ពលរដ្ឋខ្មែរនៅក្រៅប្រទេសដែលគាំទ្រគណបក្សប្រឆាំងធ្វើបាតុកម្មប្រឆាំងការបោះឆ្នោតនៅថ្ងៃនេះ
ពលរដ្ឋខ្មែរនៅក្រៅប្រទេសដែលគាំទ្រគណបក្សប្រឆាំងនាំគ្នាចុះផ្លូវធ្វើបាតុកម្មប្រឆាំងការបោះឆ្នោតនៅកម្ពុជាក្នុងថ្ងៃនេះ។ បាតុកម្មនោះកើតមានឡើងនៅអាល្លឺម៉ង សហរដ្ឋអាមេរិក កូរ៉េខាងត្បូង បារាំងជាដើម។ ដ្បិតទីតាំងខុសគ្នាតែបាតុកម្មនេះធ្វើឡើងក្នុងគោលបំណងរួមដូចគ្នាគឺទាមទារការផ្លាស់ប្ដូរនៅកម្ពុជានិងជម្រុញពលរដ្ឋប្រើសិទ្ធិជាម្ចាស់ឆ្នោតធ្វើអ្វីដែលខ្លួនចង់ធ្វើ។
ចុះផ្សាយនៅថ្ងៃ៖
ស្តាប់ - ០៣:១០
បាតុកម្មប្រឆាំងការបោះឆ្នោតនៅកម្ពុជាធ្វើឡើងដោយការបរិហាមិនសំចៃមាត់មកលើដំណើរការបោះឆ្នោតដែលកំពុងតែប្រព្រឹត្តទៅនៅថ្ងៃនេះនិងចាត់ទុកការបោះឆ្នោតនៅថ្ងៃនេះក្លែងក្លាយ។
ផ្ដើមចេញពីក្រុងប៉ារីសប្រទេសបារាំងបាតុកម្មប្រឆាំងការបោះឆ្នោតដឹកនាំដោយលោក សម រង្ស៊ីបានរៀបចំនៅថ្ងៃសៅរ៍ម្សិលមិញ។ អមជាមួយស្គរឆៃយាំនៅក្នុងក្បួនបាតុកម្មនោះអ្នកគាំទ្រលោក សម រង្ស៊ី បានកាន់រូបថតលោកនាយករដ្ឋមន្ត្រី ហ៊ុន សែន និងសន្លឹកឆ្នោតដោយគូសសញ្ញាខ្វែងជាមួយនឹងការហៅឈ្មោះលោកនាយករដ្ឋមន្ត្រី ហ៊ុន សែន។
ដៃកាន់ក្បាលមេក្រូ លោក សម រង្ស៊ី មានវត្តនៅក្នុងចំណោមអ្នកគាំទ្រដែលមានទាំងព្រះសង្ឃផងនោះថ្លែងថា បាតុកម្មនេះធ្វើឡើងក្នុងគោលបំណងទាមទារការផ្លាស់ប្ដូរ ហើយអ្នករស់នៅនាយសមុទ្រមានតួនាទីសំខាន់ក្នុងការទាមទារឲ្យមានការផ្លាស់ប្ដូរនៅកម្ពុជានិងដើម្បីប្រជារាស្ត្រខ្មែរដែលស្រឡាញ់សេរីភាព។ នេះក៏ដោយសារតែពលរដ្ឋនៅក្នុងប្រទេសកម្ពុជាពួកគេមិនហ៊ាននិយាយពីការផ្លាស់ប្ដូរទេ ព្រោះខ្លាចការសម្លត់និងការគំរាមកំហែង។ នេះបើតាមលោក សម រង្ស៊ី ។
ចេញពីបារាំង យើងងាកមកមើលពលរដ្ឋរស់នៅក្នុងទីក្រុងថាកូម៉ា (Tacoma) ក្នុងរដ្ឋវ៉ាស៊ីនតុនសហរដ្ឋអាមេរិកបានតំណាងពួកគេម្នាក់បានស្រែកតាមក្បាលមេក្រូថា ខ្មែរត្រូវការផ្លាស់ប្ដូរនិងបានបរិហាផ្ទៃក្នុងគណបក្សប្រជាជនកម្ពុជា។ នៅអាល្លឺម៉ងវិញ ពលរដ្ឋខ្មែរដែលគាំទ្រគណបក្សប្រឆាំងគេនាំគ្នាទៅតវ៉ានៅមុខស្ថានទូតខ្មែរនៅទីនោះជាមួយបដាទាមទារឲ្យដោះលែងអ្នកទោសនយោបាយដូចជាលោក ថាច់ សេដ្ឋាជាដើម។
ចំណែកបាតុកម្មនៅប្រទេសកូរ៉េវិញ ភាគច្រើនជាយុវជនដែលធ្វើការនៅទីនោះ គេនាំគ្នាឈរក្រោមដំណក់ភ្លៀងបាំងឆ័ត្រ កាន់បដាសសេរអក្សរកូរ៉េ ចង់កន្សែងក្រហមជាប់នឹងក្បាលពាក់ម៉ាស់និងមួកបានអះអាងការជួបជុំរបស់ពួកគេនៅថ្ងៃនេះធ្វើក្នុងគោលបំណងតែមួយទាមទារការផ្លាស់ប្ដូរ។ លោក លួន វិបុល ថ្លែងពីកូរ៉េខាងត្បូងថា បាតុកម្មរបស់ពលរដ្ឋខ្មែរមួយចំនួននៅទីនោះនឹងមានឥទ្ធិពលមកលើដំណើរការបោះឆ្នោតនៅកម្ពុជាព្រោះបានបង្ហាញពីការចង់បានពលរដ្ឋខ្មែររស់នៅក្រៅប្រទេស។
លោក សុខ ឥសាន អ្នកនាំពាក្យគណបក្សប្រជាជនកម្ពុជាចាត់ទុកបាតុកម្មនៅក្រៅប្រទេសឥតបានការគ្មានឥទ្ធិពលនិងប្រសិទ្ធភាពឡើយព្រោះផ្អែមតាមការអង្កេតជាក់ស្ដែងពលរដ្ឋខ្មែរបានចេញទៅបោះឆ្នោតហើយមណ្ឌលបោះឆ្នោតខ្លះមានភាពចង្អៀតណែនថែមទៀត។ ចំពោះការគូសសន្លឹកឆ្នោតចោលអ្នកនាំពាក្យរូបនេះយល់ថា មិនមានអ្វីជាក្ដីបារម្ភសម្រាប់គណបក្សប្រជាជនកម្ពុជាទេ ព្រោះផ្អែកតាមបទពិសោធន៍ឆ្នាំ២០១៨យុទ្ធនាការម្រាមដៃស្អាតឬដេកផ្ទះឈ្នះឯងគ្មានប្រសិទ្ធិភាពហើយលទ្ធផលបង្ហាញថា គណបក្សប្រជាជនកម្ពុជាបន្តឈ្នះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ