រដ្ឋត្រៀមបោះផ្សាយមូលបត្ររដ្ឋជាលើកដំបូងចំនួន៣០០លានដុល្លារនៅត្រីមាសទី៣ ឆ្នាំ២០២២
ក្រសួងសេដ្ឋកិច្ចកាលពីពេលថ្មីៗនេះបានអះអាងថា រដ្ឋាភិបាលនឹងត្រៀមបោះផ្សាយមូលបត្ររដ្ឋដែលមានទំហំទឹកប្រាក់ចំនួន៣០០លានដុល្លារនៅផ្សារមូលបត្រកម្ពុជានាត្រីមាសទី៣ឆ្នាំ២០២២នេះ។ បើតាមក្រសួងសេដ្ឋកិច្ច ការបោះផ្សាយមូលរដ្ឋនេះ ដើម្បី ប្រមូលប្រភពទុនហិរញ្ញវត្ថុសម្រាប់បំពេញបន្ថែមនូវគម្រោងចំណាយថវិកាជាតិឆ្នាំ២០២២ និងធ្វើហិរញ្ញប្បទានគាំទ្រគម្រោងវិនិយោគសាធារណៈ សំដៅលើកស្ទួយកំណើន និង ផលិតភាពសេដ្ឋកិច្ចជាដើម។
ចុះផ្សាយនៅថ្ងៃ៖
ស្តាប់ - ០២:៤៨
បើមិនមានអ្វីប្រែប្រួលនោះទេ រដ្ឋនឹងបោះផ្សាយមូលបត្រជាលើកដំបូងក្នុងរង្វង់ទឹកប្រាក់ចំនួន៣០០លានដុល្លារ នៅក្នុងតី្រមាសទី៣ ឆ្នាំ២០២២នេះ។ លោក វង្សី វិស្សុត រដ្ឋលេខាធិកាក្រសួងសេដ្ឋកិច្ចបានបញ្ជាក់ក្នុងវេទិកាសាធារណៈ ស្តីពីការគ្រប់គ្រងម៉ាក្រូសេដ្ឋកិច្ច និងច្បាប់ស្តីពីហិរញ្ញវត្ថុ សម្រាប់ការគ្រប់គ្រងឆ្នាំ២០២២ ថា ការបោះផ្សាយមូលបត្ររដ្ឋនាពេលខាងមុខនេះ គឺដើម្បីពង្រឹងវិស័យទីផ្សារមូលធនក្នុងស្រុកឱ្យរឹងមាំ និងបន្តចូលរួមស្តារសេដ្ឋកិច្ចកម្ពុជា ក្នុងការរស់នៅជាមួយកូវីដ-១៩ និងគាំទ្រដល់គម្រោងប្រព័ន្ធបច្ចេកវិទ្យា និងហេដ្ឋារចនាសម្ព័ន្ធឌីជីថល។
ទន្ទឹមនឹងនេះ លោក ហុង សុហួរ អគ្គនាយកនៃផ្សារមូលបត្រកម្ពុជាបានបញ្ជាក់ប្រាប់វិទ្យុបារាំងអន្តរជាតិRFIនៅព្រឹកថ្ងៃទី២០ កុម្ភៈនេះដែរថា ការបោះផ្សាយមូលបត្ររដ្ឋដំបូង ដើម្បីប្រមូលប្រភពទុនហិរញ្ញវត្ថុសម្រាប់បំពេញបន្ថែមនូវគម្រោងចំណាយថវិកាជាតិឆ្នាំ២០២២ដែលគ្រោង ទុកក្នុងចំនួនប្រមាណ ៨.០១៣ លានដុល្លារ និងសម្រាប់អភិវឌ្ឍន៍ពង្រឹងលើវិស័យមូលធនរបស់កម្ពុជាឱ្យមានភាពធន់ ក៏ដូចជាដើម្បីគៀគររកប្រភពទុនពីវិស័យឯកជនឱ្យបានច្រើនជាដើម។
លោក ហុង សុហួរបន្តថា ទិសដៅសំខាន់ចំនួន២ ដែលរដ្ឋាភិបាលសម្រេចបោះផ្សាយមូលបត្ររដ្ឋក្នុងឆ្នាំ២០២២នេះ គឺទី១ វិស័យហិរញ្ញវត្ថុក្នុងប្រទេសកម្ពុជាមានភាពរីកចម្រើនដែលផ្តល់លទ្ធភាពគ្រប់គ្រាន់ឱ្យរដ្ឋាភិបាលអាចគៀគរទុនពីវិស័យឯកជន តាមរយៈផ្សារមូលបត្រកម្ពុជា ដើម្បីយកទៅបម្រើការផ្សេងៗរបស់រដ្ឋ។ និងទី២ រដ្ឋាភិបាលបានគិតគូខ្ពស់ចំពោះការចូលរួមអភិវឌ្ឍន៍ផ្សារមូលបត្រកម្ពុជាដែលបច្ចុប្បន្នមានភាពថ្មីថ្មោង និងមិនទាន់មានទំហំជួញដូរខ្លាំងខ្លានៅឡើយ។
បើតាមអគ្គនាយកផ្សារមូលបត្រកម្ពុជារូបនេះ មូលបត្ររដ្ឋចំនួន៣០០លានដុល្លារ នឹងអាចទាក់ទាញអ្នកវិនិយោគិន ក្រុមហ៊ុនឯកជននានាបានកាន់តែច្រើនបន្ថែមទៀត។ និងថា ផ្សារមូលបត្រកម្ពុជានឹងក្លាយទៅជាប្រភពទុនដែលមិនចេះរីងស្ងួតសម្រាប់ផ្តល់ទុនទៅកាន់ក្រុមហ៊ុនជន និងអ្នកវិនិយោគិននានា។ បន្ថែមពីនេះ ការបោះផ្សាយមូលបត្ររដ្ឋនៅត្រីមាសទី៣ខាងមុខ នឹងមានការចូលរួមពីអ្នកវិនិយោគិនស្ថាប័ន មានដូចជាធនាគារ ក្រុមហ៊ុនធានារ៉ាប់រង មូលនិធិសោធននិវត្តន៍ រឺសន្តិសុខសង្គមផងដែរ។
សូមជម្រាបថា គិតមកត្រឹមពេលនេះ ផ្សារមូលបត្រកម្ពុជាមាន ក្រុមហ៊ុនចុះបញ្ជីចំនួន ១៥ ក្នុងនោះមានក្រុមហ៊ុនចំនួន៨ បានចុះបញ្ជីលក់ភាគហ៊ុន និង ក្រុមហ៊ុន ៧ផ្សេងទៀតចុះបញ្ជីសញ្ញាបណ្ណ។ ជាការបញ្ជាក់បន្ថែម ក្នុងចំណោមក្រុមហ៊ុនទាំង១៥ខាងដើម ផ្សារមូលបត្រកម្ពុជាបានទទួលផលពីការគៀគរទុនជាង ២៨១លានដុល្លារចាប់តាំងពីដំណើរការផ្សារមូលបត្ររយៈពេល៩ឆ្នាំ។
គួរឱ្យកត់សម្គាល់ផងដែរថា កាលពីឆ្នាំ២០២១កន្លងទៅ ទំហំជួញដូរផ្សារមូលបត្រមានការកើនឡើងជាង ២៧ម៉ឺនដុល្លារជាក្នុងងមួយថ្ងៃ ខណៈកាលពីឆ្នាំ២០២០ មានជាង ១១ម៉ឺនដុល្លារ និងដាក់ក្តីរំពឹងថា ឆ្នាំ២០២២នេះ ទំហំជួញដូរអាចនឹងស្ទុះដល់ ៣០ម៉ឺនដុល្លារក្នុងមួយថ្ងៃ។ និងកំណើនជួញដូរដល់១លានដុល្លារនារយៈពេល៤ឆ្នាំទៅមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ