និយ័តករមូលបត្រកម្ពុជាតម្រូវឲ្យក្រុមហ៊ុន GFX ដោះស្រាយជាបន្ទាន់ជាមួយអ្នកដាក់ប្រាក់វិនិយោគ
និយ័តករមូលបត្រកម្ពុជា បានចេញសេក្តីប្រកាសមួយកាលពីម្សិលមិញ ដោយតម្រូវឲ្យក្រុមហ៊ុន GOLDFX INVESTMENT ហៅកាត់ GFX ធ្វើការដោះស្រាយជាបន្ទាន់ជាមួយនឹងអតិថិជនរបស់ខ្លួនដែលបានដាក់ប្រាក់វិនិយោគរាប់សិបលានដុល្លារជាមួយក្រុមហ៊ុននេះ។ ចំណាត់ការរបស់និយ័តករមូលបត្រកម្ពុជាយ៉ាងដូច្នេះ គឺបន្ទាប់ពីក្រុមពលរដ្ឋដែលបានដាក់ប្រាក់វិនិយោគជាមួយក្រុមហ៊ុននេះ ធ្វើការទាមទារជាថ្មីទៀតឲ្យក្រុមហ៊ុន សងប្រាក់ដើមទាំងអស់ត្រឡប់មកវិញ ខណៈក្រុមហ៊ុនបានទូទាត់ប្រាក់ឲ្យមកវិញតែ៣០ភាគរយប៉ុណ្ណោះ។
ចុះផ្សាយនៅថ្ងៃ៖
ស្តាប់ - ០២:១៣
ដោយបញ្ជាក់ថាក្រុមហ៊ុន GFXបានទទួលអាជ្ញាបណ្ណធ្វើអាជីវកម្មជាភ្នាក់ងារឈ្មួញជើងសារឧបករណ៍និស្សន្ទ និយ័តករមូលបត្រកម្ពុជា បានចេញសេចក្តីប្រកាសមួយនៅថ្ងៃទី១៦កក្កដា២០២១ ដោយតម្រូវឲ្យក្រុមហ៊ុននេះធ្វើការដោះស្រាយជាបន្ទាន់ជាមួយនឹងអតិថិជនរបស់ខ្លួនដែលដាក់ប្រាក់វិនិយោគ។ ទឹកប្រាក់របស់ពលរដ្ឋដែលបានដាក់វិនិយោគជាមួយនឹងក្រុមហ៊ុននេះគឺជិត៣០លានដុល្លារ។
បើតាមនិយ័តករមូលបត្រកម្ពុជា ក្រុមហ៊ុនGFX អាចព្យូរប្រតិបត្តិការរបស់ខ្លួនបាន តែមិនឲ្យបិទក្រុមហ៊ុននោះទេ និងត្រូវដោះស្រាយប្រាក់វិនិយោគឲ្យអតិថិជនវិញជាបន្ទាន់ផងដែរ។ មកដល់បច្ចុប្បន្ន និយ័តករមូលបត្រកម្ពុជា បានទទួលពាក្យបណ្តឹងពីពលរដ្ឋប្រមាណ៨០០បណ្តឹង ដែលបានប្តឹងក្រុមហ៊ុន GFXនេះ ខណៈសំណុំរឿងពាក់ព័ន្ធនឹងក្រុមហ៊ុននេះកំពុងស្ថិតនៅដៃតុលាការនៅឡើយ។
បើតាមតំណាងវិនិយោគិន នៃក្រុមហ៊ុន GFX ពួកគេបានដាក់ញាត្តិជាថ្មីទៀត ដើម្បីបដិសេធនឹងដំណោះស្រាយ របស់គណៈកម្មការដោះស្រាយវិវាទរបស់ក្រុមហ៊ុននេះដែលទូទាត់ប្រាក់មកកាន់អតិថិជនវិញតែ៣០ភាគរយនៃប្រាក់ដើម។ ក្រុមនេះ អះអាងថាពួកគេរក្សាជំហរទាមទារប្រាក់ដើម ១០០ភាគរយ ត្រឡប់មកវិញ ដើម្បីយកទៅផ្គត់ផ្គង់ជីវភាព និងទូទាត់សងធនាគារវិញ ព្រោះប្រាក់ទាំងនោះពួកគេបានខ្ចីពីធនាគារមកវិនិយោគជាមួយក្រុមហ៊ុនGFX ។
បើតាមមេធាវីក្រុមហ៊ុន GFX គិតចាប់ពីថ្ងៃទី២២ ខែមិថុនាមក ក្រុមហ៊ុនបានណាត់ជួបអតិថិជនសរុបជាង៣០ភាគរយ នៃអតិថិជនសរុបប្រមាណ ៣ពាន់នាក់។ ក្នុងនោះអ្នកដែលបានយល់ព្រមទទួលដំណោះស្រាយរួមរវាងក្រុមហ៊ុននិងអតិថិជនក៏មានចំនួនច្រើនហើយដែរ។
បើតាមក្រុមហ៊ុននេះ គឺមានជនបរទេសចំនួន៣នាក់ ដែលជាអ្នកលួចដកប្រាក់ចេញពីក្រុមហ៊ុននោះគឺមានជនជាតិសិង្ហបុរី២នាក់ និងជនជាតិម៉ាឡេស៊ីម្នាក់ ហើយក្រុមហ៊ុននេះចង់ឲ្យពលរដ្ឋសហការគ្នាប្តឹងជនបរទេសទាំងនោះទៅតុលាការ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ