របាយការណ៍ ៖ ម៉ាកសម្លៀកបំពាក់ល្បីៗជំពាក់ប្រាក់កម្មកររាប់លានដុល្លារ អំឡុងពេលកូវីដ១៩
ម៉ាកសម្លៀកបំពាក់ល្បីៗចំនួន៦ ជំពាក់ប្រាក់កម្មករកម្ពុជាទាំងប្រាក់ឈ្នួលនិងប្រាក់បំណាច់បញ្ចប់កិច្ចសន្យាប្រមាណជាង៣០០លានដុល្លារ (៣៤២.៥) នៅរវាងឆ្នាំ២០២១-២០២២ ក្នុងអំឡុងវិបត្តិកូវីដ១៩។
ចុះផ្សាយនៅថ្ងៃ៖
ស្តាប់ - ០៣:៥០
តួលេខនេះ គឺផ្អែកតាមការស្រាវជ្រាវក្នុងយុទ្ធនាការសម្លៀកបំពាក់ស្អាត(Clean Clothes Campaign)របស់អង្គការសង់ត្រាល់ សហព័ន្ធសហជីពប្រជាធិបតេយ្យកម្មករកាត់ដេរកម្ពុជា និងសហព័ន្ធសហជីពកម្មករកម្ពុជានាពេលថ្មីៗនេះក្រោមចំណងជើងថា សម្ពាធក្រោមថ្នេរក្រណាត់ស្ដីពីការបាត់បង់ប្រាក់ឈ្នួលក្នុងវិស័យវាយនភណ្ឌកាត់ដេរកម្ពុជា។
ក្រុមហ៊ុនសកលទាំង៦នោះ រួមមាន៖Adidas ក្នុងទឹកប្រាក់ប៉ាន់ប្រមាណ១១,៧លាន Nike ក្នុងទឹកប្រាក់ប៉ាន់ប្រមាណ៧,៥លាន Target USA ក្នុងទឹកប្រាក់ប៉ាន់ប្រមាណ៧,៦លាន GAP ក្នុងទឹកប្រាក់ប៉ាន់ប្រមាណ៦,៧លាន Puma ក្នុងទឹកប្រាក់ប៉ាន់ប្រមាណ៥,៩លាន Levi Strauss ក្នុងទឹកប្រាក់ប៉ាន់ប្រមាណ៣,៩លាន។
នៅក្នុងរបាយការណ៍ស្រាវជ្រាវកម្រាសជិត២០ទំព័រ ក្រុមអ្នកចង់ក្រងបានគូសបញ្ជក់ថា ការស្រាវជ្រាវរបស់ខ្លួន គឺយោងទៅលើការអង្កេត និងប្រមូលទិន្នន័យជាមួយកម្មកររោងចក្រកាត់ដេរចំនួន៣០៨នាក់ ដែល៦៥ភាគរយ គឺជាស្ត្រី។ ពុំតែប៉ុណ្ណោះគេបានផ្ទៀងផ្ទាត់ជាមួយឯកសារផ្សេងទៀតដូចជា៖ បណ្ណបើកប្រាក់ឈ្នួលចេញដោយរោងចក្រ ទិន្ន័យបញ្ជូនទំនិញ និងទិន្នន័យនាំចេញព្រមទាំងឯកសារពាក់ព័ន្ធនិងឯកសារមានស្រាប់មួយចំនួន។
ជាលទ្ធផលការស្រាវជ្រាវខាងលើនេះ បានរកឃើញចំណុច៣ ដែលបញ្ជាក់ថា ម៉ាកសម្លៀកបំពាក់ល្បីៗចំនួន៦ ជំពាក់ប្រាក់កម្មករកម្ពុជាទាំងប្រាក់ឈ្នួលនិងប្រាក់បំណាច់បញ្ចប់កិច្ចសន្យាប្រមាណ៣៤២.៥លានដុល្លារ គឺទី១-ប្រាក់ឈ្នួលធ្លាក់ចុះ ទី២-ប្រព័ន្ធដែលពឹងផ្អែកលើការងារថែមម៉ោង ឬប្រាក់ថែមម៉ោងមានការធ្លាក់ចុះ៦០ភាគរយនៅរវាងឆ្នាំ២០២០-២០២៣ ទី៣-ការកើនឡើងបំណុល។
កម្មករ៩១ភាគរយបានឲ្យដឹងថា កំពុងជំពាក់បំណុលយ៉ាងហោចចំនួនមួយបំណុល នៅពេលបច្ចុប្បន្ន និង៧០ភាគរយផ្សេងទៀតថា ការរាតត្បាតនៃជម្ងឺកូវីដ១៩ ជាហេតុផលមួយទៀត ដែលធ្វើឲ្យបំណុលកើនឡើង។ ការកើនឡើងនៃចំណាយរស់នៅប្រចាំថ្ងៃ បានបង្ខំឲ្យកម្មករទៅរកប្រាក់កម្ចីដែលមានអត្រាការប្រាក់ខ្ពស់រហូតដល់២០ភាគរយ ហើយកម្មករមួយចំនួនបានបញ្ជាក់ពីនិន្នាការថ្មីមួយដែលគួរបារម្ភគឺការខ្ចីប្រាក់ពីប្រធានក្រុមនៅក្នុងរោងចក្រ។ បញ្ហាទាំងនេះកើតឡើងដោយសាររោងចក្រជាច្រើនព្យួរកិច្ចសន្យាការងារក្នុងអំឡុងពេលបិទខ្ទប់ដោយជំងឺកូវីដ១៩ ដែលធ្វើឲ្យប្រាក់ឈ្នួល និងការងារថែមម៉ោងធ្លាក់ចុះចាប់ពីឆ្នាំ២០២០ ហើយថ្លៃចំណាយសម្រាប់ការរស់នៅប្រចាំថ្ងៃបែរជាកើនឡើង។
ក្រុមអ្នកស្រាវជ្រាវបានស្រង់សំដីកម្មករ ដែលអំពាវនាវឲ្យមានកំណែទម្រង់វិស័យឧស្សាហកម្មជាបន្ទាន់ ដោយសំដៅដល់ក្រុមហ៊ុនម៉ាកល្បីៗទាំង៦។ ចំណុចមួយក្នុងចំណោមចំណុចទាំង៥ ដែលគេចង់ឃើញបំផុតនោះ គឺការដោះស្រាយវិវាទស្ដីពីការលួចប្រាក់ឈ្នួល និងប្រាក់បំណាច់ក្នុងសង្វាក់ផ្គត់ផ្គង់ជាបន្ទាន់ ដើម្បីឲ្យកម្មករកាត់ដេរទទួលបានប្រាក់ឈ្នួល ប្រាក់បំណាច់បញ្ចប់កិច្ចសន្យា និងអត្ថប្រយោជន៍ផ្សេងៗតាមច្បាប់។
ដំណោះស្រាយដែលគេចង់បានពីរដ្ឋាភិបាលអូស្ត្រាលី សហភាពអឺរ៉ុប និងអាមេរិក គឺអឺរ៉ុបគួរបង្កើតឲ្យមានលិខិតបទដ្ឋានគតិយុត្តិដាច់ដោយឡែក ដើម្បីហាមឃាត់ការប្រើប្រាស់ការធ្វើប្រតិបត្តិការពាណិជ្ជកម្មមិនយុត្តិធម៌ក្នុងវិស័យវាយនភណ្ឌ និងសម្លៀកបំពាក់។ មានន័យថា ការបង់ប្រាក់យឺតយ៉ាវ ឬការលុបចោលការបញ្ជាទិញប្រញាប់ប្រញាល់ ត្រូវចាត់ទុកជាទង្វើខុសច្បាប់។ នេះជាចំណុចមួយក្នុងចំណោមសំណូមពរទាំង៥ ដែលក្រុមអ្នកស្រាវជ្រាវចង់បានពីអូស្ត្រាលី សហភាពអឺរ៉ុប និងអាមេរិក។
ជុំវិញរបាយការណ៍នេះ គឺមិនទាន់មានការឆ្លើយតបពីក្រសួងការងារកម្ពុជា និងក្រុមហ៊ុនបញ្ជាទិញទាំង៦នៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ