ចិន-គណៈកម្មាធិការទន្លេមេគង្គចុះកិច្ចព្រមព្រៀងស្តីពី កាចែករំលែកព័ត៌មានទិន្នន័យទឹកពេញមួយឆ្នាំ
ប្រទេសចិន នឹងផ្តល់ព័ត៌មាន ឬចែករំលែកទិន្នន័យស្តីពីកម្រិតទឹកពេញមួយឆ្នាំ មកដល់គណៈកម្មាធិការទន្លេមេគង្គ ដែលជាក្រុមប្រទេសនៅផ្នែកខាងក្រោមរបស់ខ្លួន។ ការសន្យានេះ ធ្វើឡើងនៅថ្ងៃទី ២២ តុលានេះ តាមរយៈការចុះហត្ថលេខាលើកិច្ចព្រមព្រៀងមួយជាមួយគណៈកម្មាធិការទន្លេមេគង្គដែលរួមមាន ប្រទេសឡាវ ថៃ កម្ពុជា និងវៀតណាម។
ចុះផ្សាយនៅថ្ងៃ៖
ស្តាប់ - ០២:២៥
កិច្ចព្រមព្រៀងនេះ ត្រូវបានចុះហត្ថលេខានៅថ្ងៃទី ២២ តុលានេះ នៅឯទីក្រុងវៀងច័ន្ទប្រទេសឡាវ រវាងរដ្ឋមន្ត្រីក្រសួងធនធានទឹកចិននិងគណៈកម្មាធិការទន្លេមេគង្គ ដែលរួមមានប្រទេសឡាវ ថៃ កម្ពុជា និង វៀតណាម។ តាមរយៈកិច្ចព្រមព្រៀងនេះ ត្រូវបានលោក An Pich Hatda អគ្គលេខាធិការគណៈកម្មាធិការទន្លេមេគង្គចាត់ទុកថា គឺជាភស្តុតាងប្រវត្តិសាស្ត្រមួយនៃកិច្ចសហប្រតិបត្តិការវាងប្រទេសចិន និងគណៈកម្មាធិការទន្លេមេគង្គ។ នេះបើតាមសេចក្តីប្រកាសព័ត៌មានរបស់គណៈកម្មាធិការទន្លេមេគង្គ ចេញផ្សាយនៅថ្ងៃទី ២២ តុលានេះ។
គួរជំរាបជូនថា ក្នុងរយៈពេល១៨ឆ្នាំកន្លងមក ប្រទេសចិនបានចែករំលែកព័ត៌មានឬផ្តល់ទិន្នន័យពីកម្រិតទឹក និងទិន្នន័យរបាយទឹកភ្លៀង តែនៅក្នុងអំឡុងខែមិថុនាដល់ខែតុលាប៉ុណ្ណោះ ពិសេសនៅក្នុងរដូវទឹកជំនន់ចេញពីស្ថានីយ៍វារីអគ្គិសនីចំនួនពីររបស់ចិន ដែលស្ថិតនៅក្នុងខេត្តយូណានភាគខាងលើនៃទន្លេមេគង្គ។ ប៉ុន្តែតាមរយៈកិច្ចព្រមព្រៀងនៅថ្ងៃនេះ ប្រទេសចិន នឹងពង្រីកការចែករំលែកព័ត៌មាន ឬផ្តល់ទិន្នន័យពីរដងក្នុងមួយថ្ងៃ និងរយៈពេលពេញមួយឆ្នាំ ពីទិន្នន័យដែលចេញពីស្ថានីយ៍វារីអគ្គិសនីទាំងពីររបស់ចិន។ តាមរយៈកិច្ចព្រមព្រៀងនេះ ប្រទេសចិនក៏យល់ព្រមចែករំលែកពីព័ត៌មានបន្ទាន់ៗ ឬប្រកាសអាសន្ន ពីកម្រិតទឹកភ្លៀងឡើងឬស្រកចុះនៅក្នុងទន្លេមេគង្គផ្នែកខាងលើ និងជាពិសេស គឺព័ត៌មានស្តីពីការបើកទំនប់ទឹកនៅផ្នែកខាងលើ ដើម្បីបញ្ជៀសនូវគ្រោះទឹកជំនន់ភ្លាមៗ នៅក្នុងបណ្តាប្រទេសទន្លេមេគង្គផ្នែកខាងក្រោម។
គួរជំរាបជូនដែរថា ទន្លេមេគង្គមានប្រវែងជិត៥០០គីឡូម៉ែត្រ ដែលហូរឆ្លងកាត់ប្រទេសចំនួន៦ គឺប្រទេសចិន ភូមា ថៃ ឡាវ ប្រទេសកម្ពុជា និងប្រទេសវៀតណាម មុននឹងហូរចាក់ទៅសមុទ្រចិនខាងត្បូង។ ទន្លេនេះមានទំហំគ្រប់ដណ្តប់លើផ្ទៃដីប្រហែល២.៦លានគីឡូម៉ែត្រការ៉េ។ នៅ១៩៩៥ គណៈកម្មាធិការទន្លេមេគង្គដែលជាអង្គការអន្តររដ្ឋាភិបាលមួយត្រូវបានបង្កើតឡើងប្រទេសកម្ពុជា ថៃ ឡាវ និងប្រទេសវៀតណាម ក្នុងគោលបំណងដើម្បីគ្រប់គ្រងនិងការពារធនធានតាមដងទន្លេមេគង្គអោយមានប្រសិទ្ធិភាព។ ក្រោយមក នៅឆ្នាំ១៩៩៦ប្រទេសចិននិងប្រទេសមីយ៉ាម៉ាបានក្លាយជាសមាជិកទី៥និងទី៦ នៃគណៈកម្មការទន្លេមេគង្គ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ