ព្រះមហាក្សត្រទទួលយកញត្តិសុំពន្យារកិច្ចប្រជុំសភាដំបូងពីសង្គមស៊ីវិល
ពលរដ្ឋ និងព្រះសង្ឃជាច្រើនរយនាក់បានដង្ហែញត្តិទៅព្រះបរមរាជវាំងនៅព្រឹកថ្ងៃអាទិត្យនេះ ដើម្បីស្នើសុំព្រះមហាក្សត្រពន្យារពេលនៃបើកប្រជុំសភាដំបូង ដែលគ្រោង ធ្វើនៅចន្ទស្អែក។ តំណាងរបស់ព្រះបរមរាជវាំងបានចេញមកយកញត្តិពីតំណាងសង្គមស៊ីវិលនៅក្រៅរបងព្រះបរមរាជវាំង។
ចុះផ្សាយនៅថ្ងៃ៖
តំណាងសង្គមស៊ីវិល៤នាក់ត្រូវបានអនុញ្ញាតអោយនាំយកញត្តិទៅថ្វាយព្រះមហាក្សត្រតាមរយៈមន្ត្រីព្រះបរមរាជវាំង។ គឺជាញត្តិដែលសរសេររួមគ្នាដោយអង្គការសង្គមស៊ីវិលចំនួន១០ដែលស្នើអោយព្រះមហាក្សត្រពន្យារការប្រជុំសភាដំបូងនៅថ្ងៃចន្ទ២៣កញ្ញានេះ។ អង្គការសមាគមទាំងនោះរួមមាន សមាគមប្រជាធិបតេយ្យឯករាជ្យ នៃសេដ្ឋកិច្ចក្រៅប្រព័ន្ធ សហជីពសេរីកម្មករ សមាគមបណ្តាញយុវជនកម្ពុជាជាដើម។
នៅព្រឹកថ្ងៃអាទិត្យនេះដែរ ពលរដ្ឋ និងព្រះសង្ឃ ជាច្រើនរយនាក់បានដង្ហែញត្តិនេះទៅព្រះបរមរាជវាំង។ ក៏ប៉ុន្តែក្បួនដង្ហែត្រូវបានរារាំងដោយប៉ូលិស ហើយក្រោយមក តំណាងរបស់សង្គមស៊ីវិលក៏ត្រូវបានអនុញ្ញាតអោយនាំយកញត្តិនេះទៅជូនតំណាងព្រះមហាក្សត្រ។
ញត្តិរបស់ក្រុមអង្គការសង្គមស៊ីវិលបានសរសេរទូលថ្វាយព្រះមហាក្សត្រអំពីព្រឹត្តិការណ៍ដ៏ចម្រូងចម្រាសដែលបង្កឡើងដោយគណបក្សជាប់ឆ្នោតទាំងពីរ រួមមានទាំងការពង្រាយកងកម្លាំងប្រដាប់អាវុធ និងគម្រោងបាតុកម្មក្នុងពេលកន្លងមក។ ញត្តិដដែលបន្តថា គណបក្សទាំងពីរគួរតែមានពេលវេលាច្រើនជាងនេះដើម្បីអាចពិភាក្សា ដោះស្រាយបញ្ហាជាតិដោយសន្តិវិធី។ ក្រុមសង្គមស៊ីវិលបានស្នើព្រះមហាក្សត្រសម្រេចព្រះទ័យពន្យារពេលនៃកិច្ចប្រជុំដំបូងរបស់រដ្ឋសភា ទៅពេលវេលាណាសមស្របក្នុងពេលខាងមុខ ក្រោយការមានឯកភាពគ្នារវាងគណបក្សទាំងពីរ។
ក្រោយពីបានជូនញត្តិទៅមន្ត្រីព្រះបរមរាជវាំងហើយ លោក វន់ ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធដែលជាតំណាងមួយរូបរបស់អង្គការសមាគមទាំង១០បានថ្លែងប្រាប់វិទ្យុបារាំងថា លោកសង្ឃឹមថា ព្រះមហាក្សត្រនឹងសម្រេចព្រះទ័យពន្យារកិច្ចប្រជុំសភានេះ។
គួររម្លឹកថា កាលពីថ្ងៃសៅរ៍គណបក្សសង្គ្រោះជាតិក៏បានប្រមូលស្នាមមេដៃចំនួន២៦ម៉ឺននាក់ពីប្រជាពលរដ្ឋដែលអំពាវនាវអោយព្រះមហាក្សត្រពន្យារពេល ប្រជុំសភាដំបូងនេះដូចគ្នាដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ