សហជីពបង្ហើបថាប្រាក់ខែគោលចន្លោះពី២៥០ ទៅ៣០០ដុល្លារ ទើបកម្មករអាចរស់បានសមរម្យ
កិច្ចប្រជុំក្រុមប្រឹក្សាជាតិប្រាក់ឈ្នួលអប្បបរមាអាណត្តិទី៣ លើកទី១ ស្តីពីការកំណត់ប្រាក់ឈ្នួលអប្បបរមាផ្នែកវាយនភណ្ឌ កាត់ដេរ ផលិតស្បែកជើង និងផលិតផលធ្វើដំណើរសម្រាប់ឆ្នាំ២០២៤ នឹងត្រូវចាប់ផ្តើមនៅថ្ងៃទី១៦ ខែសីហា ឆ្នាំ២០២៣នេះ។ កិច្ចប្រជុំត្រីភាគីដ៏សំខាន់នៃវិស័យឧស្សាហកម្មកាត់ដេរនេះ គឺជាការប្រទាញប្រទង់គ្នារវាងនិយោជក និងសហជីពតំណាងកម្មករ និយោជិត ដោយភាគីសហជីពត្រៀមការទាមទារឲ្យមានប្រាក់ឈ្នួលប្រសើរជាងឆ្នាំចាស់ ខណៈនិយោជកតែងមានជំហរតឹងរឹងក្នុងការតម្លើង។
ចុះផ្សាយនៅថ្ងៃ៖
ស្តាប់ - ០២:៣៩
ខណៈដែលការចរចាកំណត់ប្រាក់ឈ្នួលអប្បបរមានៃវិស័យវាយនភណ្ឌ កាត់ដេរ ផលិតស្បែកជើង និងផលិតផលធ្វើដំណើរសម្រាប់ឆ្នាំ២០២៤ នឹងឈានចូលមកដល់នៅប៉ុន្មានថ្ងៃខាងមុខ នឹងបន្តអូសបន្លាយរហូតដល់ចុងឆ្នាំ តំណាងសហជីពខ្លះបានលើកឡើងថាកម្មករ និយោជិតនៃវិស័យនេះ នៅតែមានការប្រឈមនឹងជីវភាពរស់នៅរបស់ពួកគាត់។
ប្រធានសហភាពការងារកម្ពុជាលោក អាត់ ធន់ ឲ្យដឹងថាកត្តាសង្គមបង្ហាញថាបញ្ហាអតិផរណាកាន់តែខ្ពស់ ដែលកម្មករពិបាករស់ជាមួយនឹងប្រាក់ខែដូចបច្ចុប្បន្ន ស្ថានភាពគ្រួសារមានការលំបាក ដែលមនុស្សម្នាក់ត្រូវផ្គត់ផ្គង់សមាជិកគ្រួសារច្រើននាក់ រួមនឹងការចំណាយខ្ពស់ ក៏ដូចជាមានបំណុលច្រើន។
ដោយឡែកកត្តាសេដ្ឋកិច្ចវិញ លោក អាត់ ធន់ ថាកម្ពុជាមិនទាន់ប្រឈមនឹងបញ្ហាភាពអនុគ្រោះពន្ធ EBA និងGSP ទេ ផ្ទុយទៅវិញកម្មករមានផលិតភាព និងបទពិសោធន៍ខ្ពស់ជាងមុន ខណៈឱកាសទីផ្សារនិងកំរិតចំណេញនៅតែល្អមិនទាបជាងឆ្នាំចាស់នោះទេ ដែលមាននៅក្នុងរង្វង់ពី៧០០ ទៅ៨០០លានដុល្លារ។
ក៏ប៉ុន្តែសមាគមវាយនភណ្ឌ សម្លៀកបំពាក់ ស្បែកជើង និងផលិតផលធ្វើដំណើរនៅកម្ពុជា(TAFTAC) នៅមិនទាន់មានការវាយតម្លៃយ៉ាងណាទេ តែសមាគមនេះ កំពុងរៀបចំប្រមូល និងវិភាគទិន្នន័យទាំងអស់ដែលទាក់ទងទៅនឹងលក្ខណៈវិនិច្ឆ័យសេដ្ឋកិច្ច រួមមានផលិតភាព ការប្រកួតប្រជែងថ្នាក់ជាតិ ស្ថានភាពទីផ្សារការងារ និងប្រាក់ចំណេញនៃវិស័យ ដែលក្នុងនោះមានការកត់សម្គាល់ជាពិសេស និងការវិភាគលើកត្តាប្រកួតប្រជែង។ នេះបើតាមលោក កាំង មូនីកា អគ្គលេខាធិការរងនៃសមាគម TAFTAC។
តាមលោក កាំង ម៉ូនីកា កត្តាប្រកួតប្រជែងសំខាន់ៗរួមមាន កម្រិតប្រាក់ឈ្នួលអប្បបរមាបច្ចុប្បន្នធៀបនឹងប្រទេសដទៃទៀត ម៉ោងធ្វើការសរុបធៀបនឹងប្រទេសផ្សេងទៀត ការរួមចំណែកដល់សន្តិសុខសង្គម កំណើននៃទីផ្សារ និងកំណើននៃការនាំចេញ ថ្លៃដឹកជញ្ជូន កិច្ចព្រមព្រៀងពាណិជ្ជកម្មសេរី និងការអនុគ្រោះពាណិជ្ជកម្ម អត្រាប្តូរប្រាក់ និងបរិយាកាសធុរកិច្ចជាទូទៅ។
សូមបញ្ជាក់ថាប្រាក់ឈ្នួលគោលកម្មករនៃវិស័យឧស្សាហកម្មកាត់ដេរឆ្នាំ២០២៣ គឺ២០០ដុល្លារ ក្នុង១ខែ ក៏ប៉ុន្តែបើតាមសហជីពតម្រូវការប្រាក់ខែកម្មករអាចនឹងនៅក្នុងរង្វង់ពី២៥០ ទៅ៣០០ដុល្លារក្នុង១ខែ ទើបអាចរស់នៅបានសមរម្យ។
សូមរំលឹកដែរថា ការនាំចេញសម្លៀកបំពាក់ពីប្រទេសកម្ពុជាទៅកាន់ទីផ្សារបរទេសជាពិសេសទីផ្សារអាមេរិក និងទីផ្សារអឺរ៉ុបមានការកើនឡើងជាលំដាប់ ក្នុងនោះឆ្នាំ២០២២ កម្ពុជានាំចេញគិតជាទឹកប្រាក់ចំនួនជាង១០ពាន់លានដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ