វិស័យឯកជន៖ គោលនយោបាយបញ្ចុះតម្លៃអគ្គិសនីមានលក្ខណៈរឹតត្បិត
វិស័យឯកជន ដែលគ្របដណ្តប់រោងចក្រកាត់ដេរ ផលិតស្បែកជើង និងសម្ភារៈធ្វើដំណើរនៅទូទាំងប្រទេសកម្ពុជាបានថ្លែងអំណរគុណដល់រដ្ឋាភិបាល ដែលបានគិតគូរបញ្ចុះថ្លៃអគ្គិសនី ដែលគោលនយោបាយនេះរួមចំណែកជួយគាំទ្រដល់វិស័យឧស្សាហកម្ម។ យន្តការនេះ បានធ្វើឡើង១ថ្ងៃក្រោយបទបញ្ជារបស់លោកនាយករដ្ឋមន្ត្រី ហ៊ុន ម៉ាណែត ឲ្យចាប់ផ្តើមបញ្ចុះតម្លៃអគ្គិសនីដល់សហគ្រាសជាង២ម៉ឺន តាមកំរិតណាមួយចាប់ពីខែតុលាខាងមុខ។
ចុះផ្សាយនៅថ្ងៃ៖
ស្តាប់ - ០២:៥៨
ទន្ទឹមគ្នានឹងការថ្លែងអំណរគុណដល់រដ្ឋាភិបាល ដែលបានគិតគូរបញ្ចុះតម្លៃអគ្គិសនី លោក កាំង ម៉ូនីកា អគ្គលេខាធិការរងសមាគមវាយនភណ្ឌសម្លៀកបំពាក់ ស្បែកជើង និងទំនិញធ្វើដំណើរនៅកម្ពុជា(TAFTAC) បានលើកឡើងថា គោលនយោបាយបញ្ចុះតម្លៃអគ្គិសនីនេះ មានលក្ខណៈរឹតត្បិត ដែលរោងចក្រជាច្រើននឹងទទួលបានផលប្រយោជន៍តិចតួច ឬមិនអាចទទួលបានតែម្តង ដោយសារតែការបញ្ចុះតម្លៃមិនបានអនុវត្តលើបរិមាណថាមពលអគ្គិសនីសរុប ដែលបានប្រើប្រាស់នោះទេ។
ផ្ទុយទៅវិញ ការបញ្ចុះថ្លៃនេះអនុវត្តចំពោះតែបរិមាណ ដែលប្រើប្រាស់លើសមធ្យមភាគប្រចាំខែនៃការប្រើប្រាស់៦ខែ ចុងក្រោយតែប៉ុណ្ណោះ។ ជាងនេះទៀត ការអនុវត្តគោលនយោបាយនេះ មានរយៈពេលខ្លី ហើយអ្នកប្រើប្រាស់ ត្រូវឆ្លងកាត់ការដាក់ពាក្យស្នើសុំដាច់ដោយឡែករៀងៗខ្លួនទៅអ្នកផ្គត់ផ្គង់អគ្គិសនីក្នុងតំបន់របស់ខ្លួន។
ការលើកឡើងរបស់លោក កាំង ម៉ូនីកា ធ្វើឡើងក្រោយក្រសួងរ៉ែ និងថាមពល បានចេញសេចក្តីប្រកាសព័ត៌មានមួយកាលពីថ្ងៃពុធ ដោយមានលក្ខខណ្ឌចំនួន៤ចំណុច នោះគឺទី១ បញ្ចុះអត្រាថ្លៃចំនួន១០% សម្រាប់បរិមាណថាមពលដែលប្រើប្រាស់លើសមធ្យមភាគប្រចាំខែពីថ្ងៃចន្ទ ដល់ថ្ងៃសៅរ៍ចន្លោះម៉ោងពី៧ព្រឹក ដល់៩យប់។ ទី២ គឺបញ្ចុះអត្រាថ្លៃ២០% សម្រាប់បរិមាណថាមពលដែលប្រើប្រាស់លើសមធ្យមភាគប្រចាំខែ ពីថ្ងៃចន្ទដល់ថ្ងៃសៅរ៍ចន្លោះម៉ោងពី៩យប់ ដល់ម៉ោង ៧ព្រឹក និង២៤ម៉ោងសម្រាប់ថ្ងៃអាទិត្យ និងថ្ងៃបុណ្យជាតិ។
ទី៣ គឺរយៈពេលអនុគ្រោះថ្លៃ ដើម្បីលើកទឹកចិត្តឲ្យបង្កើនការប្រើប្រាស់ខាងលើមានរយៈពេល៣ខែ ចាប់ពីខែតុលា ដល់ខែធ្នូ ឆ្នាំ២០២៣ និងអាចពិនិត្យបន្តតាមរយៈការជូនដំណឹងមុន៣០ថ្ងៃ តាមលទ្ធភាពជាក់ស្តែងរបស់អគ្គិសនីកម្ពុជា។ និងចុងក្រោយគឺ អតិថិជនអ្នកប្រើប្រាស់អគ្គិសនីប្រភេទឧស្សាហកម្ម និងកសិកម្ម ភ្ជាប់ពីបណ្តាញតង់ស្យុងមធ្យម និងតង់ស្យុងខ្ពស់ ដែលយល់ថាខ្លួនមានលទ្ធភាពបង្កើនការប្រើប្រាស់ និងមានបំណងទទួលបានការអនុគ្រោះថ្ងៃនេះ ត្រូវធ្វើការដាក់ពាក្យស្នើសុំទៅអ្នកផ្គត់ផ្គង់អគ្គិសនីក្នុងតំបន់របស់ខ្លួន។
ក៏ប៉ុន្តែលោក កាំង ម៉ូនីកា យល់ឃើញថាមានតែការបញ្ចុះជាទូទៅលើបរិមាណប្រើប្រាស់សរុបតែប៉ុណ្ណោះទើបអាចផ្តល់នូវការគាំទ្រដល់គ្រប់រោងចក្រ សហគ្រាស ដែលកំពុងរងនូវការថយចុះផលិតកម្ម។ លោកបញ្ជាក់ថា លុះត្រាតែមានការបញ្ជាទិញថែមប៉ុណ្ណោះ ទើបរោងចក្រអាចបង្កើនការប្រើប្រាស់។ ក្នុងករណីពុំមានការកើនឡើងនៃការបញ្ជាទិញ រោងចក្រនឹងមិនអាចបង្កើនសកម្មភាពផលិត ហើយប្រើប្រាស់អគ្គិសនីបន្ថែមឱ្យលើសពីមធ្យមភាគនៃការប្រើប្រាស់ ៦ខែកន្លងទៅនោះទេ។
តាមលោក ម៉ូនីកា រដ្ឋាភិបាលគួរពិចារណាផ្តល់ការគាំទ្របន្ថែម ដែលមានលក្ខណៈទូលំទូលាយ ផ្តល់លទ្ធភាពឱ្យគ្រប់រោងចក្រ សហគ្រាស អាចទទួលបាននូវផលប្រយោជន៍ពីគោលនយោបាយបញ្ចុះថ្លៃអគ្គិសនីនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ