ប្រមុខរដ្ឋាភិបាលកម្ពុជាប្រកាសគាំទ្រសំណើចិនក្នុងការអភិវឌ្ឍសេដ្ឋកិច្ចមេគង្គ-ឡានឆាង
ដូចការគ្រោងទុក កិច្ចប្រជុំកំពូលមេគង្គ-ឡានឆាង លើកទី៣ ត្រូវបានរៀបចំឡើងនៅថ្ងៃចន្ទនេះ តាមរយៈប្រព័ន្ធវីដេអូដោយមានប្រទេសឡាវនិងប្រទេសចិនជាសហប្រធាន។ ប្រធានបទធំរួមនៃកិច្ចប្រជុំនេះគឺ «ពង្រឹងភាពជាដៃគូ ដើម្បីវិបុលភាពរួម»។ សម្រាប់កម្ពុជា លោកនាយករដ្ឋមន្ត្រី ហ៊ុន សែន បានប្រកាសគាំទ្រនូវសំណើរបស់ចិនដែលអះអាងថាដើម្បីអភិវឌ្ឍសេដ្ឋកិច្ចមេគង្គ-ឡានឆាងនេះ ខណៈជំនាញមួយចំនួនមើលឃើញថា នេះជាយន្តការមួយរបស់ចិនក្នុងការគ្រប់គ្រងទន្លេមេគង្គនិងពង្រឹងឥទ្ធិពលរបស់ខ្លួននៅក្នុងតំបន់តែប៉ុណ្ណោះ។
ចុះផ្សាយនៅថ្ងៃ៖
ស្តាប់ - ០២:៣២
កិច្ចសហប្រតិបត្តិការមេគង្គ-ឡានឆាង នេះគឺមានសមាជិកសរុបចំនួន៦ប្រទេសគឺមាន ចិន មីយ៉ាន់ម៉ា ឡាវ ថៃ កម្ពុជា និងវៀតណាម ដែលត្រូវបានបង្កើតឡើងកាលពីឆ្នាំ២០១៤។ គឺខុសពីគណៈកម្មការទន្លេមេគង្គដែលមានសមាជិកតែ៤ប្រទេសគឺ ឡាវ ថៃ កម្ពុជា និងវៀតណាម។
នៅក្នុងកិច្ចប្រជុំលើកទី៣នេះ នៅគ្រាដែលប្រទេសនីមួយៗកំពុងជួបវិបត្តិសេដ្ឋកិច្ច ដោយសារតែកូវីដ១៩នោះ ប្រមុខរដ្ឋាភិបាលកម្ពុជា បានប្រកាសគាំទ្រសំណើរបស់ចិនដែលអះអាងថាដើម្បីអភិវឌ្ឍសេដ្ឋកិច្ចមេគង្គឡាង-ឆាងនេះ។ វិស័យអទិភាពចំនួន៤ដែលភាគីចិនលើកឡើងគឺការតភ្ជាប់តាមរយៈខ្សែក្រវ៉ាត់អភិវឌ្ឍសេដ្ឋកិច្ចមេគង្គ-ឡានឆាង និងការជំរុញច្រករបៀងពាណិជ្ជកម្ម តាមដីនិងតាមសមុទ្រអន្តរជាតិថ្មី។ កិច្ចសហការធនធានទឹក។ ការអភិវឌ្ឍដោយចេរភាពក្នុងវស័យកសិកម្ម និងបរិស្ថាន និងការលើកកម្ពស់សុខភាពសាធារណៈ តាមរយៈការបង្កើតសហគមន៍សុខភាពសាធារណៈមេគង្គ-ឡានឆាង។ នេះបើតាមសុន្ទរកថារបស់លោកនាយករដ្ឋមន្ត្រី ហ៊ុន សែន។
សូមរំឭកថា កាលពីកិច្ចប្រជុំកំពូលលើកទី១នៅឆ្នាំ២០១៦ ក្រោមមូលនិធិកិច្ចសហប្រតិបត្តិការមេគង្គ-ឡានឆាង ប្រទេសចិនបានសន្យាផ្ដល់ជំនួយហិរញ្ញវត្ថុចំនួន៣០០លានដុល្លារ ដើម្បីគាំទ្រដល់គម្រោងខ្នាតតូចនិងមធ្យមនានានៅប្រទេសតាមដងទន្លេមេគង្គទាំង៦ សម្រាប់រយៈពេល៥ឆ្នាំ ចាប់ពីឆ្នាំ២០១៨ដល់ឆ្នាំ២០២២។ ចំពោះកម្ពុជា ក្នុងរយៈពេល៣ឆ្នាំជាប់គ្នា មូលនិធិមេគង្គ-ឡានឆាង បានផ្ដល់ជំនួយលើគម្រោងចំនួន៥៥គម្រោង ដែលគិតជាទឹកប្រាក់ជាង២០លានដុល្លារ។ ជាថ្នូរនឹងកញ្ចប់លុយដែលទម្លាក់ឲ្យកម្ពុជានិងបណ្ដាប្រទេសនៅតាមដងទន្លេមេគង្គនេះ ចិនបានបន្តការសាងសង់ទំនប់វារីអគ្គិសនីមួយហើយមួយទៀតនៅផ្នែកខាងលើនៃដងទន្លេមេគង្គ ដែលចិនខ្លួនឯងហៅថា ឡានឆាង។ គិតរហូតមកទល់ពេលនេះ ចិនបានសាងសង់ទំនប់វារីអគ្គិសនីចំនួន១១លើដងទន្លេមេគង្គ និងកំពុងតែរៀបចំសាងសង់ទំនប់វារីអគ្គិសនីចំនួន៨បន្ថែមទៀត។
ប៉ុន្តែរបាយការណ៍របស់មជ្ឈមណ្ឌល Stimson ប្រចាំតំបន់អាស៊ីអាគ្នេយ៍ រកឃើញថា ទំនប់វារីអគ្គិសនីរបស់ចិននៅផ្នែកខាងលើនៃដងទន្លេមេគង្គ បានធ្វើឲ្យប្រែប្រួលយ៉ាងឆាប់រហ័សនូវលំហូរទឹក ក៏ដូចជាកម្ពស់ទឹកទន្លេ។ ការប្រែប្រួលនេះបានធ្វើឲ្យខូចខាតដល់ប្រព័ន្ធជីវៈចម្រុះក្នុងទន្លេ ប៉ះពាល់ដល់ជំរកត្រី និងធ្វើឲ្យប្រភេទត្រីខ្លះត្រូវរងគ្រោះស្ទើរតែផុតពូជ។ ជាលទ្ធផល ប្រជាជនជាង៦០លាននាក់ដែលរស់នៅតាមដងទន្លេនេះកំពុងក្លាយទៅជាជនរងគ្រោះដោយសារតែសកម្មភាពរបស់ចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ