សមាគមកាត់ដេរអាមេរិក ជំរុញរដ្ឋាភិបាលកម្ពុជាបង្ក្រាបទីតាំងឡឥដ្ឋដែលរំលោភសិទ្ធិមនុស្ស និងបរិស្ថាន
សមាគមកាត់ដេរនិងស្បែកជើងអាមេរិក អំពាវនាវឱ្យរដ្ឋាភិបាលកម្ពុជាបិទទីតាំងសិប្បកម្មឡឥដ្ឋដែលរំលោភសិទ្ធិមនុស្ស និងយកកម្ទេចក្រណាត់ម៉ាកល្បីៗមកដុតបំផ្លាញ។ ការអំពាវនាវនេះ ធ្វើឡើងក្រោយអង្គការសង្គមស៊ីវិលក្នុងស្រុកចេញផ្សាយរបាយការណ៍ស្តីពីការរំលោភសិទ្ធិមនុស្សធ្ងន់ធ្ងរ និងផលប៉ះពាល់ដល់សុខភាពសហគមន៍រស់នៅក្បែរទីតាំងសិប្បកម្មពីការដុតសំណល់កម្ទេចក្រណាត់ដែលបានមកពីរោងចក្រ។
ចុះផ្សាយនៅថ្ងៃ៖
ស្តាប់ - ០២:៣៣
ក្នុងលិខិតផ្ញើមកលោកនាយករដ្ឋមន្ត្រីហ៊ុន ម៉ាណែត កាលពីថ្ងៃទី២១ ខែធ្នូ លោក Steve Lamar ប្រធានសមាគមកាត់ដេរ និងស្បែកជើងសហរដ្ឋអាមេរិក AAFA ជំរុញឱ្យរដ្ឋាភិបាលកម្ពុជាពិនិត្យករណីរំលោភសិទ្ធិមនុស្សតាមសិប្បកម្មឡឥដ្ឋ ដោយត្រូវអនុលោមតាមច្បាប់ការងារ និងផលប៉ះពាល់ដល់បរិស្ថាន។ លើសពីនេះ លោក Lamar ក៏ស្នើឱ្យរដ្ឋាភិបាលអន្តរាគមន៍ជុំវិញកម្មករជាប់កិច្ចសន្យា និងការកេងប្រវ័ញ្ចពលកម្មកុមារ រួមនឹងចាត់វិធានការករណីដុតក្រណាត់ចេញពីរោងចក្រដែលប៉ះពាល់ដល់សុខមាលភាពពលរដ្ឋរស់នៅក្បែរខាង។
ការដាក់លិខិតមកលោកហ៊ុន ម៉ាណែតនាពេលនេះ សមាគមកាត់ដេរ និងស្បែកជើងអាមេរិករំពឹងថា រដ្ឋាភិបាលកម្ពុជានឹងដោះស្រាយបញ្ហាខាងលើ និងជួយទប់ស្កាប់ការប្រើប្រាស់ផលិតផលក្រោមរូបភាពខុសច្បាប់ ឬការយកកាកសំណល់ផលិតផលក្រុមហ៊ុនល្បីៗមកប្រើប្រាស់ក្នុងសិប្បកម្មឡឥដ្ឋ។
គួរកត់សម្គាល់ដែរថា ការស្នើមករដ្ឋាភិបាលកម្ពុជាលើកនេះ មិនមែនមានតែសមាគមកាត់ដេរ និងស្បែកជើងសហរដ្ឋអាមេរិកតែឯងនោះទេ ពោលគឺមានការចូលរួមពីក្រុមហ៊ុនម៉ាកល្បីៗមួយចំនួនដូចជា ក្រុមហ៊ុនAdidas, Gap, Ralph Lauren, Under Armour។ ក៏មានដែរអង្គការអន្តរជាតិដូចជា អង្គការរួបរួមប្រឆាំងពលកម្មកុមារនិងពន្ធនាគារ និងអង្គការការពារបរិស្ថានអន្តរជាតិ។
សូមជម្រាបថា កាលពីថ្ងៃទី២០ ខែវិច្ឆិកាកន្លងទៅ អង្គការសម្ព័ន្ធខ្មែរជំរឿននិងការពារសិទ្ធិមនុស្សលីកាដូបានបង្ហាញនូវកម្រងរូបភាពនៃសំណល់រោងចក្រម៉ាកក្រុមហ៊ុនល្បីៗដែលត្រូវបានដុតនៅតាមសិប្បកម្មឡឥដ្ឋក្នុងប្រទេសកម្ពុជា។ តាមអង្គការលីកាដូ សំណល់រោងចក្ររបស់ក្រុមហ៊ុនអន្តរជាតិជាច្រើនបានរួមចំណែកបង្កហានិភ័យដល់សិទ្ធិមនុស្ស និងបរិស្ថាននៅក្នុងសិប្បកម្មផលិតឥដ្ឋ។
របាយការណ៍នោះបានកត់សម្គាល់ទៀតថា ការដុតសំណល់កម្ទេចក្រណាត់ចេញពីរោងចក្រនោះ បានបង្កផលប៉ះពាល់ដល់សុខភាពសហគមន៍នៅក្បែររោងចក្រ។ និងជាពិសេស កម្មករឡឥដ្ឋ និងកូនៗរបស់ពួកគេ ដែលបញ្ចាំខ្លួនដោះបំណុល បានប៉ះពាល់ផ្ទាល់ពីផ្សែងដែលឆេះដោយការដុតក្រណាត់ចេញពីរោងចក្រ។ ពួកគេភាគច្រើនកើតមានបញ្ហាប្រព័ន្ធដង្ហើម ឈឺក្បាល និងជម្ងឺជាច្រើនផ្សេងទៀត។
គួរបញ្ជាក់ថា សិប្បកម្មផលិតឥដ្ឋដែលកំពុងបន្តប្រើកម្ទេចក្រណាត់ក្នុងដំណើរការផលិតឥដ្ឋមានចំនួន៥កន្លែង ខណៈសិប្បកម្មផលិតឥដ្ឋចំនួន២ទីតាំងផ្សេងទៀតត្រូវបានបិទអាជីវកម្មជាអចិន្ត្រៃយ៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ