ការចរចាប្រាក់ឈ្នួលកម្មករកាត់ដេរឆ្នាំ២០២៤ នៅថ្ងៃចន្ទនេះ មិនមានលទ្ធផលជាវិជ្ជមានទេ
ការចរចាត្រីភាគីលើប្រាក់ឈ្នួលអប្បបរមាកម្មករនិយោជិតនៃវិស័យវាយនភណ្ឌ កាត់ដេរ ផលិតស្បែកជើង និងសម្ភារៈធ្វើដំណើរឆ្នាំ២០២៤ នៅថ្ងៃទី១១ ខែកញ្ញានេះ មិនមានការវិវត្តន៍ជាវិជ្ជមានទេ ដោយសារភាគីកម្មករនិយោជិត និងភាគីនិយោជកប្រកាន់ជំហរតឹងតែងរៀងខ្លួន។ ការមិនត្រូវរ៉ូវគ្នានេះ ក៏ព្រោះតែភាគីសហជីព ដែលការពារប្រយោជន៍កម្មករនិយោជិតនៅតែបន្តទាមទារការតម្លើង១៥ដុល្លារលើប្រាក់ឈ្នួលចាស់២០០ដុល្លារ ហើយភាគីនិយោជកមិនអាចតម្លើងបានលើសពី១ដុល្លារ ពីលើប្រាក់ឈ្នួលចាស់។
ចុះផ្សាយនៅថ្ងៃ៖
ស្តាប់ - ០៣:០១
ភាគីនិយោជក និងភាគីកម្មករនិយោជិតទំនងជានៅរង់ចាំមើលជំហរគ្នាទៅវិញទៅមកជុំវិញការចរចាកំណត់ប្រាក់ឈ្នួលកម្មករនិយោជិតវិស័យវាយនភណ្ឌ កាត់ដេរ ផលិតស្បែកជើង និងសម្ភារៈធ្វើដំណើរ។ ជាក់ស្តែងការចរចាពេញមួយព្រឹកថ្ងៃចន្ទនេះ ភាគីទាំងពីរមិនបានបង្ហាញពីជំហរជាវិជ្ជមានណាមួយក្នុងការឡើង និងការបញ្ចុះតួលេខនោះឡើយ ដោយសហជីព ដែលការពារសិទ្ធិកម្មករនិយោជិតនៅបន្តទាមទារការតម្លើង១៥ដុល្លារដដែល ពីលើប្រាក់ឈ្នួលអប្បបរមាចាស់២០០ដុល្លារ។
ក៏ប៉ុន្តែភាគីនិយោជក ដែលការពារប្រយោជន៍ថៅកែរោងចក្រក៏មិនបានបង្ហាញសញ្ញាវិជ្ជមានណាមួយតម្លើងប្រាក់ឈ្នួលតាមការទាមទាររបស់សហជីពដែរ ជាហេតុធ្វើឲ្យលទ្ធផលនៃកិច្ចប្រជុំត្រីភាគីនៅថ្ងៃនេះ មិនខុសគ្នានឹងលទ្ធផលកាលពីការចរចាលើកមុនឡើយ។
លោក កាំង ម៉ូនីកា អគ្គលេខាធិការរងនៃសមាគម វាយនភណ្ឌ សម្លៀកបំពាក់ ស្បែកជើង និងផលិតផលធ្វើដំណើរនៅកម្ពុជា(TAFTAC) ឲ្យដឹងថាគោលជំហររបស់និយោជក គឺយោងលើលក្ខណៈវិនិច្ឆ័យទាំ៧ចំនុច ដែលគ្រប់ភាគីបានឯកភាពគ្នាសម្រាប់ធ្វើជាមូលដ្ឋានក្នុងការកំណត់ប្រាក់ឈ្នួលអប្បបរមា។ លោកថា មិនមែននិយោជកគ្មានបេះដូងគិតគូរពីកម្មករនិយោជិតរបស់ពួកគេទេ តែស្ថានភាពសេដ្ឋកិច្ចវាមិនអំណោយផល។
ទោះយ៉ាងណា ការតម្លើងប្រាក់ឈ្នួលគោលដល់កម្មករនិយោជិតវិស័យកាត់ដេរនៅកម្ពុជាទំនងដល់ចំណុចមួយចាល់សម្រាប់ភាគីនិយោជក ដោយមានការស្ទាបស្ទង់ថានិយោជកទំនងជានឹងមិនអាចតម្លើងប្រាក់ឈ្នួលច្រើនលើសពីកន្លះដុល្លារ ឬ១ដុល្លារនោះទេ បើទោះណាជាភាគីសហជីពព្រមចុះច្រើនពីតួលេខទាមទារ១៥ដុល្លារក៏ដោយ។ នេះបើតាមការសង្កេតពីភាពតានតឹងនៃការចរចារបស់ភាគីសហជីព។
ភាគីសហជីពនៅតែបង្ហាញការព្រួយបារម្ភដដែលថាស្ថានភាពជីវភាពរបស់កម្មករនិយោជិត មានការលំបាកជាងការលំបាកដែលនិយោជកមាន ដោយសារការចំណាយប្រចាំខែកាន់តែខ្ពស់ទៅៗ ប្រឈមនឹងអតិផរណានៃទំនិញទីផ្សារ ការទទួលខុសត្រូវក្នុងបន្ទុកគ្រួសារកាន់តែធំជាងមុនជាដើម។
សូមបញ្ជាក់ថា បច្ចុប្បន្ននេះ កម្មករនិយោជិតម្នាក់ៗ ត្រូវគេដឹងថាទទួលបានប្រាក់ឈ្នួលសរុបជាមធ្យមចំនួន២៧៥ដុល្លារក្នុង១ខែ ឬ ៣ ៣០០ដុល្លារក្នុង១ឆ្នាំ។ បន្ថែមពីលើនេះ កម្មករនិយោជិតក៏ទទួលបាននូវប្រាក់បំណាច់អតីតភាពការងារចំនួន៥% បន្ថែមទៀតនូវរៀងរាល់៦ខែម្តង។ ក្នុងពេលធ្វើការ កម្មករនិយោជិតទាំងអស់ទទួលបាននូវការធានារ៉ាប់រងគ្រោះថ្នាក់ការងារ និងការធានារ៉ាប់រងសុខភាពផងដែរ។ នៅពេលដល់អាយុចូលនិវត្តន៍ កម្មករនិយោជិតទាំងអស់ក៏នឹងទទួលបាននូវប្រាក់សោធនមួយទៀត។
យ៉ាងណាក្តី គេនៅរង់ចាំមើលលទ្ធផលចុងក្រោយបំផុតនៅថ្ងៃទី២៨ ខែកញ្ញា ឆ្នាំ២០២៣ ដែលគេរំពឹងថាអាចនឹងមានកាដូពិសេស ដែលជាការស្វាគមន៍ដល់វត្តមាននាយករដ្ឋមន្ត្រីថ្មីគឺលោក ហ៊ុន ម៉ាណែត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ