លោក ហ៊ុន ម៉ាណែត មិនជឿថាមន្ត្រីក្រសួងសេដ្ឋកិច្ចល្ងង់ទៅរិះគន់រឿងព្រែកជីកហ្វូណន
ឆ្លើយតបទៅនឹងការផ្សព្វផ្សាយរបស់វិទ្យុមួយ លោកនាយករដ្ឋមន្ត្រី ហ៊ុន ម៉ាណែត មិនជឿថាមានមន្ត្រីជាន់ខ្ពស់ក្រសួងសេដ្ឋកិច្ចកម្ពុជា ដែលមិនយល់ពីហេតុផលនៃការកសាងព្រែកជីកហ្វូណនទេ។ ការថ្លែងរបស់លោកនាយករដ្ឋមន្ត្រីដូច្នេះ ធ្វើឡើងអំឡុងពេលដែលលោកចុះពិនិត្យការសាងសង់ព្រលានយន្តហោះអន្តរជាតិតេជោ ស្ថិតនៅក្នុងស្រុកកណ្តាលស្ទឹង ខេត្តកណ្តាល នាថ្ងៃអង្គារ ទី១២ ខែមីនា ឆ្នាំ២០២៤នេះ។
ចុះផ្សាយនៅថ្ងៃ៖
ស្តាប់ - ០១:៥៩
ជាថ្មីម្តងទៀត លោកនាយករដ្ឋមន្ត្រី ហ៊ុន ម៉ាណែត បានហៅការផ្សាយរបស់វិទ្យុមួយដែលលោកមិនបញ្ចេញឈ្មោះថាទី១ ជាការលាបពណ៌ដល់មន្ត្រីរបស់លោក និងទី២ លោកមិនជឿថាមានមន្ត្រីក្រសួងសេដ្ឋកិច្ចដែលមិនយល់ហេតុផល ខណៈមានការលើកឡើងថាកម្ពុជាជំពាក់លុយគេវ័ណ្ឌក និងឥតប្រយោជន៍ពាក់ព័ន្ធនឹងការសាងសង់ព្រែកជីកហ្វូណន។
សូមរំលឹកថាកាលពីខែធ្នូ ឆ្នាំទៅ លោក គឹម សុខ អ្នកវិភាគនយោបាយ និងសង្គមនៅប្រទេសហ្វាំងឡង់ បានលើកឡើងថាកម្ពុជានឹងរងនូវការខាតបង់អធិបតេយ្យភាពជាមួយវៀតណាម។ តាមលោក គឹម សុខ កម្ពុជាក៏នឹងជាប់អន្ទាក់ជាមួយចិនដែរ ជុំវិញបំណុលដែលយកមកសាងសង់ព្រែកជីកនេះ ក្នុងនោះមានអន្ទាក់ភូមិសាស្ត្រនយោបាយ និងអន្ទាក់សេដ្ឋកិច្ចជាដើម។
ក៏ប៉ុន្តែលោក ហ៊ុន ម៉ាណែត ពន្យល់ថារដ្ឋាភិបាលកម្ពុជាមិនបានខ្ចីលុយគេមកធ្វើព្រែកជីកនេះទេ ពោលជាគម្រោង BOT ដែលក្រុមហ៊ុនឯកជនជាអ្នកខ្ចីហើយយកមកវិនិយោគជីកព្រែក ដើម្បីធ្វើអាជីវកម្មរកប្រាក់ចំណេញ ដូចជាករណីផ្លូវល្បឿនលឿន និងព្រលានយន្តហោះដែរ។
សូមបញ្ជាក់ថាគម្រោងព្រែកជីកហ្វូណនតេជោ នឹងត្រូវសាងសង់ឡើងរយៈពេល៤ឆ្នាំ ដោយក្រុមហ៊ុនសាជីវកម្មស្ពានថ្នល់ចិន។ ការសាងសង់នឹងចាប់ផ្តើមពីឆ្នាំ ២០២៤ និងចំណាយថវិកាចំនួន ១,៧ពាន់លានដុល្លារ។ គម្រោងនេះមានប្រវែង ១៨០គីឡូម៉ែត្រ ចាប់ពីព្រែកតាកែវ នៃទន្លេមេគង្គ ឆ្លងកាត់តាមព្រែកតាឯក ព្រែកតាហ៊ីងនៃទន្លេបាសាក់ ស្រុកកោះធំ និងបន្តរហូតដល់សមុទ្រខេត្តកែប ដោយឆ្លងកាត់ខេត្តចំនួន៤ គឺខេត្តកណ្តាល តាកែវ កំពត និងខេត្តកែប ដែលមានប្រជាជនសរុប ១,៦លាននាក់ រស់នៅអមសងខាងផ្លូវទឹកនេះ។
ជាមួយគ្នានេះ លោកនាយករដ្ឋមន្ត្រី ហ៊ុន ម៉ាណែត បានបញ្ជាក់បន្ថែមថា កម្ពុជានឹងទាញបាននូវសក្តានុពលធំធេងពីព្រែកជីកនេះ ដូចជាការធ្វើរោងចក្រ និងផ្តល់អត្ថប្រយោជន៍ដល់ប្រជាជនដែលរស់នៅតាមដងព្រែកជីក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ