រដ្ឋាភិបាលមិនលុបចោលគម្រោងផ្លូវល្បឿនលឿនភ្នំពេញ-បាវិត ខណៈការដ្ឋានសាងសង់ត្រូវពន្យារពេល
រដ្ឋាភិបាលត្រៀមនឹងបើកការដ្ឋានផ្លូវល្បឿនលឿនទី២ ពីភ្នំពេញទៅក្រុងបាវិត នៅខែមិថុនាខាងមុខនេះ ក្រោយបញ្ចប់ការចរចាជាមួយក្រុមហ៊ុនចិនរួចរាល់។ នេះបើតាមការអះអាងរបស់រដ្ឋមន្ត្រីក្រសួងសាធារណការ នៅអំឡុងពេលបើកសន្និបាតបូកសរុបលទ្ធផលការងារឆ្នាំ២០២២ និងលើកទិសដៅការងារឆ្នាំ២០២៣ នៅថ្ងៃពុធនេះ។ ថេរវេលានេះ គឺជាពន្យារពេលក្នុងការបើកដ្ឋាន ខណៈដែលរដ្ឋមន្ត្រីក្រសួងសាធារណការធ្លាប់គូសបញ្ជាក់ថា ការសាងសង់នឹងត្រូវចាប់ផ្តើមនៅដើមឆ្នាំ២០២៣។
ចុះផ្សាយនៅថ្ងៃ៖
ស្តាប់ - ០២:៣១
«ឲ្យតែមានមួយ គឺមានពីរ»។ នេះគឺជាការអះអាងរបស់លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ទាក់ទងទៅនឹងការសាងសង់ផ្លូវល្បឿនលឿន ដែលរដ្ឋាភិបាលត្រៀមនឹងបើកការដ្ឋានទី២ ពីភ្នំពេញទៅបាវិត នៅត្រឹមពាក់កណ្តាលឆ្នាំ២០២៣នេះ។ តាមគម្រោងការសាងស់ផ្លូវល្បឿនលឿនទី២របស់កម្ពុជានេះ នឹងត្រូវចំណាយពេល៤ឆ្នាំ ដែលនឹងត្រូវបញ្ចប់នៅត្រឹមឆ្នាំ២០២៧ ដើម្បី តភ្ជាប់ចូលទៅប្រទេសវៀតណាម តាមរយៈក្រុងហូជីមិញ និងម៉ុកប៉ៃ។
តាមការបញ្ជាក់របស់លោក ស៊ុន ចាន់ថុល គឺលោកនឹងត្រូវចេញទៅប្រទេសវៀតណាម ដើម្បីជជែកពីការសាងសង់ផ្លូវល្បឿនទី២នេះ ក្នុងន័យធានាថា នឹងត្រូវជាមួយផ្លូវហូជីមិញ និងម៉ុកប៉ៃ ដែលតភ្ជាប់កម្ពុជានិងវៀតណាម។
ដំបូងឡើយ ការបើកដ្ឋានផ្លូវល្បឿនលឿនភ្នំពេញ-បាវិត ត្រូវចាប់ផ្តើមនៅដើមឆ្នាំ២០២៣ ក្រោយពេលដែលលោកនាយករដ្ឋមន្ត្រី ហ៊ុន សែន បានទៅបំពេញទស្សនកិច្ចចំនួន៣ថ្ងៃនៅប្រទេសចិន។ តែគម្រោងដែលត្រូវពន្យារពេលរហូតដល់ខែមិថុនាវិញនេះ គឺដោយសារតែភាគីចិនមានភាពយឺតយ៉ាវក្នុងការពិនិត្យសំណុំឯកសារ។ នេះបើតាមការបញ្ជាក់របស់លោក ស៊ុន ចាន់ថុល។
បើទោះជាត្រូវពន្យារពេលក្តី តែរដ្ឋមន្ត្រីក្រសួងសាធារណការ បានថ្លែងថា គម្រោងផ្លូវល្បឿនលឿនទី២របស់កម្ពុជានេះនឹងមិនលុបចោលជាដាច់ខាត។ មិនលុបចោលដ្បិតភាគីរដ្ឋាភិបាលកម្ពុជា និងក្រុមហ៊ុនសាងសង់របស់ចិន បានបញ្ចប់ការចរចារួចជាស្រេច។ ត្រង់ចំណុចនេះ សូមជម្រាបថា រដ្ឋាភិបាលបានបញ្ចប់ការចរចាជាមួយនឹងក្រុមហ៊ុនចិន កាលពីថ្ងៃទី១០ខែធ្នូឆ្នាំ២០២២។ នេះបើតាមក្រសួងសាធារណការ និងដឹកជញ្ជូន។ តាមផែនការ ផ្លូវល្បឿនលឿនភ្នំពេញ-បាវិត មានចំងាយ ១៣៨គីឡូម៉ែត្រ ដែលនឹងត្រូវចំណាយថវិកាសរុបប្រមាណ ១ ៦៣៨លានដុល្លារអាមេរិក។ នេះបើតាមលោក ស៊ុន ចាន់ថុល។ រដ្ឋមន្ត្រីរូបនេះ ធ្លាប់គូសបញ្ជាក់ថា ផ្លូវល្បឿនលឿនទី២នេះ មានសារៈសំខាន់ក្នុងការតភ្ជាប់ពីប្រទេសចិន មកភូមា មកថៃ មកកម្ពុជា និងតទៅប្រទេសវៀតណាម។
គួរបញ្ជាក់ថា រដ្ឋាភិបាលកម្ពុជា តាមរយៈគម្រោងវិនិយោគរបស់ក្រុមហ៊ុនចិន ទើបតែសម្រេចបាននូវផ្លូវល្បឿនលឿនភ្នំពេញ-ព្រះសីហនុ ដែលបានដាក់ឲ្យប្រើប្រាស់ជាផ្លូវការ កាលពីខែវិច្ឆិកាឆ្នាំ២០២២។ សម្រាប់ឆ្នាំ២០២២ រដ្ឋមន្ត្រីក្រសួងសាធារណការ បានរំលេចថា ជាឆ្នាំដែលកម្ពុជាកសាងបានហេដ្ឋារចនាសម្ព័ន្ធជាច្រើន រាប់តាំងពីផ្លូវជាតិ និងស្ពាន។ ហើយសម្រាប់ផ្លូវល្បឿនលឿនទី១ ពីភ្នំពេញ-ព្រះសីហនុ គឺជាអ្វីដែលលោក ស៊ុន ចាន់ថុល បានអះអាងពីស្នាដៃរបស់រដ្ឋាភិបាលកម្ពុជា នាអំឡុងពេលបើកសន្និបាតបូកសរុបលទ្ធផលការងារឆ្នាំ២០២២ និងលើកទិសដៅការងារឆ្នាំ២០២៣របស់ក្រសួងសាធារណការ នៅថ្ងៃនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ