ហ្វេសប៊ុក និងMRC សហការគ្នាលើកកម្ពស់ការយល់ដឹងអំពីគ្រោះទឹកជំនន់ និងគ្រោះរាំងស្ងួតក្នុងតំបន់មេគង្គក្រោម
លេខាធិការដ្ឋានគណៈកម្មការទន្លេមេគង្គ(MRCS) និងបណ្តាញសង្គមហ្វេសប៊ុក នៅថ្ងៃទី៣១ខែសីហានេះ បានប្រកាសដាក់ដំណើរការនូវគំនិតផ្តួចផ្តើមរួមគ្នាមួយ ដើម្បីផ្តល់ការជូនដំណឹងជាមុនស្តីពីគ្រោះទឹកជំនន់ និងព័ត៌មានតាមដានពីគ្រោះរាំងស្ងួត ដល់សហគមន៍ និងប្រទេសក្នុងតំបន់ទន្លេមេគង្គក្រោម។ MRCS យល់ថាគំនិតផ្តួចផ្តើមរួមគ្នានេះ មានគោលដៅលើកកម្ពស់ការយល់ដឹងរបស់សាធារណជនជាទូទៅនៅក្នុងប្រទេសដែលជាសមាជិកគណៈកម្មការទន្លេមេគង្គទាំង៤ មានកម្ពុជា វៀតណាម ឡាវ និងថៃ។
ចុះផ្សាយនៅថ្ងៃ៖
ស្តាប់ - ០១:៣៩
លោកស្រី សានទី អាឡិចហ្សាន់ឌឺ(Shanti Alexander) អ្នកគ្រប់គ្រងកិច្ចការFacebook ប្រចាំអាស៊ីប៉ាស៊ីហ្វិក បានលើកឡើងថា កិច្ចសហប្រតិបត្តិការនេះនឹងជួយដល់សហគមន៍ឲ្យចេះត្រៀមខ្លួនបង្កើតភាពធន់នឹងគ្រោះថ្នាក់ពីធម្មជាតិ និងជាពិសេសសម្រាប់ប្រជាពលរដ្ឋក្នុងតំបន់ ឲ្យពួកគេត្រៀមខ្លួនកាន់តែប្រសើរសម្រាប់វិបត្តិនេះ។
អ្នកគ្រប់គ្រងកិច្ចការហ្វេសប៊ុករូបនេះបញ្ជាក់ថា កម្មវិធីដែលមានរយៈពេល១ឆ្នាំនេះ គឺពីឆ្នាំ២០២០ ដល់ឆ្នាំ២០២១ គឺក្នុងគោលបំណងបង្កើនការយល់ដឹងដល់សាធារណជនទូទៅ និងបង្កើនសមត្ថភាពមន្រ្តី ក្នុងការប្រើប្រាស់ប្រព័ន្ធឌីជីថល សម្រាប់ការផ្សព្វផ្សាយព័ត៌មានអំពីទឹកជំនន់និងគ្រោះរាំងស្ងួត ដល់ប្រទេសទាំងបួន ដែលជាសមាជិកគណៈកម្មការទន្លេមេគង្គរួមមាន កម្ពុជា ថៃ ឡាវ និងវៀតណាម។
ជាមួយគ្នានេះ លោក អានុល័ក គិតិឃួន (Anoulak Kittikhoun) ប្រធានមន្ត្រីផ្នែកយុទ្ធសាស្ត្រ និងភាពជាដៃគូរបស់គណៈកម្មការទន្លេមេគង្គ ក៏បានឲ្យដឹងដែរថា កិច្ចសហការនេះនឹងក្លាយទៅជាកន្លែងផ្តល់ព័ត៌មានដោយរហ័ស និងទុកចិត្តសម្រាប់ប្រទេសក្នុងតំបន់អាចរៀបចំវិធានការទប់ស្កាត់បានទាន់ពេលវេលា ព្រោះថាប៉ុន្មានឆ្នាំកន្លងមកគ្រោះធម្មជាតិបានជះឥទ្ធិពលអាក្រក់យ៉ាងខ្លាំងដល់ឃឿនសេដ្ឋកិច្ចនៃប្រទេសនៅតាមដងទន្លេមេគង្គក្រោមទាំងនោះ។
យោងតាមគណៈកម្មការទន្លេមេគង្គ (MRC)ការខាតបង់ជាមធ្យមកើតចេញពីទឹកជំនន់នៅក្នុងអាងទន្លេមេគង្គក្រោមមានតម្លៃគិតជារួមពី៦០ ទៅ ៧០លានដុល្លារ ខណៈដែលទឹកជំនន់ប្រចាំរដូវ បាននាំមកនូវអត្ថប្រយោជន៍ផ្សេងៗគ្នាដល់តំបន់។ ដោយឡែក ប្រទេសកម្ពុជា និងវៀតណាមបានបាត់បង់ប្រមាណ ២ភាគ៣នៃការខូចខាតដោយទឹកជំនន់ប្រចាំឆ្នាំសរុបនៅក្នុងតំបន់ទន្លេមេគង្គ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ