ថៃប្តូរយុទ្ធសាស្ត្រចរចាជាមួយកម្ពុជាលើតំបន់ប្រេងត្រួតស៊ីគ្នាក្នុងដែនសមុទ្រ
រដ្ឋាភិបាលថៃ ក្រោមការដឹកនាំរបស់នាយករដ្ឋមន្ត្រីថ្មីគឺ លោក សេដ្ឋា ថៈវីស៊ីន នឹងប្តូរយុទ្ធសាស្ត្រចរចាជាមួយកម្ពុជាលើតំបន់ទាមទារត្រួតស៊ីគ្នានៅក្នុងឈូងសមុទ្រថៃ។ នេះបើតាមការចុះផ្សាយរបស់កាសែតថៃ PBS នៅថ្ងៃទី៣០ ខែតុលា ឆ្នាំ២០២៣ និងឱ្យដឹងទៀតថា យុទ្ធសាស្ត្រចរចានោះ រដ្ឋាភិបាលថៃនឹងផ្តោត សំខាន់លើការអភិវឌ្ឍន៍ធនធានធម្មជាតិរួមគ្នាជាមួយកម្ពុជា ជំនួសឱ្យការកំណត់ដែនសមុទ្រ។
ចុះផ្សាយនៅថ្ងៃ៖
ស្តាប់ - ០២:២៤
ជាថ្មីម្តងទៀត រដ្ឋាភិបាលថៃបានបង្ហាញចេទនាទាញកម្ពុជាឱ្យចូលតុពិភាក្សាការអភិវឌ្ឍន៍ក្នុងតំបន់ត្រួតស៊ីគ្នាក្នុងឈូងសមុទ្រថៃ។ តាមការចុះផ្សាយរបស់កាសែតអនឡាញរដ្ឋថៃជាភាសាអង់គ្លេសឈ្មោះ Thai PBS World ចុះផ្សាយនៅថ្ងៃទី៣០តុលាម្សិលមិញ រដ្ឋមន្ត្រីថាមពលថៃ លោក Pirapan Salirathavibhaga លើកឡើងថា រដ្ឋាភិបាលថៃនឹងប្តូរយុទ្ធសាស្ត្រលើការអភិវឌ្ឍន៍ធនធានប្រេងរួមគ្នា ជំនួសឱ្យការកំណត់ព្រំដែនសមុទ្រជាមួយកម្ពុជា។ ទន្ទឹមគ្នានោះ គណៈកម្មការថ្មីមួយនឹងត្រូវបង្កើតឡើងជាចាំបាច់ ដើម្បីជម្រុញកិច្ចចរចានេះ។
រដ្ឋមន្ត្រីក្រសួងថាមពលថៃបានទទួលស្គាល់ផងដែរថា ការដោះស្រាយវិវាទដែនដីនៅត្រង់ដែនសមុទ្រ គឺជារឿងស្មុគ្រស្មាញ លំបាក និងត្រូវការពេលវេលាយូរ ព្រោះថាគ្មានប្រទេសណាអាចទទួលយកការរំកិលព្រំដែនរបស់ខ្លួនថយក្រោយដោយងាយ មិនថាថៃរឺកម្ពុជា។
នេះគឺជាការកែប្រែយុទ្ធសាស្ត្រចរចាជាមួយកម្ពុជារបស់ថៃ ក្រោមការដឹកនាំរបស់នាយករដ្ឋមន្ត្រីថ្មី លោក សេដ្ឋា ថៈវីស៊ីន ខណៈកន្លងមក ថៃធ្លាប់ប្រកាន់យកនូវការកំណត់ការបោះបង្គោលព្រំដែនសមុទ្រជាមួយកម្ពុជា។
គួរដឹងថា កិច្ចចរចាការអភិវឌ្ឍប្រេងនិងឧស្ម័នរវាងកម្ពុជា-ថៃ នៅតំបន់ត្រួតស៊ីគ្នានៅឈូងសមុទ្រ បានជាប់គាំងជាង២០មកហើយ។ តំបន់ទាមទារត្រួតស៊ីគ្នា(OCA)នោះ មានទំហំ ២៦,០០០ គីឡូម៉ែត្រការ៉េដែលគេប៉ាន់ប្រមាណថា នឹងអាចស្តុកទុកប្រេងនិងឧស្ម័នរហូតដល់ ៥០០លានបារ៉ែលនៅក្រោមបាតសមុទ្រ និងដោយត្រូវការពេលយ៉ាងហោចណាស់៨ឆ្នាំ ក្នុងការទាញយកធនធានធម្មជាតិចេញពីឈូងសមុទ្រនោះ។
គួររំព្ញកថា សិទ្ធិអភិវឌ្ឍន៍លើតំបន់ទាមទារត្រួតស៊ីគ្នាក្នុងឈូងសមុទ្រថៃ គឺជាចំណុចនៃជម្លោះរវាងប្រទេសជិតខាងថៃនិងកម្ពុជា ដែលបានទាមទារតំបន់នេះតាំងពីដើមទសវត្ស ១៩៧០មក។ រដ្ឋាភិបាលនៃប្រទេសទាំងពីរបានចុះហត្ថលេខាលើអនុស្សាររណៈយោគយល់ កិច្ចចរចាអភិវឌ្ឍប្រេងនិងឧស្ម័ននៅតំបន់នោះ តាំងពីខែមិថុនាឆ្នាំ២០០១ ក៏ប៉ុន្តែត្រូវបានផ្អាកនៅក្នុងអន្តរកាលប្តូរនាយករដ្ឋមន្ត្រីថៃ កាលពីឆ្នាំ២០០៩។ កិច្ចពិភាក្សាគ្នារវាងប្រទេសទាំង២ក៏ធ្លាប់ចង់គូសវាសឡើងវិញដែរ តែត្រូវបង្អាក់ដោយសារវិបត្តិជំងឺកូវីដ១៩ កាលពីចុងឆ្នាំ២០១៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ