សហជីពស្នើឲ្យរដ្ឋាភិបាលតម្លើងប្រាក់ឈ្នួលកម្មករឡើងវិញ ២១៣ដុល្លារ
សង្គមស៊ីវិលដែលធ្វើការពាក់ព័ន្ធនឹងវិស័យការងារចំនួន១៣ នៅថ្ងៃទី២៩ ខែកញ្ញានេះ បានចេញសេចក្តីថ្លែងការណ៍រួមមួយដោយសម្តែងការខកចិត្តចំពោះនិយោជកនៃវិស័យវាយនភណ្ឌ កាត់ដេរ ផលិតស្បែកជើង និងផលិតផលធ្វើដំណើរ ដែលបានបដិសេធការស្នើសុំតម្លើងប្រាក់ឈ្នួលអប្បបរមា ២១៣ដុល្លារដល់កម្មករនិយោជិតសម្រាប់ឆ្នាំ២០១៤។ ការបង្ហាញពីការមិនសប្បាយចិត្តរបស់ក្រុមសហជីពដូច្នេះ ធ្វើឡើងក្រោយកិច្ចប្រជុំត្រីភាគីបានសម្រេចតម្លើងឲ្យកម្មករ ២០៤ដុល្លារកាលពីថ្ងៃព្រហស្បតិ៍។
ចុះផ្សាយនៅថ្ងៃ៖
ស្តាប់ - ០២:២៧
មួយថ្ងៃក្រោយការសម្រេចរបស់ក្រុមប្រឹក្សាជាតិប្រាក់ឈ្នួលអប្បបរមាថាតម្លើងប្រាក់ឈ្នួលអប្បបរមាដល់កម្មករនិយោជិតវិស័យវាយនភណ្ឌ កាត់ដេរ ផលិតស្បែកជើង និងផលិតផលធ្វើដំណើរចំនួន ២០៤ដុល្លារ នៅឆ្នាំ២០២៤ ក្រុមសហជីពចំនួន១៣ បានសម្តែងនូវការខកចិត្តយ៉ាងខ្លាំង។ ខកចិត្តដោយសារនិយោជកមិនអាចបំពេញតាមការទាមទាររបស់កម្មករនិយោជិត ដែលបានស្នើសុំតម្លើងប្រាក់ឈ្នួល២១៣ដុល្លារ។
សេចក្តីថ្លែងការណ៍រួមរបស់សហជីពបានលើកឡើងពីទឡ្ហីករណ៍ និងអំណះអំណាងដោយផ្អែកលើការស្រាវជ្រាវលើលក្ខណៈវិនិច្ឆ័យផ្នែកសេដ្ឋកិច្ច និងសង្គមទាំង៧ចំនុច ដែលថាកម្មករពិតជាមានការថយចុះចំណូល ហើយកើនឡើងចំណាយ និងបំណុល នៅក្រោយវិបត្តិកូវីដ-១៩។ មួយវិញទៀតចំណូលបន្ថែមរបស់កម្មករដូចជាការបន្ថែមម៉ោងត្រូវបានថយចុះ ខណៈចំណាយក្នុងការរស់នៅមានការកើនឡើងដោយសារអតិផរណា។ នេះបើតាមសេចក្តីថ្លែងការណ៍រួម។
ប្រឈមនឹងបញ្ហាសេដ្ឋកិច្ច កម្មករនិយោជិតមានការធ្លាក់ចុះដូច្នេះ ក្រុមសហជីពក៏បានដាក់សំណើរទៅរដ្ឋាភិបាលឲ្យមានការពិចារណាលើចំណុចសំខាន់ៗចំនួ១៦ ដែលរួមមានការស្នើឡើងវិញតម្លើងប្រាក់ឈ្នួលអប្បបរមា ២១៣ដុល្លារ នៅឆ្នាំ២០២៤ និងពិចារណារយៈពេលខ្លីសម្រាប់ការតម្លើងប្រាក់ឈ្នួលចន្លោះពី៣០០ដុល្លារ ដល់៥០០ដុល្លារ សម្រាប់រយៈពេលវែង។
ក្រៅពីនេះ ក៏មានសំណើរជាច្រើនទៀតសម្រាប់កម្មករនិយោជិតដូចជាសុំថ្លៃបាយថ្ងៃត្រង់១ដុល្លារ បង្ហាញកម្រិតចំណេញរបស់និយោជកដោយតម្លាភាព កាត់បន្ថយអតិផរណាផ្នែកចំណីអាហារ ថ្លៃសាំង អនុវត្តច្បាប់ឲ្យម៉ឺងម៉ាត់លើផ្ទះជួល ដាក់ចេញនូវវិធានការបន្ទាន់ក្នុងការពិនិត្យ និងពិចារណាក្នុងការទម្លាក់ថវិកាជាតិ ដើម្បីសម្រួលលក្ខខណ្ឌបំណុលដូចជាពន្យាការបង់ប្រាក់ដើម និងការប្រាក់ បញ្ចុះតម្លៃទឹកភ្លើង ជួយតម្លើងប្រាក់មធ្យោបាយធ្វើដំណើរ និងចំណុចសំខាន់ៗមួយចំនួនទៀត។
សូមរំលឹកថា កាលពីថ្ងៃព្រហស្បតិ៍កិច្ចប្រជុំត្រីភាគីបានប្រកាសថាប្រាក់ឈ្នួលកម្មករនិយោជកនៃវិស័យកាត់ដេរបានឡើង២ដុល្លារ បូកនឹង២ដុល្លារបន្ថែមដោយលោក ហ៊ុន ម៉ាណែត មានន័យថាឡើងបាន៤ដុល្លារពីលើប្រាក់ឈ្នួលអប្បបរមាឆ្នាំចាស់ ២០០ដុល្លារ។
ទម្រាំបានឡើង២ដុល្លារពីនិយោជក ភាគីពាក់ព័ន្ធបានឆ្លងកាត់ការចរចាជាច្រើនជុំប្រកបដោយភាពតានតឹង ដោយសារភាគីនិយោជកតែងមានការត្អូញត្អែរថាខ្លួនក៏រងនូវវិបត្តសេដ្ឋកិច្ចក្រោយកូវីដ-១៩ និងវិបត្តសេដ្ឋកិច្ចពិភពលោកផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ