សមត្ថកិច្ចចាប់បានគ្រឿងញៀនជិត៣តោន ក្នុងរយៈពេលមិនដល់១សប្តាហ៍
គ្រឿងញៀនសរុបជិត៣តោន ត្រូវសមត្ថកិច្ចបង្ក្រាបបាននៅតាមទីតាំងផ្សេងៗគ្នា ក្នុងរយៈពេលមិនដល់មួយសប្តាហ៍។ ជាការកត់សម្គាល់ ការបង្ក្រាបគ្រឿងញៀនដ៏ច្រើនសន្ធឹកសន្ធាប់នៅក្នុងរយៈពេលដ៏ខ្លីនេះបញ្ជាក់ពីករណីជួញដូរគ្រឿងញៀនទ្រង់ទ្រាយធំ ក្នុងនោះ សមត្ថកិច្ចរឹបអូសបាននៅខេត្តព្រះសីហនុចំនួនជាង ១,៥តោន និងនៅខេត្តព្រះវិហារបានជាង ១តោនផ្សេងទៀត។
ចុះផ្សាយនៅថ្ងៃ៖
ស្តាប់ - ០២:០៨
ការរឹបអូសបានគ្រឿងញៀនសរុបជិត ៣តោន ដោយប៉ូលីសប្រឆាំងគ្រឿងញៀន និងកងរាជអាវុធហត្ថក្នុងរយៈពេលដ៏ខ្លីជាករណីជួញដូរទ្រង់ទ្រាយធំទី១នៅឆ្នាំ២០២៤នេះ ដែលជនល្មើសបានដឹកតាមផ្លូវទឹកលើលំហសមុទ្រពីប្រទេសឡាវទៅកាន់កោះតៃវ៉ាន់ កាលពីថ្ងៃទី២២ ខែមករាកន្លងទៅ។ ជនបរទេសចំនួន៥នាក់ ក្នុងនោះមានចិនដីគោក២នាក់ តៃវ៉ាន់២នាក់ និងជនជាតិហ្វិលីពីន១នាក់ ត្រូវបានចាប់ខ្លួនជាមួយនឹងគ្រឿងញៀនជាង ១,៥តោន នៅខេត្តព្រះសីហនុក្នុងថ្ងៃទី២២ មករា។
ដោយឡែកកាលពីថ្ងៃទី២០ ខែមករា កងរាជអាវុធហត្ថខេត្តព្រះវិហារបានរឹបអូសគ្រឿងញៀនជាង១តោន ដែលជនល្មើសយកទៅប្លុងចោលក្នុងរថយន្តមួយគ្រឿងនៅក្នុងស្រុកជ័យសែន ខេត្តព្រះវិហារ។ តែមិនមានមេខ្លោងណាម្នាក់ត្រូវបានសមត្ថកិច្ចចាប់ខ្លួនបានភ្លាមៗទេ ពោលដោយបានត្រឹមបើកការស៊ើបអង្កេតបន្ទាន់ និងឃាត់ខ្លួនជនសង្ស័យដែលពាក់ព័ន្ធមួយចំនួន។ នេះបើតាមនាយឧត្តមសេនីយ៍ មាស វីរិទ្ធ អគ្គលេខាធិការអាជ្ញាធរជាតិប្រយុទ្ធប្រឆាំងគ្រឿងញៀន។
ករណីមួយនេះក៏ត្រូវបានសមត្ថកិច្ចបញ្ជាក់ថាជាការជួញដូរគ្រឿងញៀនទ្រង់ទ្រាយធំ ដែលមានប្រភពចេញពីប្រទេសឡាវដោយឆ្លងកាត់ខេត្តព្រះវិហាររបស់កម្ពុជាឆ្ពោះទៅកាន់គោលដៅផ្សេងៗ។ ទោះយ៉ាងណា សមត្ថកិច្ចនៅមិនទាន់បានកំណត់ថាតើករណីជួញដូរគ្រឿងញៀនទ្រង់ទ្រាយធំទាំងពីរនេះ មានជាប់ទាក់ទងគ្នា ឬអត់ទេ។
ក្រៅពីនេះ ក៏មានបទល្មើសជួញដូរគ្រឿងញៀនទ្រង់ទ្រាយតូច និងមធ្យមជាច្រើនករណីទៀត ដែលសរុបរួមទាំងពីរករណីធំៗខាងលើ មិនតិចជាង ៣តោនទេ នៅក្នុងរយៈពេលដ៏ខ្លី ក្រោមអាណត្តិរដ្ឋាភិបាលថ្មី។
តាមរបាយការណ៍របស់រដ្ឋាភិបាលកម្ពុជា ការអនុវត្តន៍យុទ្ធនាការប្រយុទ្ធប្រឆាំងគ្រឿងញៀនខុសច្បាប់ចំនួន៨លើកកន្លងទៅ ពោលចាប់ពីឆ្នាំ ២០១៧ ដល់ ២០២៣ មានបទល្មើសគ្រឿងញៀនសរុបជាង ៥៥ ០០០ករណី ត្រូវបានសមត្ថកិច្ចបង្ក្រាប ក្នុងនោះមានការឃាត់ខ្លួនជនសង្ស័យចំនួន ១២ម៉ឺននាក់ រឹបអូសបានសារធាតុញៀនគ្រប់ប្រភេទជាង២៧តោន និងសារធាតុគីមីផ្សំប្រមាណ ៥២០តោន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ