដ្ឋមន្រ្តីការបរទេសអាមេរិក ជាមួយប្រទេសអារ៉ាប់ និងមានការចូលពីខាងអាជ្ញាធរប៉ាឡេស្ទីន នៅហ្សកដានីនៅថ្ងៃសៅរ៍ មានគោលដៅទប់ស្កាត់កុំឲ្យសង្រ្គាមនៅហ្កាហ្សា បែករីកសាយទៅជាសង្រ្គាមនៅតំបន់ដើមបូព៌ា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ