មេគង្គ-ឡានឆាង៖ ចិននឹងជួយប្រទេសមេគង្គថែមទៀតក្រោយវិបត្តិជំងឺរាតត្បាតសកល
តាមរយៈកិច្ចប្រជុំមេគង្គ-ឡានឆាង ដែលគ្រោងធ្វើឡើងនាពេលខាងមុខនេះ ចិននឹងបង្កើនទំនាក់ទំនងឲ្យកាន់តែស៊ីជម្រៅ និងជួយប្រទេសមេគង្គថែមទៀត ក្រោយវិបត្តិកូវីដ១៩។ នេះជាការបញ្ជាក់ របស់អ្នកនាំពាក្យក្រសួងការបរទេសចិន ដែលត្រូវបានចុះផ្សាយនៅថ្ងៃទី០៦ ខែមិថុនា។ រដ្ឋមន្ត្រីការបរទេសកម្ពុជានឹងចូលរួមកិច្ចប្រជុំនេះ នៅថ្ងៃទី៧-៨ ខែមិថុនាសប្តាហ៍ក្រោយ នៅប្រទេសចិន។
ចុះផ្សាយនៅថ្ងៃ៖
លោក ប្រាក់ សុខុន រដ្ឋមន្ត្រីការបរទេសកម្ពុជានឹងចូលរួមកិច្ចប្រជុំពិសេសរដ្ឋមន្ត្រីការបរទេសអាស៊ាន-ចិន និងកិច្ចប្រជុំរដ្ឋមន្ត្រីការបរទេសមេគង្គ-ឡានឆាង(MLC)លើកទី៦ នៅថ្ងៃទី៧ និងទី៨ ខែមិថុនា នៅក្រុងឆុងឈីងប្រទេសចិន។ កម្ពុជារំពឹងថាកិច្ចប្រជុំរដ្ឋមន្ត្រីការបរទេសមេគង្គ-ឡានឆាង នឹងធ្វើឲ្យកាន់តែស៊ីជម្រៅថែមទៀតនូវចំណងមិត្តភាពរវាងបណ្តាប្រទេសមេគង្គ និងប្រទេសចិន។ នេះបើតាមក្រសួងកាបរទេសកម្ពុជាកាលពីថ្ងៃទី៤ ខែមិថុនា។
អ្នកនាំពាក្យក្រសួងការបរទេសចិន លោក Wang Wenbin បានថ្លែងនៅថ្ងៃទី៦ ខែមិថុនាថា នៅក្នុងកិច្ចប្រជុំរដ្ឋមន្ត្រីការបរទេសមេគង្គ-ឡានឆាងលើកទី៦ នៅថ្ងៃទី០៨ ខែមិថុនា ខាងមុខនេះ នឹងមានការវាយតម្លៃលើអ្វីដែលបានធ្វើនាពេលកន្លងមក លើកិច្ចសហប្រតិបត្តិការរបស់ចិនជាមួយប្រទេសទាំង៥។ លោកបន្តថាចិននឹងធ្វើការរួមគ្នា ដើម្បីបង្កើតខ្សែក្រវ៉ាត់អភិវឌ្ឍន៍សេដ្ឋកិច្ចមេគង្គ - ឡានឆាង ពង្រឹងការស្តារសេដ្ឋកិច្ច និងវិបុលភាពក្នុងតំបន់ឡើងវិញ នៅក្រោយការរាតត្បាតកូវីដ១៩ និងចូលរួមចំណែកក្នុងការកសាងសហគមន៍អាស៊ាន និងសមាហរណកម្មសេដ្ឋកិច្ចក្នុងតំបន់។
កិច្ចសហប្រតិបត្តិការមេគង្គ-ឡានឆាង ត្រូវបានបង្កើតឡើង កាលពីឆ្នាំ ២០១៥ ដែលមានសមាជិកសរុប ៦ រួមមាន កម្ពុជា ចិន ឡាវ មីយ៉ាន់ម៉ា ថៃ និងវៀតណាម។
លោកបណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា ថាអ្វីដែលជាការរំពឹងទុកតាមរយៈកិច្ចប្រជុំនេះ គឺនឹងធ្វើឲ្យមានការគិតគូរខ្លាំងថែមទៀត ពីប្រទេសចិន មកលើប្រទេសតំបន់មេគង្គ ពាក់ព័ន្ធនឹងយុទ្ធនាការក្នុងការប្រយុទ្ធប្រឆាំងកូវីដ១៩ និងជំនួយអភិវឌ្ឍន៍ផ្សេងៗ ហើយនឹងជំរុញឲ្យមានការវិនយោគថែមទៀតផងដែរ។ បើតាមលោកបណ្ឌិត គិន ភា ថា កិច្ចសហប្រតិបត្តិការមេគង្គ-ឡានឆាងនឹងបន្ថែមពីលើអ្វី ដែលជាទំនាក់ទំនងដ៏ល្អរវាងកម្ពុជា និងចិន។
សូមជម្រាបថា នៅក្រោយកិច្ចប្រជុំទាំងពីរខាងលើ រដ្ឋមន្ត្រីការបរទេសកម្ពុជា និងរដ្ឋមន្ត្រីការបរទេសចិននឹងមានជំនួបទ្វេភាគី និងធ្វើជាអធិបតី ដើម្បីចុះហត្ថលេខាលើឯកសារចំនួនពីរ គឺអនុស្សារណៈយោគយល់គ្នាស្តីពីកិច្ចសហប្រតិបត្តិការលើវិស័យទូរគមនាគមន៍ព័ត៌មាន និងគម្រោងស្តីពីកិច្ចសហប្រតិបត្តិការលើវិស័យវប្បធម៌៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ