គណៈកម្មការទន្លេមេគង្គព្រួយបារម្ភចំពោះកម្រិតទឹកធ្លាក់ចុះទាបនៅតំបន់ចំនួន៤ក្នុងប្រទេសកម្ពុជា
កម្រិតទឹកទន្លេមេគង្គនៅតំបន់យ៉ាងហោចណាស់៤នៅកម្ពុជា បានធ្លាក់ចុះជាបន្តបន្ទាប់គួរឲ្យព្រួយបារម្ភ។ នេះគឺជាការគូសបញ្ជាក់របស់គណៈកម្មការទន្លេមេគង្គ នៅក្នុងសេចក្ដីថ្លែងការណ៍មួយ ចេញផ្សាយនៅថ្ងៃទី១២ខែកុម្ភៈ។ ក្រៅពីសម្ដែងក្ដីបារម្ភ គណៈកម្មការទន្លេមេគង្គបានគូសបញ្ជាក់ទៀតថា ការធ្លាក់ចុះទាបនៃកម្រិតទឹកទន្លេមេគង្គនេះ ផ្ដល់ផលប៉ះពាល់យ៉ាងខ្លាំងដល់ប្រព័ន្ធអេកូឡូស៊ី និងជាពិសេសគឺសន្តិសុខស្បៀងរបស់ប្រជាជនដែលរស់នៅតាមដងទន្លេ។
ចុះផ្សាយនៅថ្ងៃ៖
ស្តាប់ - ០២:៤៣
ទន្លេមេគង្គក្នុងតំបន់ចំនួន៤នៅកម្ពុជាដែលមានកម្ពស់ទឹកធ្លាក់ចុះនោះ មានដូចជា៖ នៅខេត្តកំពង់ចាម នៅអ្នកលឿង នៅព្រែកក្ដាម និងនៅទន្លេបាសាក់ក្នុងទីក្រុងភ្នំពេញជាដើម។ ទន្លេមេគង្គនៅតំបន់ទាំងបួននេះ បើតាមការអង្កេតរបស់គណៈកម្មការទន្លេមេគង្គ គឺបានចាប់ផ្ដើមធ្លាក់ចុះតាំងពីដើមខែធ្នូឆ្នាំ២០២០មកម្ល៉េះ ហើយចាប់ពីខែមករាឆ្នាំ២០២១រហូតមកទល់ពេលនេះ កម្ពស់ទឹកបន្តធ្លាក់ចុះយ៉ាងហោចណាស់ ០,២០ម៉ែត្រនៅក្នុងមួយថ្ងៃ។
ក្រៅពីតំបន់ទាំង៤នេះ កម្ពស់ទឹកនៃទន្លេមេគង្គក្នុងខេត្តស្ទឹងត្រែងនិងក្រចេះក៏ប្រែប្រួលចុះឡើង ក្នុងចន្លោះពី -០,០២ម៉ែត្រ ដល់ ០,០៥ម៉ែត្រ ផងដែរ។ ប៉ុន្តែកម្ពស់ទឹកនេះ បើធៀបទៅនឹងកម្ពស់ទឹកជាមធ្យម គឺមានកម្រិតខ្ពស់ជាង។
បើតាមគណៈកម្មការទន្លេមេគង្គ ការធ្លាក់ចុះនៃកម្ពស់ទឹកទន្លេមេគង្គ មិនមែនកើតមានតែនៅប្រទេសកម្ពុជាទេ តែក៏កើតមានផងដែរនៅប្រទេសតំបន់មេគង្គក្រោមដទៃទៀត ដូចជាប្រទេសថៃ ឡាវ និងវៀតណាម។ ការធ្លាក់ចុះទាបនៃកម្រិតទឹកនេះបណ្ដាលមកពីភ្លៀងធ្លាក់តិចនាដើមឆ្នាំ២០២១ ការផ្លាស់ប្ដូរលំហូរទឹកនៅតំបន់មេគង្គលើ ដំណើរការនៃទំនប់វារីអគ្គិសនីនៅតាមដៃទន្លេ និងជាពិសេសគឺការខ្ទប់ទឹកទុកនៅទំនប់វារីអគ្គិសនី Jinghong ក្នុងខេត្តយូណានប្រទេសចិន។
លោកបណ្ឌិត Winai Wangpimoon នាយកទទួលបន្ទុកផ្នែកគាំទ្របច្ចេកទេសនៃគណៈកម្មការទន្លេមេគង្គ គូសបញ្ជាក់ថា កម្រិតទឹកទាបនៅទន្លេមេគង្គ ចន្លោះពីទំនប់វារីអគ្គិសនី Jinghong និងតំបន់ដីសណ្ដទន្លេមេគង្គក្នុងប្រទេសវៀតណាមនាពេលនេះ បានផ្ដល់ផលប៉ះពាល់យ៉ាងខ្លាំងដល់ការធ្វើដំណើរតាមដងទន្លេ និងការបម្លាស់ទីរបស់ត្រី ក៏ដូចជាការប្រកបរបរកសិកម្មរបស់ពលរដ្ឋ។ លោកបានអំពាវនាវដល់ប្រទេសចិននិងបណ្ដាប្រទេសនៅតំបន់មេគង្គក្រោម ឲ្យចែករំលែកគម្រោងគ្រប់គ្រងទន្លេមេគង្គដល់ខ្លួន ដើម្បីធ្វើយ៉ាងណាជួយគ្រប់គ្រងហានិភ័យនៅប្រទេសតំបន់មេគង្គក្រោមប្រកបដោយប្រសិទ្ធភាព។
សូមជម្រាបជូនថា ទន្លេមេគង្គដែលមានប្រភពនៅខ្ពង់រាបទីបេ ហូរកាត់ប្រទេសចំនួន៦ គឺប្រទេសចិន ភូមា ថៃ ឡាវ កម្ពុជា និងវៀតណាម មុននឹងហូរធ្លាក់ទៅកាន់សមុទ្រចិនខាងត្បូង។ មានប្រវែងសរុបជាង៤ពាន់គីឡូម៉ែត្រ ទន្លេមេគង្គត្រូវបានគេចាត់ទុកថា ជាប្រភពសន្តិសុខស្បៀងដ៏សំខាន់សម្រាប់ប្រជាជនជិត៧០លាននាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ