សហគ្រាសជាង២ម៉ឺន នឹងទទួលបានការចុះតម្លៃអគ្គិសនីចាប់ពីខែតុលាទៅ
សហគ្រាសនៃវិស័យឯកជនជាង២ម៉ឺន នឹងទទួលបានការបញ្ចុះតម្លៃអគ្គិសនីក្នុងកំរិតណាមួយ ដែលនឹងចាប់ផ្តើមនៅខែក្រោយនេះ។ នេះបើតាមការបញ្ជាក់ពីលោកនាយករដ្ឋមន្ត្រី ហ៊ុន ម៉ាណែត នៅក្នុងឱកាសនៃពិធីជួបសំណេះសំណាលជាមួយកម្មករនិយោជិតនៅស្រុកបាទី ខេត្តតាកែវជិត២ម៉ឺននាក់ នាព្រឹកថ្ងៃអង្គារនេះ។ វិស័យឯកជនបានសម្តែងនូវការសាទរចំពោះចំណាត់ការនេះ។
ចុះផ្សាយនៅថ្ងៃ៖
ស្តាប់ - ០១:៥៨
នៅចំពោះមុខកម្មករនិយោជិតជិត២ម៉ឺននាក់ លោកនាយករដ្ឋមន្ត្រី ហ៊ុន ម៉ាណែត បានប្រាប់ទៅលោក កែវ រតនៈ រដ្ឋមន្ត្រីក្រសួងរ៉ែ និងថាមពល ឲ្យចាប់ផ្តើមធ្វើការបញ្ចុះតម្លៃអគ្គិសនីកំរិតណាមួយភ្លាមៗ ចាប់ពីខែតុលា ខាងមុខនេះ ដល់សហគ្រាសចំនួនជាង ២១ ០០០ នៅក្នុងប្រទេសកម្ពុជា។
ការបញ្ចុះតម្លៃអគ្គិសនីនេះ គឺជាការជួយដល់រោងចក្រសហគ្រាសនៅក្នុងវិស័យឧស្សាហកម្ម និងកសិកម្មដែលមានការផលិតច្រើន ក្នុងការបង្កើនអត្ថប្រយោជន៍ផ្សេងៗដល់កម្មករនិយោជិត ជាពិសេសការតម្លើងប្រាក់ឈ្នួលអប្បបរមារបស់កម្មករនិយោជិត។ នេះបើតាម លោក ហ៊ុន ម៉ាណែត។ លោកបន្ថែមថារដ្ឋាភិបាលនឹងពិនិត្យមើលក្នុងការជួយដល់សហគ្រាសបន្ថែមទៀតប្រសិនបើរយៈពេល៣ខែខាងមុខនេះដំណើរការទៅបានល្អ។
ពាក់ព័ន្ធនឹងចំណាត់ការរបស់ប្រមុខរដ្ឋាភិបាលដូច្នេះ លោក កាំង ម៉ូនីកា អគ្គលេខាធិការរងសមាគមវាយនភណ្ឌសម្លៀកបំពាក់ ស្បែកជើង និងទំនិញធ្វើដំណើរនៅកម្ពុជា(TAFTAC) យល់ឃើញថា សមាគមសង្ឃឹមថាក្រសួងរ៉ែ និងថាមពល នឹងចាត់វិធានការយ៉ាងឆាប់រហ័ស ក្រោមការណែនាំរបស់នាយករដ្ឋមន្ត្រី ដើម្បីជួយដល់វិស័យឧស្សាហកម្មជាទូទៅ ជាពិសេសវិស័យវាយនភណ្ឌ កាត់ដេរ ផលិតវស្បែកជើង និងទំនិញធ្វើដំណើរ។
លោកថា ក្នុងនាមជាវិស័យផលិតកម្ម ដែលបានចុះកិច្ចសន្យាចំណាយលើការផលិតគឺជាគន្លឹះនៃការប្រកួតប្រជែង ដូច្នេះអ្វីដែលអាចរួមចំណែកដល់ការកាត់បន្ថយការចំណាយពិតជាមានសារៈសំខាន់យ៉ាងខ្លាំង។ ជាការពិតការបញ្ចុះតម្លៃអគ្គិសនីកាន់តែច្រើនកាន់តែប្រសើរ ដោយសារតម្លៃពលកម្មនៅកម្ពុជាបានកើនឡើងខ្ពស់ជាងដៃគូប្រកួតប្រជែងរបស់ខ្លួន។ នេះបើតាមលោក កាំង ម៉ូនីកា។
ជាការកត់សម្គាល់ ថ្លៃដើម និងការចំណាយក្នុងការផលិតនៅក្នុងប្រទេសកម្ពុជា ត្រូវគេមើលឃើញថាខ្ពស់ជាងប្រទេសជិតខាង ឬប្រទេសដែលមានឧស្សាហកម្មប្រហាក់ប្រហែលគ្នា ជាហេតុធ្វើឲ្យអ្នកវិនិយោគនៃវិស័យឯកជននានាមានការត្អូញត្អែរ និងមានភាពមិននឹងនរក្នុងការដាក់ទុនវិនិយោគនៅក្នុងប្រទេសកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ