លោកហ៊ុន សែន៖ដើម្បីរឹងមាំសេដ្ឋកិច្ចឡើងវិញ កម្ពុជានិងប្រទេសមេគង្គដទៃត្រូវពួនដៃសហការគ្នា
នៅថ្ងៃព្រហស្បតិ៍នេះ កម្ពុជាធ្វើជាម្ចាស់ផ្ទះរៀបចំកិច្ចប្រជុំកំពូលមហាអនុតំបន់មេគង្គ (GMS) លើកទី៧ ក្រោមប្រធានបទ មហាអនុតំបន់មេគង្គ ៖ ពង្រឹងភាពខ្លាំងដើម្បីទប់ទល់នឹងបញ្ហាប្រឈមនៃទសវត្សរ៍ថ្មី។ កិច្ចប្រជុំកំពូលនេះ មានការចូលរួមពីភាគីចិន វៀតណាម ឡាវ ថៃ និងភូមា។ នាយករដ្ឋមន្រ្តីកម្ពុជា លោកហ៊ុន សែន បានប្រាប់មេដឹកនាំប្រទេសទាំងនេះថា ដើម្បីមានភាពរឹងមាំទាំងផ្នែកសង្គម និងសេដ្ឋកិច្ចឡើងវិញក្រោយចប់វិបត្តិកូវីដ១៩ គឺត្រូវលើកកម្ពស់កិច្ចសហការ និងសាមគ្គីភាពរវាងគ្នា និងគ្នា។
ចុះផ្សាយនៅថ្ងៃ៖
ស្តាប់ - ០២:១៥
ការពន្លឿនការអនុវត្តកម្មវិធីកិច្ចសហប្រតិបត្តិការ និងការលើកកម្ពស់សាមគ្គីភាពប្រកបដោយភាពហ្មត់ចត់ ក្រោមយន្តការពហុភាគីនិយម គឺជាគន្លឹះដ៏ចាំបាច់ ដើម្បីធានាបាននូវការងើបឡើងវិញយ៉ាងរឹងមាំនៃការអភិវឌ្ឍសង្គម និងសេដ្ឋកិច្ចសម្រាប់ប្រទេសមហាអនុតំបន់ទន្លេមេគង្គនៅក្រោយពេលវិបត្តិជំងឺកូវីដ១៩ ត្រូវបានបញ្ចប់។ នេះ គឺជាការគូសបញ្ជាក់របស់លោកនាយករដ្ឋមន្រ្តីហ៊ុន សែន នៅចំពោះមុខមេដឹកនាំប្រទេសតាមបណ្តោយដងទន្លេមេគង្គតាមប្រព័ន្ធអនឡាញ។ ការលើកឡើងនេះ គឺបន្ទាប់ពីនាយករដ្ឋមន្ត្រីកម្ពុជាមើលឃើញថា បញ្ហាឆ្លងរាលដាលនៃជំងឺកូវីដ១៩ បានរាំងស្ទះ និងជាបញ្ហាប្រឈមថ្មីសម្រាប់ការអភិវឌ្ឍរបស់ប្រទេសមហាអនុតំបន់ទន្លេមេគង្គ។
បើតាមលោកនាយករដ្ឋមន្រ្តីកម្ពុជា ការខិតខំរួមគ្នារបស់ប្រទេសទន្លេមេគង្គ គឺពិតជាមានសារសំខាន់ណាស់ក្នុងការស្តារ និងជំរុញសកម្មភាពសេដ្ឋកិច្ចឱ្យមានកំណើនជាថ្មី ជាពិសេសតាមរយៈការដាក់ចេញនូវ «ការឆ្លើយតបនឹងជំងឺកូវី១៩ និងផែនការស្តារឡើងវិញឆ្នាំ ២០២១-២០២៣» នាពេលនេះ។ ការដាក់ចេញផែនការនេះ គឺដើម្បីចាត់វិធានការទាន់ពេលវេលា និងប្រកបដោយការទទួលខុសត្រូវរួមគ្នាខ្ពស់ក្នុងការធានានូវប្រតិបត្តិការដោយរលូននៃខ្សែច្រវាក់ផ្គត់ផ្គង់ពាណិជកម្ម វិនិយោគ ទេសចរណ៍ និងការការពារសុខភាពសាធារណៈក្នុងតំបន់។
គួរបញ្ជាក់ជូនថា គេរំពឹងថា វិបត្តិជំងឺកូវីដ១៩ អាចនឹងធូរស្រាលនាពេលខាងមុខ ដោយសារសន្ទុះ និងការពង្រីកវិសាលភាពនៃការចាក់វ៉ាក់សាំងតាមប្រទេសនីមួយៗកំពុងមានវឌ្ឍនភាពល្អប្រសើរ។ ប៉ុន្តែ ពិភពលោកទាំងមូលនៅតែប្រឈមនឹងហានិភ័យនៃការមកដល់នូវរលកថ្មីៗនៃជំងឺនេះ បង្កឡើងដោយមេរោគបំប្លែងថ្មីដែលតា ដែលនឹងបន្តរំខានដល់សកម្មភាព សង្គម និងសេដ្ឋកិច្ច រាប់ចាប់ពីសុខភាពសាធារណៈ លំហូរទេសចរ រហូតដល់ការរអាក់រអួលនៃខ្សែច្រវាក់ផ្គត់ផ្គង់ពិភពលោក។ នេះនិយាយជារួម។
និយាយដោយឡែក សម្រាប់ប្រទេសកម្ពុជាវិញ លោកហ៊ុន សែន បានអះអាងថា រលកថ្មីនៃជំងឺកូវីដ១៩នេះ នៅតែបង្កផលប៉ះពាល់ដ៏ស្រួចស្រាល់មកលើសេដ្ឋកិច្ចកម្ពុជា ជាអាទិ៍នៅក្នុងវិស័យវាយនភណ្ឌ ទេសចរណ៍ និងវិស័យសេវាខ្លះទៀត ដែលជាកត្តានាំឱ្យការងើបឡើងនៃសេដ្ឋកិច្ចសម្រាប់ឆ្នាំ ២០២១ នេះនៅតែប្រឈមនឹងភាពមិនប្រាកដប្រជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ