ក្រសួងវប្បធម៌និងភាគីពាក់ព័ន្ធកំពុងស៊ើបអង្កេតទីតាំងកុដិបុរាណដែលត្រូវវាយកំទេចនិងទុកដីឲ្យទំនេរសិន
ក្រសួងវប្បធម៌ និងវិចិត្រសិល្បៈ នៅថ្ងៃទី ២១ ខែធ្នូនេះ បានសម្រេចរក្សាទុកដីកុដិក្នុងបរិវេនវត្តឧណ្ណាលោម ដែលត្រូវបានវាយកម្ទេចចោល ដោយមិនសាងសង់សំណង់ថ្មី រហូតដល់ការស៊ើបអង្កេត និងការដោះស្រាយត្រូវបានបញ្ចប់។ ជាមួយគ្នានេះ សង្គមស៊ីវិលស្នើក្រសួងឱ្យមានចំណាត់ការហ្មត់ចត់ក្នុងការដោះស្រាយបញ្ហានេះ ដើម្បីបង្ការកុំឱ្យមានការបំផ្លាញសម្បត្តិបេតិកភណ្ឌបន្ដទៀត។
ចុះផ្សាយនៅថ្ងៃ៖
ស្តាប់ - ០១:៤៩
ក្រសួងវប្បធម៌ និងវិចិត្រសិល្បៈ តាមរយៈសេចក្ដីជូនដំណឹងមួយចុះថ្ងៃទី២១ ខែធ្នូ បានសម្រេចរក្សាដីដែលបានពីវាយកម្ទេចកុដិបុរាណចំនួន៣ នៅក្នុងឧណ្ណាលោម មិនឱ្យមានការសាងសង់សំណង់ថ្មីឡើយ ដោយបានបញ្ជាក់ថា ក្រសួងនឹងសហការជាមួយអាជ្ញាធរដែនដី និងស្ថាប័នពាក់ព័ន្ធ ដើម្បីស៊ើបអង្កេត និងដោះស្រាយតាមវិធានការច្បាប់។ ការសម្រេចនេះ ធ្វើឡើងខណៈដែលគេមិនទាន់ដឹងថា ដីដែលជាទីតាំងទ្រកុដិនេះ នឹងប្រើប្រាស់សម្រាប់ការសាងសង់អ្វីនៅឡើយ។
លោក សន ជ័យ ប្រធានអង្គការសម្ព័ន្ធគណនេយ្យភាពសង្គមកម្ពុជាបានថ្លែងប្រាប់វិទ្យុបារាំងអន្តរជាតិថា បើក្រសួងមិនមានចំណាត់ការហ្មត់ចត់ក្នុងការដោះស្រាយករណីវាយកម្ទេចកុដិនេះទេ អាចនឹងមានការបំផ្លាញសម្បត្តិបេតិកភណ្ឌជាតិបន្តទៀត។ លោក សន ជ័យ ក៏បានស្នើឱ្យក្រសួងវប្បធម៌ និងក្រសួងធម្មការនិងសាសនា ឱ្យមានវិធានការក្នុងការការពារសម្បត្តិបេកិកភណ្ឌជាតិដោយយកចិត្តទុកដាក់ តាមរយៈការត្រួតពិនិត្យនៅតាមទីអារាមដែលមានសម្បត្តិបេកិកភណ្ឌ។ បើតាមលោក សន ជ័យ នេះមិនមែនជាលើកទីមួយទេ ដែលមានការវាយកម្ទេចសម្បត្តិបេតិកភណ្ឌ ដោយលោកបានលើកឡើងពីករណីវាយកម្ទេចព្រះវិហារមួយនៅខេត្តកំពង់ធំ កាលពីខែសីហា ឆ្នាំ២០១៧ កន្លងទៅ ដែលជាសម្បត្តិបេតិកភណ្ឌជាតិ។
គួរជម្រាបជូនថា កុដិចំនួន៣ នៅក្នុងបរិវេណវត្តឧណ្ណាលោម ត្រូវបានវាយកម្ទេច និងបានបាត់បង់រូបភាពដើមទាំងស្រុងកាលពីថ្ងៃទី១២ ខែធ្នូ ឆ្នាំ២០២២ កន្លងទៅនេះ ហើយមានការរិះពីសំណាក់សាធារណជន ជាពិសេសនៅលើបណ្ដាញសង្គម។ កុដិបុរាណទាំង៣នោះ គឺមានដូចជាកុដិលេខ៤៣ ៤៤ និង៤៥ ក្នុងបរិវេណវត្តឧណ្ណាលោម ដែលកសាងឡើងអំឡុងឆ្នាំ១៩៣០ និងដែលជាសម្បត្តិបេតិកភណ្ឌជាតិ។
មុនមានសេចក្ដីជូនដំណឹងប្រាប់ពីការស៊ើបអង្កេតនេះ ក្រសួងវប្បធម៌កាលពីថ្ងៃទី៨ ខែធ្នូ បានបង្ហាញការសោកស្ដាយ និងបានបញ្ជាក់ថា ការវាយកម្ទេចកុដិនេះ ពុំមានការពិភាក្សានិងអនុញ្ញាតពីក្រសួងវប្បធម៌ឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ