សហជីពថាស្ថានភាពវិស័យកាត់ដេរអំណោយផលក្នុងការតម្លើងប្រាក់ឈ្នួលដល់កម្មករ តែនិយោជកនៅតែត្អូញត្អែរ
ក្រុមប្រឹក្សាជាតិប្រាក់ឈ្នួលអប្បបរមាបានចាប់ផ្តើមបើកការជជែកគ្នាជាលើកដំបូងនៅថ្ងៃទី១៦ ខែសីហានេះ ក្នុងការកំណត់ប្រាក់ឈ្នួលដល់កម្មករនិយោជិតនៃវិស័យឧស្សាហកម្មវាយនភណ្ឌ កាត់ដេរ ផលិតស្បែកជើង និងផលិតផលធ្វើដំណើរសម្រាប់ឆ្នាំ២០២៤។ ការបើកការចរចាប្រាក់ឈ្នួលត្រីភាគីនេះ នៅមិនទាន់ជាក់លាក់ និងស៊ីជម្រៅរហូតដល់កំណត់តួលេខដាក់លើតុចរចានៅឡើយទេ ដោយភាគីទាំងបីត្រូវឆ្លងកាត់ការជួបជជែកគ្នាផ្ទៃក្នុង និងផ្លូវការជាច្រើនដំណាក់កាលទៀត។
ចុះផ្សាយនៅថ្ងៃ៖
ស្តាប់ - ០៣:១៦
ជំនួបជាលើកដំបូងត្រីភាគីរបស់ក្រុមប្រឹក្សាជាតិប្រាក់ឈ្នួលអប្បបរមាសម្រាប់កម្មករនិយោជិតនៃវិស័យឧស្សាហកម្មវាយនភណ្ឌ កាត់ដេរ ផលិតស្បែកជើង និងផលិតផលធ្វើដំណើរសម្រាប់ឆ្នាំ២០២៤ គឺបានត្រឹមស្តាប់បទបង្ហាញរបស់ក្រសួងការងារប៉ុណ្ណោះ ខណៈស្ថាប័នរដ្ឋមួយនេះ បានដើរតួនាទីសំខាន់ក្នុងការដឹកនាំជជែកគ្នារកដំណោះស្រាយរួមក្នុងការកំណត់ប្រាក់ឈ្នួលអប្បបរមាដល់កម្មករជារៀងរាល់ឆ្នាំ។
ជាបទបង្ហាញដែលរំលេចពីការរកឃើញរបស់ក្រសួងការងារពាក់ព័ន្ធនឹងលក្ខណៈវិនិច្ឆ័យបែបសេដ្ឋកិច្ច និងសង្គមទាំង៧ ដូចជាស្ថានភាពគ្រួសារ អតិផរណា ចំណាយក្នុងការរស់នៅ ផលិតភាព ភាពប្រកួតប្រជែង ភាពចំណេញក្នុងវិស័យ និងឱកាសវិនិយោគជាដើម។
ដោយមិនមានការដាក់តួលេខពីសំណាក់ភាគីនិយោជក និងភាគីសហជីពតំណាងកម្មករនិយោជិតនៅឡើយ តាមរយៈជំនួបនៅក្រសួងការងារនេះ កិច្ចប្រជុំបានកំណត់កាលវិភាគនៃការចរចា៦ជំហានទៅមុខទៀត គឺនៅថ្ងៃទី២៨ ខែសីហា ថ្ងៃទី០៤ ទី១១ ទី១៨ ទី២៥ ខែកញ្ញា និងបញ្ចប់នៅថ្ងៃទី០២ ខែតុលា ឆ្នាំ២០២៣ រួមនឹងកិច្ចប្រជុំផ្ទៃក្នុងដោយឡែកៗនៃភាគទាំងបីជាច្រើនលើកទៀត។
ទោះយ៉ាងណាភាគីសហជីពនឹងជួបប្រជុំគ្នាផ្ទៃក្នុងនៅថ្ងៃទី២១ ខែសីហានេះ ដើម្បីកំណត់តួលេខរួមមួយយកទៅចរចាជាមួយនិយោជក។ លោក អាត់ ធន់ ប្រធានសហភាពការងារកម្ពុជា បានបញ្ជាក់ថាមានចំណុចមួយចំនួនដែលត្រូវមានការយកចិត្តទុកដាក់ជាចាំបាច់ដូចជាស្ថានភាពគ្រួសារ អតិផរណាជាទូទៅគឺមានក្នុងរង្វង់ ២,៥% តែអតិផរណានៃម្ហូបអាហារគឺខ្ពស់ខ្លាំងដល់ទៅជាង១០%។ ជាមួយគ្នានេះផលិតភាពរបស់កម្មករខ្មែរមានការកើនឡើងខ្ពស់នៅឆ្នាំនេះ គឺពី២,៦% ទៅ៣,១% ខណៈដែលការប្រកួតប្រជែងនៅមិនទាន់មានសញ្ញាណអាក្រក់នៅឡើយ។
ក៏ប៉ុន្តែលោក កាំង ម៉ូនីកា អគ្គលេខាធិការរងសមាគមវាយនភណ្ឌ សម្លៀកបំពាក់ ស្បែកជើង និងផលិតផលធ្វើដំណើរនៅកម្ពុជា(TAFTAC) បានប្រាប់វិទ្យុ RFI កាលពីពេលថ្មីៗនេះថា ស្ថានភាពនៅតែមិនសូវល្អដូចកាលពីដើមឆ្នាំ ហើយស្ថានភាពនេះអាចបន្តដល់ចុងឆ្នាំ។ ស្ថានភាពនេះមិនមានការពាក់ព័ន្ធនិងការបោះឆ្នោត ឬនយោបាយផ្ទៃក្នុងរបស់កម្ពុជាទេ តែវាបណ្តាលមកពីបញ្ហាសេដ្ឋកិច្ចសកលដែលលើសពីការគ្រប់គ្រងបានរបស់យើង។
តាមការឲ្យដឹងពីភាគីសហជីព ចំនួនរោងចក្រ និងចំនួននៃការនាំចេញគឺស្ថិតនៅដដែលទោះជាមានការបិទក្រុមហ៊ុនជាង៤០ រយៈពេល៨ខែកន្លងទៅនេះ ដែលប៉ះពាល់ដល់កម្មករជាង៥ម៉ឺននាក់ក៏ដោយ។ ទាក់ទងទៅនឹងបញ្ហាផ្សេងៗទៀតដូចជាការប្រកួតប្រជែង សន្តិសុខសង្គមជាដើមកម្ពុជាមានចំណុចវិជ្ជមានច្រើន ខុសគ្នាច្រើនពីប្រទេសវៀតណាម។
ភាគីសហជីពលើកឡើងថាវិស័យកាត់ដេរកម្ពុជាមានកំរិតប្រាក់ចំណេញនៅតែខ្ពស់ ជាហេតុធ្វើឲ្យភាគីនេះចង់បានការតម្លើងប្រាក់ឈ្នួលប្រមាណជាង១០% នៃប្រាក់ចំណេញប្រចាំឆ្នាំ ដែលមានជិត១ពាន់លានដុល្លារ។ ជារួមភាគីសហជីពធ្លាប់លើកឡើងថាកម្មករអាចរស់បានសមរម្យនៅក្នុងកំរិតប្រាក់ឈ្នួលគោលចន្លោះពី ២៥០ ទៅ៣០០ដុល្លារ ក្នុងមួយខែ ខណៈប្រាក់ខែបច្ចុប្បន្នរបស់កម្មករគឺ២០០ដុល្លារក្នុងមួយខែ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ