កម្ពុជាអះអាងពីការខិតខំប្រឹងប្រែងដើម្បីប្រឆាំងការលាងលុយកខ្វក់
រដ្ឋាភិបាលកម្ពុជាតាមរយៈក្រុមការងារប្រឆាំងការសម្អាតប្រាក់ និងហិរញ្ញប្បទានភេរវកម្ម បានអះអាងពីកិច្ចខិតខំប្រឹងប្រែងរបស់ខ្លួនដើម្បីប្រឆាំងការលាងកខ្វក់ ខណៈដែលកម្ពុជាបន្តជាប់ក្នុង«បញ្ជីប្រផេះ» ពីការតាមដានរបស់ពិភពលោក។ ការប្តេជ្ញាចិត្តនេះបានធ្វើកាលពីម្សិលមិញនៅក្នុងកិច្ចប្រជុំអនុគណៈកម្មការចំពោះកិច្ចអនុវត្តផែនការសកម្មភាពការងាររបស់ក្រុមការងារ ត្រួតពិនិត្យរួមនៃក្រុមប្រទេសអាស៊ីប៉ាស៊ីហ្វិកអំពីកិច្ចសហប្រតិបត្តិការអន្តរជាតិ (អ.អ.ផ.)។
ចុះផ្សាយនៅថ្ងៃ៖
រដ្ឋមន្រ្តីក្រសួងយុត្តិធម៌ និងជាប្រធាន អ.អ.ផ. បានស្នើឱ្យក្រុមការងារនីមួយៗ ក៏ដូចជា ក្រសួង-ស្ថាប័ន ដែលមានការពាក់ព័ន្ធត្រូវបន្តចូលរួមសហការ និងខិតខំបំពេញការងាររបស់ខ្លួនប្រកបដោយស្មារតីទទួលខុសត្រូវខ្ពស់លើការងារប្រឆាំងការសម្អាតប្រាក់ និងហិរញ្ញប្បទានភេរវកម្ម និងហិរញ្ញប្បទានដល់ការរីកសាយភាយអាវុធមហាប្រល័យឱ្យមានប្រសិទ្ធភាព។
ការជំរុញបែបនេះរបស់លោក កើត រិទ្ធ ដោយសារតែកម្ពុជា បន្តស្ថិតក្នុង«បញ្ជីប្រផេះ» នៃក្រុមប្រទេសដែលមានហានិភ័យខាងលាងលុយកខ្វក់ ដែលពិភពលោកត្រូវបង្កើនការតាមដានក្នុងឆ្នាំនេះ។ នេះបើតាមក្រុមការងារហិរញ្ញវត្ថុ ហៅកាត់ថា (FATF) ដែលមានមូលដ្ឋាននៅទីក្រុងប៉ារីស កាលពីថ្ងៃទី៤ ខែមីនា២០២២។
ការដែលកម្ពុជាបន្តជាប់ក្នុង«បញ្ជីប្រផេះ»នេះគឺមិនមានន័យថា កម្ពុជាមានការប្រសើរឡើងទេ ទោះបីជាកម្ពុជាបានខិតខំប្រឹងប្រែង ធ្វើសេចក្ដីព្រាងច្បាប់ស្ដីពីការប្រឆាំងការសម្អាតប្រាក់ និងហិរញ្ញប្បទានភេរវកម្ម ឬការលាងលុយកខ្វក់ តាំងពីឆ្នាំពី២០២០ក៏ដោយ។
នៅចំពោះមុខនេះ លោក កើត រិទ្ធ ក៏បានស្នើឱ្យក្រសួង-ស្ថាប័ន ដែលធ្វើការងារលើវិស័យពាក់ព័ន្ធនឹងបទល្មើសដែលមានហានិភ័យក្នុងការសម្អាតប្រាក់ ត្រូវបង្កើនសកម្មភាពរបស់ខ្លួន និងផ្តល់អាទិភាពខ្ពស់លើការងារប្រឆាំងការសម្អាតប្រាក់ ព្រមទាំងបន្តបណ្តុះបណ្តាល និងពង្រឹងសមត្ថភាពមន្រ្តីអនុវត្តច្បាប់ ដោយផ្តោតជាសំខាន់លើបច្ចេកទេសស៊ើបអង្កេតពាក់ព័ន្ធនឹងការសម្អាតប្រាក់ ដើម្បីកម្ពុជាអាចត្រូវបានដកចេញពីបញ្ជីប្រផេះ។
ក្រុមការងារហិរញ្ញវត្ថុ ហៅកាត់ថា (FATF) ដែលមានមូលដ្ឋាននៅទីក្រុងប៉ារីស បានជំរុញជាថ្មីទៀតឲ្យកម្ពុជាត្រូវបង្ហាញការប្តេជ្ញាចិត្តកាន់តែខ្លាំងក្លាទៅកាន់សហគមន៍អន្តរជាតិឲ្យបានឃើញពីការវិវឌ្ឍន៍ឆាប់រហ័សក្នុងការបំពេញតាមផែនការសកម្មភាពដែលខ្លួនបានដាក់ចេញនៅត្រឹមខែមិថុនា ឆ្នាំ២០២២នេះ។
បើពុំដូច្នោះទេ អង្គការក្រុមការងារហិរញ្ញវត្ថុ ព្រមានថា ខ្លួននឹងពិចារណានូវជំហ៊ានបន្ទាប់មកលើកម្ពុជាពាក់ព័ន្ធនឹងការលាងលុយកខ្វក់នេះ។ ជំហ៊ានបន្ទាប់ គឺសំដៅដល់ការអំពាវនាវដល់ប្រទេសសមាជិក និងយុត្តាធិការទាំងអស់នៅទូទាំងពិភពលោក ឲ្យបង្កើនការតាមដានត្រួតពិនិត្យលើរាល់ទំនាក់ទំនង និងប្រតិបត្តិការអាជីវកម្មទាំងអស់ជាមួយកម្ពុជា។
ជាការកត់សំគាល់ កម្ពុជាត្រូវបានអង្គការនេះ ដាក់ក្នុង«បញ្ជីប្រផេះ»អស់រយៈពេលជាង៣ឆ្នាំជាប់ៗគ្នាតាំងពីឆ្នាំ២០១៩មក។ វិស័យដែលរងហានិភ័យខ្ពស់ខាងអំពើលាងលុយកខ្វក់នៅកម្ពុជា រួមមាន វិស័យធនាគារ ហិរញ្ញវត្ថុ វិស័យសំណង់ អចលនទ្រព្យ និងវិស័យកាស៊ីណូ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ