លោក ឈាង រ៉ា៖ប្រព័ន្ធសុខាភិបាលកម្ពុជារីកចម្រើនបាន មិនអាស្រ័យតែលើក្រសួង
នៅថ្ងៃទី១៨ មីនានេះ ក្រសួងសុខាភិបាលបានរៀបចំសន្និបាតលើកទី៤៣ ដោយមានការចូលរួមផ្ទាល់ពីរដ្ឋមន្រ្តីលោកឈាង រ៉ា។ ថ្លែងនៅក្នុងសន្និសីទកាសែត រដ្ឋមន្ត្រីក្រសួងសុខាភិបាលកម្ពុជារូបនេះបានលើកឡើងថា ប្រព័ន្ធសុខាភិបាលកម្ពុជាអាចរីកចម្រើនទៅបាន មិនមែនអាស្រ័យតែលើក្រសួងសុខាភិបាលមួយប៉ុណ្ណោះទេ។ តាមលោកឈាង រ៉ា ប្រព័ន្ធសុខាភិបាលរីកចម្រើនទៅបាន ល្គឹកណាសង្គមកម្ពុជារីកចម្រើន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២១
ជំងឺឆ្លង ជំងឺរ៉ាំរ៉ៃ ជំងឺមហារីក និងសុខភាពកុមារនៅតែជាបញ្ហាប្រឈមចម្បងសម្រាប់វិស័យសុខាភិបាលកម្ពុជា។ នៅក្នុងន័យនេះ លោក ឈាង រ៉ាមិនបានបដិសេធ និងថែមទាំងទទួលស្គាល់ផងដែរថា សេវាថែទាំសុខភាពនៅកម្ពុជានៅមិនទាន់ទូលំទូលាយនៅឡើយ ពោលពលរដ្ឋនៅតាមបណ្តាខេត្តនៅពុំទាន់ទទួលបានសេវាសុខភាពពេញលេញ។ តាមលោក ឈាង រ៉ា ក្រុមគ្រូពេទ្យដល់ទៅ ៤០% កំពុងបម្រើវិជ្ជាជីវៈនៅទីក្រុងភ្នំពេញ ខណៈពលរដ្ឋរស់នៅភ្នំពេញវិញមានតែ ២៥% នៃពលរដ្ឋសរុប។
លោករដ្ឋមន្រ្តីបានលើកឡើងបន្ថែមថា កម្ពុជាកំពុងប្រឈមនឹងបញ្ហាហិរញ្ញប្បទាននៅក្នុងការអភិវឌ្ឍវិស័យសុខាភិបាល។ តាមលោកឈាង រ៉ា ការចូលរួមរបស់រដ្ឋ និងដៃគូអន្តរជាតិ រួមទាំងការចំណាយថែទាំព្យាបាលសុខភាពរបស់ពលរដ្ឋផ្ទាល់ គឺនៅមានកម្រិតនៅឡើយ។
រដ្ឋមន្ត្រីសុខាភិបាលរូបនេះដដែលមើលឃើញថា ប្រព័ន្ធសុខាភិបាលកម្ពុជាអាចរីកចម្រើនទៅបាន មិនមែនអាស្រ័យតែលើក្រសួងសុខាភិបាលមួយប៉ុណ្ណោះទេ។ តាមលោកឈាង រ៉ា វិស័យសុខាភិបាលត្រូវផ្សារភ្ជាប់ជាមួយការអភិវឌ្ឍសង្គម ពោលមិនអាចដើរលឿនជាងសង្គមបានឡើយ។
ទោះយ៉ាងណា លោក ឈាង រ៉ាបានអះអាងពីការធ្វើយ៉ាងណាឱ្យសេវាសុខាភិបាលកម្ពុជា ទាំងឯកជន និងសាធារណៈដើរទន្ទឹមគ្នា និងស្ថិតក្នុងនិយាមនៃការប្រតិបត្តិបានល្អក្នុងស្ថានភាពប្រទេសកម្ពុជាបច្ចុប្បន្ន។ ក្នុងរយៈពេល៦ខែចុងក្រោយនេះ ក្រសួងសុខាភិបាលបានពង្រឹងសមត្ថភាពមន្ត្រីជំនាញវេជ្ជសាស្រ្ត និងបច្ចេកទេស លើកកម្ពស់ក្រមសីលធម៌វិជ្ជាជីវៈគ្រូពេទ្យ និងបុគ្គលិកសុខាភិបាល ពន្លឿន និងពង្រឹងការចុះបញ្ជីផ្តល់អាជ្ញាបណ្ណអ្នកប្រកបវិជ្ជាជីវៈសុខាភិបាល និងលើកកម្ពស់សុខភាពសុខាភិបាលនៅមណ្ឌលសុខភាពជាដើម។ នេះជាការបញ្ជាក់របស់លោកឈាង រ៉ា។
គួរជម្រាបថា ក្នុងឆ្នាំ២០២៣ ក្រសួងសុខាភិបាលសម្រេចបិទទ្វារមន្ទីរពេទ្យឯកជនចំនួន៩៩ ក្នុងនោះ១៤ ដោយសារកំហុសធ្ងន់ធ្ងរ។ ទន្ទឹមគ្នានេះ ក្រុមហ៊ុននាំចូលថ្នាំ និងបរិក្ខារពេទ្យជាច្រើនក៏ត្រូវបានផ្អាក និងកែលម្អផងដែរ។ តាមរបាយការណ៍របស់ក្រសួងសុខាភិបាលដដែល គិតត្រឹមចុងឆ្នាំ២០២៣ កម្ពុជាមានមណ្ឌលសុខភាព១៣០៥ ប៉ុស្តិ៍សុខភាព១៣២ និងមន្ទីរពេទ្យបង្អែក១៣៣៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ