MRC៖ ការនេសាទហួសកម្រិតរបស់ប្រជាជនធ្វើឲ្យជលផលនៅអាងទន្លេមេគង្គរងសម្ពាធយ៉ាងខ្លាំង
គណៈកម្មការទន្លេមេគង្គ(ហៅកាត់ថាMRC) នៅថ្ងៃទី១៩តុលាម្សិលមិញ បានចេញរបាយការណ៍ថ្មីស្ដីពី ផលប៉ះពាល់នៃសកម្មភាពរបស់មនុស្សមកលើបរិស្ថានក្នុងអាងទន្លេមេគង្គក្រោម។ បើតាមគណៈកម្មការទន្លេមេគង្គ ជលផលអាងទន្លេមេគង្គក្រោមកំពុងរងសម្ពាធយ៉ាងខ្លាំងពីសកម្មភាពរបស់មនុស្ស។ ក្នុងចំណោមសម្ពាធទាំងនោះក៏រាប់បញ្ចូលផងដែរ ការនេសាទហួសកម្រិតរបស់ប្រជាជន នៅតាមដងទន្លេមេគង្គចំនួន៤រួមមានៈប្រទេសកម្ពុជា ឡាវ ថៃ និងវៀតណាម។
ចុះផ្សាយនៅថ្ងៃ៖
ស្តាប់ - ០២:៤៥
របាយការណ៍ចំនួនពីរ ដែលចេញផ្សាយដោយគណៈកម្មការទន្លេមេគង្គ (ហៅកាត់ថា MRC) នៅថ្ងៃទី១៩តុលាបង្ហាញថា ការនេសាទនៅតែជារបរចិញ្ចឹមជីវិតដ៏សំខាន់របស់ប្រជាជនក្នុងប្រទេសកម្ពុជា ឡាវ ថៃ និងវៀតណាម។ ក៏ប៉ុន្តែ ការនេសាទហួសកម្រិតកំពុងដាក់សម្ពាធយ៉ាងខ្លាំងដល់ជលផលនៅអាងទន្លេមេគង្គ។
នៅប្រទេសកម្ពុជា គណៈកម្មការទន្លេមេគង្គរកឃើញថា ១១ទីតាំងពលរដ្ឋកំពុងនេសាទហួសកម្រិតរួមមាន៖ ខេត្តបាត់ដំបង ស្ថិតនៅស្រុកឯកភ្នំ តំបន់ព្រែកទាល់ ,ខេត្តកំពង់ឆ្នាំង ស្ថិតនៅស្រុកបរិបូរ ភូមិឆ្នុកទ្រូ ,ខេត្តកំពង់ធំ ស្ថិតនៅស្រុកកំពង់ស្វាយ ,ខេត្តពោធិ៍សាត់ ស្ថិតនៅស្រុកក្រគរ ,ខេត្តសៀមរាប ស្ថិតនៅសហគមន៍កំពង់ភ្លុក ,ខេត្តក្រចេះ ស្ថិតនៅស្រុកសំបូរ ,ខេត្តកណ្ដាល ស្ថិតក្នុងស្រុកពញាឮ និងខេត្តរតនគិរី ស្ថិតនៅស្រុកចំនួនពីរស្រុកវើនសៃនិងស្រុកលំផាត់។
ក្រៅពីសកម្មភាពនេសាទហួសកម្រិត ការខូចខាតទីជម្រកបណ្តាលមកពីកំណើនប្រជាជនយ៉ាងសន្ធឹកសន្ធាប់ ការអភិវឌ្ឍហេដ្ឋារចនាសម្ព័ន្ធ និងការប្រែប្រួលអាកាសធាតុ ក៏កំពុងដាក់សម្ពាធយ៉ាងខ្លាំងលើជលផលអាងទន្លេមេគង្គក្រោមដែរ ស្របពេលដែលបម្រែបម្រួលនៃប្រព័ន្ធអេកូឡូស៊ីក្នុងអាងនេះ កំពុងជះឥទ្ធិពលលើស្ថានភាពសង្គម។
នៅចំពោះមុខសម្ពាធដែលកំពុងតែកើតមានលើជលផលនៅអាងទន្លេមេគង្គយ៉ាងដូច្នេះ គណៈកម្មការទន្លេមេគង្គផ្ដល់អនុសាសន៍ឲ្យមានការគាំពារដល់ការស្តុកបរិមាណត្រី ដើម្បីធានាឲ្យមានការផ្គត់ផ្គង់ស្បៀងសម្រាប់ប្រជាជនរាប់លានអ្នក សម្រាប់បង្ការការធ្លាក់ចុះបន្ថែមទៀតនៃប្រាក់ចំណូលរបស់ក្រុមគ្រួសារប្រជាជន៤ប្រទេសដែលរស់នៅអាងទន្លេមេគង្គក្រោម។ ក្នុងនោះ២២ភាគរយ ក្នុងចំណោមគ្រួសារចំនួន២.៨០០ កំពុងជួបបញ្ហាប្រឈមលើប្រាក់ចំណូល ដែលបណ្ដាលមកពីការផ្លាស់ប្តូរអវិជ្ជមានក្នុងធនធានទឹករួមមានៈ កសិកម្ម វារីវប្បកម្ម មឆ្ឆា និងសត្វ និងរុក្ខជាតិក្នុងទឹកផ្សេងទៀត។
គណៈកម្មការទន្លេមេគង្គឲ្យជាយោបល់ដល់ប្រទេសទាំង៤ទៀតថា ការចិញ្ចឹមជីវិតមិនពាក់ព័ន្ធធនធានទឹកដទៃទៀត រួមទាំងការងារ ឬមុខជំនួញ ឬ ពាណិជ្ជកម្មដែលមានប្រាក់ចំណេញ ដើរតួនាទីរឹតតែសំខាន់ និងអាចកាត់បន្ថយភាពងាយរងគ្រោះលើបម្រែបម្រួលនានាក្នុងធនធានទឹកទន្លេមេគង្គ។ ហើយនៅមានវិសាលភាពធំគួរឲ្យកត់សម្គាល់សម្រាប់ការធ្វើឲ្យប្រសើរឡើងវិញ ដែលរដ្ឋាភិបាលអាចរៀបចំចេញជាគោលនយោបាយ ប្រសិនបើសហគមន៍ត្រូវបានការពារពីភាពងាយរងគ្រោះដោយទឹក និងភាពងាយរងគ្រោះពាក់ព័ន្ធនឹងការប្រែប្រួលអាកាសធាតុ។
សូមជម្រាបជូនថា គណៈកម្មការទន្លេមេគង្គ មានប្រទេសនៅតាមដងទន្លេមេគង្គចំនួន ៤ ជាសមាជិក ក្នុងនោះមាន កម្ពុជា ឡាវ ថៃ និងវៀតណាម។ នៅឆ្នាំ២០១៥ ប្រទេសចិនបានផ្ដួចផ្ដើម និងបង្កើតឲ្យមានយន្តការថ្មីមួយទៀត ដើម្បីដោះស្រាយបញ្ហារបស់ប្រទេសក្នុងតំបន់ទន្លេមេគង្គ ដែលចិនដាក់ឈ្មោះថា យន្តការកិច្ចសហប្រតិបត្តិការមេគង្គ-ឡានឆាង ដោយមានប្រទេស៦ជាសមាជិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ