អ្នកប្រឆាំងត្រៀមបាតុកម្ម ពេលលោក ហ៊ុន ម៉ាណែត ទៅជប៉ុនខែនេះ
ដូចរាល់ដងដែរ ក្រុមសកម្មជននយោបាយប្រឆាំងនៅក្រៅប្រទេសបានត្រៀមលក្ខណៈរួចជាស្រេចដើម្បីធ្វើការប្រមូលផ្តុំគ្នាដែលពួកគេហៅថាជាមហាបាតុកម្មប្រឆាំងវត្តមានលោកនាយករដ្ឋមន្ត្រី ហ៊ុន ម៉ាណែត ដែលគ្រោងទៅដល់ប្រទេសជប៉ុននៅថ្ងៃទី១៦ខែធ្នូនេះ។ ជាបាតុកម្មដែលអ្នករៀបចំអះអាងថា ដើម្បីទាមទារឲ្យមានលទ្ធិប្រជាធិបតេយ្យពិតប្រាកដនៅកម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៩
លោក គង់ ជិ អតីតប្រធានគណបក្សភ្លើងទៀនខេត្តព្រះសីហនុ ដែលបានចុះចូលគណបក្សប្រជាជនកម្ពុជាមួយភ្លែតក៏រត់ចេញវិញ និងបានសិទ្ធិជ្រកកោននៅប្រទេសជប៉ុនបានអះអាងថា បាតុកម្មរបស់សកម្មជនខ្មែរនៅជប៉ុននឹងធ្វើឡើងនៅថ្ងៃទី១៧ធ្នូ មានអ្នកចូលរួមខ្ទង់៣០០នាក់ គឺបន្ទាប់ពីលោក ហ៊ុន ម៉ាណែត ទៅដល់បានមួយថ្ងៃ។ ជាបាតុកម្មដែលធ្វើឡើងនៅថ្ងៃអាទិត្យប្រឆាំងវត្តមាននាយករដ្ឋមន្ត្រីកម្ពុជា ដែលក្រុមអ្នកប្រឆាំងចាត់ទុកថា កើតឡើងតាមរយៈការបោះឆ្នោតក្លែងក្លាយ។
ក៏ប៉ុន្តែចាប់តាំងពីពេលនេះទៅហើយគេក៏ឃើញមានសកម្មជនមួយចំនួនដែលគាំទ្ររដ្ឋាភិបាល បានចេញមុខផលិតវីដេអូខ្លីៗប្រកាសស្វាគមន៍វត្តមានលោក ហ៊ុន ម៉ាណែត រួចទៅហើយ។ សកម្មជនទាំងនោះ មានខ្លះជានិស្សិតដែលទៅសិក្សានៅទីនោះ និងខ្លះជាពលរដ្ឋខ្មែរដែលរស់នៅជប៉ុន។
តាមគម្រោង លោក ហ៊ុន ម៉ាណែត នាយករដ្ឋមន្ត្រីកម្ពុជា នឹងដឹកនាំប្រតិភូកម្ពុជាទៅចូលរួមកិច្ចប្រជុំកំពូលរំព្ញកខួបអនុស្សាវរីយ៍អាស៊ាន-ជប៉ុន ខួបទី៥០ឆ្នាំ នៃមិត្តភាព និងកិច្ចសហប្រតិបត្តិការ អាស៊ាន-ជប៉ុន នៅក្នុងទីក្រុងតូក្យូ នាពាក់កណ្តាលខែធ្នូនេះ។
ចាប់តាំងពីឡើងកាន់តំណែងជានាយករដ្ឋមន្ត្រីបានជាង១០០ថ្ងៃមក លោក ហ៊ុន ម៉ាណែត បានធ្វើដំណើរទៅកាន់ប្រទេសចិនបាន២ដងហើយក្នុងរយៈប្រមាណ២ខែ ប៉ុណ្ណោះ សហរដ្ឋអាមេរិក១ដង ដើម្បីចូលប្រជុំអង្គការសហប្រជាជាតិ និងទៅកាន់ឥណ្ឌូនេស៊ីដើម្បីចូលរួមប្រជុំកំពូលអាស៊ាននៅដើមខែកញ្ញា បន្ទាប់មកទៅអារ៉ាប៊ី សាអូឌីត នៅខែតុលា។ ទាំងទៅចិន ទៅឥណ្ឌូនេស៊ី និងអារ៉ាប៊ី សាអូឌីត គឺមិនមានបាតុកម្មប្រឆាំងឡើយ តែនៅសហរដ្ឋអាមេរិក គឺមានទាំងបាតុកម្មប្រឆាំង និងអ្នកមកគាំទ្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ