អគារជាប់គាំងក្នុងខេត្តព្រះសីហនុច្រើនជាង៥០ភាគរយ ពុំមានច្បាប់សាងសង់ត្រឹមត្រូវ
អាជ្ញាធរខេត្តព្រះសីហនុបានរកឃើញថា សំណង់អគារជាប់គាំងជាង៥០%នៃសំណង់អគារទុកចោលប្រមាណ១ពាន់កន្លែងក្នុងខេត្ត គឺពុំមានច្បាប់សាងសង់ត្រឹមត្រូវដែលចេញដោយអាជ្ញាធរ ឬក្រសួងស្ថាប័នពាក់ព័ន្ធឡើយ ខណៈសំណង់អគារដែលមានច្បាប់អនុញ្ញាតសាងសង់ត្រឹមត្រូវវិញ មានមិនដល់៥០%នោះទេ។ បើតាម រដ្ឋបាលខេត្តព្រះសីហនុ ករណីនេះមិនមែនមានន័យថា រដ្ឋបាលថ្នាក់ខេត្ត មិនយកចិត្តទុកដាក់ចំពោះសំណង់អគារខុសច្បាប់ឡើយ។ ប៉ុន្តែបញ្ហានេះ កើតមានឡើងដោយសារតែសន្ទុះ និងលំហូរនៃអ្នកវិនិយោគពីបរទេសខ្លាំង ទើបធ្វើឱ្យសំណង់អគារខ្លះដែលមានវត្តមានក្នុងខេត្ត គឺសាងសង់ពុំមានច្បាប់អនុញ្ញាតត្រឹមត្រូវ។
ចុះផ្សាយនៅថ្ងៃ៖
ស្តាប់ - ០២:៥៦
ថ្លែងប្រាប់វិទ្យុបារាំងអន្តរជាតិRFIនៅថ្ងៃទី៣១ ខែមីនានេះ លោក ឡុង ឌីម៉ង់ អភិបាលរងខេត្តព្រះសីហនុបានឱ្យដឹងថា នៅចន្លោះឆ្នាំ២០១៦ ដល់ឆ្នាំ២០១៩ លំហូរអ្នកវិនិយោគិនបរទេសបានសម្រុកមកវិនិយោគក្នុងខេត្តព្រះសីហនុយ៉ាងសន្ធឹក ក្រោមវត្តមានសាងសង់អគារធំៗ ជាពិសេសលើផ្នែក សណ្ឋាគារ កាស៊ីណូ និងហ្គេមអនឡាញ។ លំហូរវិនិយោគយ៉ាងហឹកហាក់បែបនេះហើយ ទើបធ្វើឱ្យរដ្ឋបាលខេត្តមិនដាក់លក្ខខណ្ឌសាងសង់ច្រើនក្នុងគោលបំណងដើម្បីទទួលបានផលប្រយោជន៍ទាំងផ្នែកសេដ្ឋកិច្ច និងការវិនិយោគពីបរទេស។ ត្បិតនាពេលនោះ ច្បាប់ស្តីពីសំណង់ ក៏មិនទាន់ត្រូវបានដាក់ចេញឱ្យអនុវត្តពេញលេញនៅឡើយ។
បើតាមលោក ឡុង ឌីម៉ង់ ចំពោះករណីសាងសង់អគារ បើតាមច្បាប់ រដ្ឋបាលខេត្តមានសិទ្ធិត្រឹមតែពិនិត្យស្ថានភាពដី ឬអំពីព័ត៌មានដីដែលត្រៀមសាងសង់ប៉ុណ្ណោះ ដូចជាពិនិត្យទៅលើបញ្ហាវិវាទដីធ្លី ថាតើដីត្រៀមសាងសង់នោះជាប់ចំណីផ្លូវ ជាប់មាត់សមុទ្រ ឬក៏មានម្ចាស់ហើយឬនៅជាដើម។ ប៉ុន្តែបើពិនិត្យទៅលើគុណភាពសំណង់ លក្ខណៈបច្ចេកទេសសាងសង់ ឬបរិក្ខារសំណង់អ្វីនោះ គឺអ្នកវិនិយោគត្រូវដាក់សំណើរទៅកាន់អគ្គនាយកដ្ឋានសំណង់របស់មន្ទីររៀបចំដែនដីខេត្ត។
តែយ៉ាងណា ក្នុងនាមជាអាជ្ញាធរខេត្តលោក ឡុង ឌីម៉ង់ថា អាជ្ញាធរនឹងពន្លឿនការដោះស្រាយវិបត្តិអគារជាប់គាំងចំនួនជាង១ពាន់អគារនេះឱ្យបានឆាប់ដើម្បីលើកស្ទួយមុខមាត់ខេត្ត ជាពិសេសទាក់ទាញអ្នកវិនិយោគិនឡើយវិញ ខណៈបច្ចុប្បន្នក្រុមការងារដោះស្រាយបញ្ហាអគារជាប់គាំងនេះ កំពុងបន្តចុះស្រង់ទិន្នន័យ និងសិក្សាអំពីប្រវតិ្តនៃសំណង់អគារជាង១ពាន់កន្លែងនោះសិន មុនឈានដល់ការ ដោះស្រាយ។
ពីខាងអ្នកជំនាញផ្នែកអចលនទ្រព្យវិញ លោកឧកញ៉ា គឹម ហ៊ាង ស្នើឱ្យរដ្ឋបាលខេត្តព្រះសីហនុ និងក្រសួងពាក់ព័ន្ធជាពិសេសក្រសួងសេដ្ឋកិច្ច និងហិរញ្ញវត្ថុ ពិនិត្យសំណង់អគារនីមួយៗឱ្យបានល្អិតល្អន់ និងបន្ទាប់មកគួរ ដាក់ដេញថ្លៃដើម្បីឱ្យអ្នកវិនិយោគិនផ្សេងៗដែលមានចំណាប់អារម្មណ៍អាចធ្វើការយកមកវិនិយោគបន្ត។ បើតាម លោកឧកញ៉ា គឹម ហ៊ាង ចំពោះសំណង់អគារណាដែលមានសភាពចាស់ទ្រុឌទ្រោម រដ្ឋបាលខេត្តគួរវាយកម្ទេចចោលដើម្បីយកដីទៅអភិវឌ្ឍន៍ជាសំណង់ថ្មី។ ហើយលោកស្នើឱ្យរដ្ឋបាលខេត្តមិនគួរពន្យាពេលដោះស្រាយបញ្ហាអគារជាប់គាំងឡើយ ពីព្រោះអាចធ្វើប៉ះពាល់ដល់ការវិនិយោគនៅក្នុងខេត្ត។
សូមជម្រាបថា សំណង់អគារប្រមាណ១០០៦កន្លែង ក្នុងខេត្តព្រះសីហនុត្រូវបានបញ្ឈរទុកចោលដោយគ្មានវត្តមានសាងសង់ឬអភិវឌ្ឍន៍ណាមួយបន្តឡើយជាង៣ឆ្នាំមកនេះ បន្ទាប់ពីរដ្ឋាភិបាលបានប្រកាសបិទអាជីវកម្មហ្គេមអនឡាញកាលពីខែសីហា ឆ្នាំ២០១៩ ហើយក្រោយពីមានការចាកចេញយ៉ាងគំហុករបស់អ្នកវិនិយោគិនចិន ចំពេលវិបត្តិជំងឺកូវីដ១៩ថែមទៀត។ តែយ៉ាងណា កាលពីពាក់កណ្តាលខែកក្តដា ឆ្នាំ២០២២ រដ្ឋបាលខេត្តព្រះសីហនុ បានចាប់ផ្តើមធ្វើការជាមួយក្រសួងសេដ្ឋកិច្ច វិស័យឯកជន វិស័យធនាគារ និងអ្នកជំនាញផ្នែកអចលនទ្រព្យ ដើម្បីដោះស្រាយវិបត្តិអគារដែលបានទុកចោលរាប់ពាន់កន្លែងនេះ ដោយធ្វើយ៉ាងណាឱ្យមានដំណើរការសាងសង់ឡើងវិញ ឬដោះស្រាយបញ្ចប់ដើម្បីរៀបចំផែនការអភិវឌ្ឍទីក្រុងថ្មី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ