អត្រាស្លាប់ដោយជំងឺរបេងនៅកម្ពុជាធ្លាក់ចុះ៤៥%គិតត្រឹមឆ្នាំ២០២២
អត្រាស្លាប់ដោយសារជំងឺរបេងបានថយចុះ៤៥% ពោលស្លាប់៤២ករណី នៅឆ្នាំ២០០០ ធ្លាក់ចុះមកនៅតែ២៣ករណីនៅឆ្នាំ២០២២ នៅក្នុងចំណោមពលរដ្ឋចំនួន១០ម៉ឺននាក់។ នេះបើតាមការគូសបញ្ជាក់នៅក្នុងសារលិខិតរបស់ប្រមុខរដ្ឋាភិបាលកម្ពុជា ចេញផ្សាយនៅក្នុងទិវាពិភពលោកកម្ចាត់រោគរបេង ថ្ងៃទី២៤ខែមីនា។ ប៉ុន្តែបើប្រៀបធៀបចំនួនអ្នកស្លាប់ដោយសារតែជំងឺរបេងនៅឆ្នាំ២០២១ ធៀបនឹងឆ្នាំ២០២២ គឺមានការកើនឡើងខណៈអត្រាឆ្លងវិញក៏មានការកើនឡើងដែរ។
ចុះផ្សាយនៅថ្ងៃ៖
ស្តាប់ - ០២:៥៣
បើតាមប្រមុខរដ្ឋាភិបាលកម្ពុជា អត្រាឆ្លងជំងឺរបេងបានធ្លាក់ចុះពី៥៧៩ករណីនៅឆ្នាំ២០០០ មកនៅសល់តែ៣២០ករណីនៅឆ្នាំ២០២២ ក្នុងចំណោមប្រជាជន១០ម៉ឺននាក់ដូចគ្នា។ ការធ្លាក់ចុះនេះ ត្រូវបានលោក ហ៊ុន ម៉ាណែត ពន្យល់ថា ដោយសារតែការស្រាវជ្រាវ និងការផ្តល់សេវាព្យាបាលជូនពលរដ្ឋដែលកើតជំងឺរបេងដោយឥតគិតថ្លៃ។
យោងតាមលទ្ធផលនេះ នឹងធ្វើឲ្យប្រទេសកម្ពុជាសម្រេចគោលដៅអភិវឌ្ឍន៍សហស្សវត្សរ៍ពាក់ព័ន្ធនឹងអត្រាឈឺ និងស្លាប់ដោយសាររបេង នៅមុនកាលកំណត់៤ឆ្នាំ ដែលមានប្រទេសតិចតួចនៅលើពិភពលោកសម្រេចបាន។ នេះគឺជាការអះអាងនៅក្នុងសារលិខិតរបស់នាយករដ្ឋមន្ត្រីកម្ពុជា នៅក្នុងទិវាពិភពលោកកម្ចាត់រោគរបេង ក្រោមប្រធានបទ«មែនហើយ! យើងអាចបញ្ចប់ជំងឺរបេងបាន»។
ប៉ុន្តែបើប្រៀបធៀបចំនួនអ្នកស្លាប់ដោយសារតែជំងឺរបេងនៅឆ្នាំ២០២១ ធៀបនឹងឆ្នាំ២០២២ គឺមានការកើនឡើង១ករណី ខណៈអត្រាឆ្លងវិញក៏មានការកើនឡើង៣២ករណី។
យោងតាមសារលិខិតរបស់ លោក ហ៊ុន សែន ក្នុងទិវាពិភពលោកម្ចាត់រោគរបេង កាលពីឆ្នាំ២០២៣ ក្នុងចំណោមប្រជាជន១០ម៉ឺននាក់ អត្រាស្លាប់ដោយជំងឺរបេងមាន៤២ករណី នៅឆ្នាំ២០០០ ធ្លាក់ចុះមកនៅ២១ករណី ក្នុងឆ្នាំ២០២១ គឺធ្លាក់ចុះ៥០%។ ចំណែក អត្រាឆ្លងវិញ មាន៥៧៩ករណី នៅឆ្នាំ២០០០ ធ្លាក់ចុះមកនៅ២៨៨ករណី នៅឆ្នាំ២០២១ ដែលធ្លាក់ចុះ៥០%។
ទោះជាយ៉ាងនេះក្តី ប្រមុខរដ្ឋាភិបាលកម្ពុជា លោក ហ៊ុន ម៉ាណែត នៅឆ្នាំ២០២៤នេះ លើកឡើងថា នៅមានបញ្ហាប្រឈមមួយចំនួនដែលត្រូវបង្កើនល្បឿនដើម្បីកាត់បន្ថយឲ្យបានខ្ពស់បំផុតនូវអត្រាឈឺ និងស្លាប់ដោយសារតែជំងឺរបេងនេះ។
នៅចំពោះមុខបញ្ហាប្រឈម ប្រមុខរដ្ឋាភិបាលកម្ពុជា បានជំរុញឲ្យបង្កើនល្បឿនប្រយុទ្ធជំងឺរបេង តាមផែនការជាតិ និងផែនការសកល ដោយខិតខំស្រាវជ្រាវរកជំងឺរបេងនៅតាមសហគមន៍ និងវត្តអារ៉ាម និងជំរុញការព្យាបាលជំងឺរបេងឲ្យជោគជ័យលើស៩០%។
បើតាមអង្គការសុខភាពពិភពលោក កម្ពុជាត្រូវបានរួចផុតពីបញ្ជីនៃប្រទេសចំនួន៣០ ដែលមានកើតជំងឺរបេងធ្ងន់ធ្ងរ ក្នុងពិភពលោក សម្រាប់រយៈពេល៥ឆ្នាំ ពីឆ្នាំ២០២១ ដល់ឆ្នាំ ២០២៥៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ