ការកាត់បន្ថយឧស្ម័នកាបូនិក ជាការល្បងសមត្ថភាពដ៏លំបាក សម្រាប់វិស័យឧស្សាហកម្មសម្លៀកបំពាក់
ចុះផ្សាយនៅថ្ងៃ៖
ស្តាប់ - ០៥:៤៥
សន្និសីទអន្តរជាតិស្តីពីអាកាសធាតុ ដែលកំពុងប្រព្រឹត្តិធ្វើទៅ នៅទីក្រុង Charm-el-Cheikh ប្រទេសអេហ្ស៊ីប ជិតដល់ថ្ងៃបិទបញ្ចប់ហើយ។ ប្រមាណជាងមួយសប្តាហ៍មកនេះ ក្រុមអ្នកជំនាញ និងតំណាងវិស័យនានា បាននិយាយដោះដូរយោបល់គ្នា ស្តីអំពីវិធានការចាំបាច់ ដើម្បីឈានទៅកាត់បន្ថយការបញ្ចេញឧស្ម័នកាបូនិក ដែលជាប្រភពនៃការកើនឡើងកំដៅផែនដី។ ក្នុងនោះដែរ វិស័យឧស្សាហកម្មផលិតសម្លៀកបំពាក់ គឺជាអ្នកចូលរួមបញ្ចេញឧស្ម័នកាបូនិកទៅក្នុងបរិយាកាស ដ៏សំខាន់ម្នាក់ដែរ។ ម៉ូដសម្លៀកបំពាក់ថោកៗ ប្រើ១ដង ២ដងបោះចោល បានជះឥទ្ធពល ជាទំលាប់អាក្រក់ដល់អ្នកប្រើប្រាស់ ដែលដូរម៉ូតញឹកញាប់ ដោយមិនគិតពីផលវិបាកផ្នែកបរិស្ថាន ដែលស្ថិតនៅពីក្រោយការផលិតសម្លៀកបំពាក់ទាំងនោះ។ ទោះបីជាមានចេតនាចង់កាត់បន្ថយការបញ្ចេញឧស្ម័នកាបូនិក តែតំណាងក្រុមហ៊ុនឧស្សាហកម្មផលិតសម្លៀកបំពាក់ បានទទួលស្គាល់ថា ការងារនេះជារឿងលំបាកខ្លាំងណាស់។
អព្យាក្រិត្យភាពកាបូននៅឆ្នាំ២០៥០
កាលពីឆ្នាំ២០១៨ ក្នុងក្របខណ្ឌសន្និសីទCOP24 ក្រុមហ៊ុនម៉ាកសម្លៀកបំពាក់ប្រមាណជាង៣០ បានចូលរួមចុះហត្ថលេខា លើធម្មនុញ្ញនៃឧស្សាហកម្មសម្លៀកបំពាក់ ដើម្បីជួយដោះស្រាយវិបត្តិអាកាសធាតុពិភពលោក តាមរយៈ ការកាត់បន្ថយការបញ្ចេញឧស្ម័នកាបូនិក ឲ្យបាន៣០% ពីនេះដល់ឆ្នាំ២០៣០។ ក្រោយមកនៅឆ្នាំ២០២១ កម្មវត្ថុនេះ ត្រូវបានទាញដំឡើងបន្ថែម ឲ្យដល់៥០%។
គិតមកត្រឹមពេលនេះ មានក្រុមហ៊ុនម៉ាកសម្លៀកបំពាក់ជាង១០០ហើយ ដែលបានចូលរួមសន្យា ឈានទៅមានអព្យាក្រឹត្យភាពកាបូននៅឆ្នាំ២០៥០។ ក្នុងនោះមានដូចជាក្រុមហ៊ុនស៊ុយអែត H&M ក្រុមហ៊ុនអេស្ប៉ាញ Inditex ម្ចាស់ម៉ាក Zara ព្រមទាំងក្រុមហ៊ុនផលិតសម្លៀកបំពាក់កីឡាល្បីៗផ្សេងទៀត ដូចជា Adidas Nike Puma ជាដើម។
តែយ៉ាងណាកម្មវត្ថុ សម្រេចឲ្យបាននូវអព្យាក្រិត្យភាពកាបូន នៅរវាងឆ្នាំ២០៥០នេះ គឺជាការល្បងសមត្ថភាពដ៏ធំបំផុត សម្រាប់វិស័យឧស្សាហកម្មសម្លៀកបំពាក់ ព្រោះវិស័យនេះប្រើប្រាស់បណ្តាញផលិត និងបណ្តាញផ្គត់ផ្គង់ នៅរាយប៉ាយពាសពេញពិភពលោក។ តើវិស័យឧស្សាហកម្មផលិតសម្លៀកបំពាក់ អាចធ្វើកិច្ចការនេះបានសម្រេចដែរឬទេ? នៅក្នុងពេលប្រជុំតុមូល នៅសន្និសីទ COP27 លោក Stefan Seidel អ្នកទទួលបន្ទុកផ្នែកអភិវឌ្ឍន៍ប្រកបដោយចីរភាព របស់ក្រុមហ៊ុនPuma បានទទួលស្គាល់ថា ប្រហែលជាឧស្សាហកម្មផលិតសម្លៀកបំពាក់ មិនអាចឈានទៅមានអព្យាក្រិត្យភាពកាបូនបានទេ នៅឆ្នាំ២០៥០។
បណ្តាញផលិតនិងផ្គត់ផ្គង់ នៅរាយប៉ាយពេញពិភពលោក
យោងតាមការិយាល័យវិភាគ McKinsey វិស័យឧស្សាហកម្មផលិតសម្លៀកបំពាក់ ចូលរួមបញ្ចេញឧស្ម័នកាបូនិកចំនួនប្រមាណ៤% ក្នុងមួយឆ្នាំ នៃទំហំរួមរបស់ពិភពលោក។ ពោលគឺស្មើនឹងទំហំឧស្ម័នបញ្ចេញដោយ បារាំង អង់គ្លេស និងអាល្លឺម៉ង់រួមគ្នា។ ៩០%នៃឧស្ម័នកាបូនិករបស់វិស័យផលិតសម្លៀកបំពាក់ គឺត្រូវបានបញ្ចេញដោយក្រុមហ៊ុនសហគ្រាសផលិតនិងផ្គត់ផ្គង់វត្ថុធាតុដើម។ នេះបើផ្អែកតាមតួលេខ របស់អង្គការ Global Fashion Agenda។
ដំណើរការផ្លាស់ប្តូរទាំងស្រុង ទៅលើបណ្តាញផលិតនិងផ្គត់ផ្គង់ទាំងនេះ តាមរយៈការដាក់កំហិតបទដ្ឋានថ្មីដែលគោរពបរិស្ថាន វាគឺជាការងារដ៏ធំមហាសាល និងស្មុគស្មាញបំផុត។ លោកស្រី Leyla Ertur អ្នកទទូលបន្ទុកផ្នែអភិវឌ្ឍន៍ប្រកបដោយចីរភាព របស់ក្រុមហ៊ុន H&M បានលើកឡើងថា ក្រុមហ៊ុនលោកស្រីធ្វើការជាមួយក្រុមហ៊ុន ផ្គត់ផ្គង់ដល់ទៅជាង៨០០ក្រុមហ៊ុនផ្សេងគ្នា។ ដូចគ្នាដែរ តំណាងក្រុមហ៊ុន Kering ដែលជាម្ចាស់ម៉ាក Gucci និងYves Saint Laurent បានទទួលស្គាល់ថា ក្រុមហ៊ុនលោកស្រីធំប៉ុណ្ណេះ ក៏នៅតែគ្មានទំងន់គ្រប់គ្រាន់ ដើម្បីទៅបញ្ជាឲ្យមានការផ្លាស់ប្តូរទាំងស្រុងដែរ។ វាចាំបាច់ទាល់តែមានការសហការគ្នា។
ខ្វះវិញ្ញាបនកម្មបរិស្ថាន និងស្តង់ដារបទដ្ឋានច្បាប់ខុសៗគ្នា
ដោយឡែក លោក Ali Nouira ម្ចាស់ក្រុមហ៊ុនផលិតសម្លៀកបំពាក់មួយនៅអេហ្ស៊ីប បានត្អូញត្អែរពីបញ្ហា ដែលនៅតំបន់ខ្លះតួយ៉ាងនៅអាហ្ស៊ីបតែម្តង ដែលពុំមានអង្គភាពត្រួតពិនិត្យ និងធ្វើវិញ្ញាបនកម្ម។ ឧទាហរណ៍ វិញ្ញាបនកម្ម ស្តីអំពីស្លាកស្នាមកាបូន ដែលមានតម្លៃថ្លៃហើយដែលក្រុមហ៊ុនផលិតតូចតាចភាគច្រើន មិនអាចមានលទ្ធភាពចំណាយ។ លោកម្នាក់នេះបានអះអាងថា ក្រុមហ៊ុនលោក ផលិតសម្លៀកបំពាក់ផ្គត់ផ្គង់ទៅឲ្យម៉ាកធំៗនៅអឺរ៉ុប ហើយគេបានដាក់កំហិតច្រើនណាស់ ទាមទារឲ្យមានវិញ្ញាបនបត្រផ្នែកបរិស្ថាន។
ក្រៅពីបញ្ហាធ្វើវិញ្ញាបនកម្មនេះ ក្រុមហ៊ុនផលិត បានត្អូញត្អែរផងដែរ អំពីភាពខុសៗគ្នា នៃវិធានបទដ្ឋានច្បាប់ ពីប្រទេសមួយទៅប្រទេសមួយ។ បញ្ហានេះបានបង្កើតជាឧបសគ្គច្រើនរាប់មិនអស់ ដល់សកម្មភាពផលិត ព្រមទាំងស្តង់ដារតម្លៃ។ នេះបើផ្អែកតាមលោក Delman Lee អគ្គនាយករងក្រុមហ៊ុន Tal Apparel ដែលមានទីតាំងនៅហុងកុង តែមានសាខានៅវៀតណាម និងនៅអេត្យ៉ូពីជាដើម។ លោកម្នាក់នេះបាន លើកឡើងថា បំណងចង់សម្រេចឲ្យបាននូវអព្យាក្រិត្យភាពកាបូន វាគឺជាជំនឿចិត្តមួយ ដែលសឹងតែគ្មានថ្ងៃអាចក្លាយជាការពិត។
កម្ចីការប្រាក់ទាប ជួយជំរុញលើកទឹកចិត្តការវិនិយោគ
ជាការងារលំបាក តែយ៉ាងណា វាជាការងារចាំបាច់ដែលត្រូវតែធ្វើ ដើម្បីស្រោចស្រង់ផែនដីពីមហន្តរាយអាកាសធាតុ។ លោក Nicolas Mazzei ប្រធានផ្នែកការអភិវឌ្ឍន៍ប្រកបដោយចីរភាព របស់ក្រុមហ៊ុន Zalando ដែលជាក្រុមហ៊ុនលក់ផលិតផលអនឡាញដ៏ធំមួយ បានលើកឡើងថា ទំនោរផ្នត់គំនិតបានប្រែប្រួលកាន់តែច្រើនហើយ ជាពិសេសនៅតាមបណ្តាប្រទេសជឿនលឿន។ លោកបានអះអាងថា ធនាគារធំៗ បានបង្កើនការផ្តល់កម្ចីក្នុងការប្រាក់ទាប ទៅដល់ក្រុមហ៊ុនណា ដែលសន្យាឈានទៅកាត់បន្ថយ ការបញ្ចេញឧស្ម័នកាបូនិកទាំងស្រុង។ មានន័យថា នៅទីបំផុតប្រសិនបើក្រុមហ៊ុនហ៊ានសន្យាផ្លាស់ប្តូរដើម្បីគោរពបរិស្ថាន នៅការប្រាក់នឹងកាន់តែទាបខ្លាំង ឬសឹងតែគ្មានសោះក៏មាន។
តែយ៉ាងណាក៏ដោយ ដំណើរការវិវឌ្ឍន៍ផ្លាស់ប្តូរនេះ វានៅវែងឆ្ងាយទៅទៀត។ លោកស្រី Catherine Chiu អគ្គនាយករងផ្នែកអភិវឌ្ឍន៍ប្រកបដោយចីរភាព របស់ក្រុមហ៊ុនហុងកុង Crystal International Group បានលើកឡើងថា វិស័យឧស្សាហកម្មសម្លៀកបំពាក់ ត្រូវការប្រភពថាមពលដែលមិនចេះរីងស្ងួត ឲ្យបានច្រើនបន្ថែមទៀត។ លោកស្រីបានអះអាងថា ទោះក្រុមហ៊ុនលោកស្រី ដាក់ឲ្យដំណើរការផ្ទាំងសូឡាផលិតចរន្តអគ្គិសនី នៅតាមរោងចក្រផលិតសម្លៀកបំពាក់ទាំង២០ របស់ក្រុមហ៊ុនលោកស្រីក៏ដោយ តែកម្រិតនេះមានទំហំត្រឹមតែ១៧%ប៉ុណ្ណោះ នៃការប្រើប្រាស់ថាមពល របស់ក្រុមហ៊ុនទាំងមូល។
ជាចុងក្រោយ លោក Delman Lee បានសង្កត់បន្ថែមថា វិស័យឯកជនប្រឹងបានប្រែងច្រើនពិតមែន តែផ្នែកអង្គភាពសម្របសម្រួលសាធារណៈ ធ្វើដំណើរក្នុងល្បឿនមួយផ្សេងរបស់គេ ដែលចាប់ទាញឲ្យវិស័យឯកជន ផ្នែកផលិតសម្លៀកបំពាក់នេះ ត្រូវដើរយឺតយ៉ាវ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ