លោក កឹម សុខា បដិសេធមិនជាប់ពាក់ព័ន្ធនឹងមនុស្សបីនាក់ដែលប៉ូលីសអន្តរជាតិកំពុងតាមចាប់ខ្លួន
លោក កឹម សុខា អនុប្រធានទី១នៃរដ្ឋសភា និងជាអនុប្រធានគណបក្សសង្គ្រោះជាតិ បានច្រានចោលចំពោះការជាប់ពាក់ព័ន្ធនឹងមនុស្សបីនាក់ ដែលប៉ូលីសអន្តរជាតិកំពុងតាមចាប់ខ្លួន។ ការច្រានចោលបានធ្វើឡើង ក្រោយពីសារព័ត៌មានក្នុងស្រុកជាច្រើនបានផ្សព្វផ្សាយពីដំណឹងនៃការចាប់ខ្លួនពលរដ្ឋខ្មែរសញ្ជាតិអាមេរិកទាំងបីរូប ដោយភ្ជាប់នឹងរូបថតរបស់លោក កឹម សុខា ផងដែរ។
ចុះផ្សាយនៅថ្ងៃ៖
ស្តាប់ - ០១:៥១
មិនមែនមានតែលោក កឹម សុខា អនុប្រធានទី១នៃរដ្ឋសភានោះទេ ដែលបានច្រានចោល ចំពោះទំនាក់ទំនងរបស់លោក កឹម សុខា ជាមួយនឹងមនុស្សបីនាក់ដែលប៉ូលីសអន្តរជាតិកំពុងតាមរកចាប់ខ្លួននោះ សូម្បីតែលោក ខៀវ សុភ័ក្រ អ្នកនាំពាក្យក្រសួងមហាផ្ទៃក៍បានបញ្ជាក់ដែរថា លោក កឹម សុខា នឹងមិនជាប់ពាក់ព័ន្ធនោះទេ។ ប៉ុន្តែសំណួរបានចោទឡើងថា តើការចុះផ្សាយរបស់សារព័ត៌មាន ដោយភ្ជាប់រូបភាពរបស់លោក កឹម សុខា ទៅនឹងជនទាំងបីនាក់ថា បានធ្វើអោយប៉ះពាល់ដល់កិត្តិយសរបស់លោក កឹម សុខា ដែររឺយ៉ាងណា? លោក ខៀវ សុភ័ក្រ បានបញ្ជាក់ថា វាមិនមែនជាបញ្ហានោះទេ បើគ្រាន់តែថតរូបភាពជាមួយគ្នានោះ។
គួររំលឹកជូនថា នៅព្រឹកថ្ងៃទី៣តុលានេះ កាសែតក្នុងស្រុកមួយបានផ្សាយពីប៉ូលីស អាំងទែប៉ូល កំពុងតាមរកចាប់ខ្លួនជនសង្ស័យ៣នាក់ដែលរស់នៅសហរដ្ឋអាមេរិក ពាក់ព័ន្ធនឹងការគំរាម សម្លាប់ថ្នាក់ដឹកនាំរាជរដ្ឋាភិបាលកម្ពុជា និងការប្រមាថព្រះមហាក្សត្រ។ កាសែតនេះបានផ្សាយថា ជនសង្ស័យទាំង៣នាក់ ដែលប៉ូលិសអាំងទែប៉ូលស្វែងរកចាប់ខ្លួន គឺមានទំនាក់ទំនងជាមួយលោក កឹម សុខា អនុប្រធានគណបក្សសង្គ្រោះជាតិ និងជាអនុប្រធានទី១នៃរដ្ឋសភា ពីព្រោះរាល់ពេលដែលលោក កឹម សុខា ចេញទៅសហរដ្ឋអាមេរិក គឺជនសង្ស័យទាំង៣នាក់តែងតែមានការជួបជាមួយគ្នា។ ប៉ុន្តែលោក កឹម សុខា ដែលកំពុងជួបសំណេះសំណាល់ជាមួយប្រជាពលរដ្ឋនៅឯខេត្តពោធិ៍សាត់នៅថ្ងៃសុក្រនេះ បានប្រាប់វិទ្យុបារាំអន្តរជាតិ RFI ថា លោកគ្មានទំនាក់ទំនងអ្វីជាមួយជនសង្ស័យទាំងបីនាក់នេះទេ។
ជាធម្មតានៅពេលលោកបំពេញទស្សនកិច្ចមិនថា នៅក្នុងស្រុករឺក្រៅស្រុកនោះទេ តែងតែមានមនុស្សជាច្រើនបានសុំថតរូបជាមួយលោក។ ដូច្នេះការព្យាយាមយករូបលោកទៅភ្ជាប់ជាមួយនឹងជនសង្ស័យទាំងបីគឺជារឿងដ៍ខុសឆ្គងមួយ។
សូមបញ្ជាក់ថា ជនសង្ស័យទាំង៣នាក់ ដែលប៉ូលីសអាំងទែប៉ូលកំពុងស្វែងរកចាប់ខ្លួននោះរួមមាន ទី១ ឈ្មោះ ម៉ៅ ឃឿន នៅរដ្ឋផេនស៊ីលវ៉ានៀ សហរដ្ឋអាមេរិក ទី២- ឈ្មោះ បូណា ប៊ុនផាត់ នៅរដ្ឋវ៉ាស៊ីនតោន និងទី៣-ឈ្មោះ យឿន សំរិទ្ធី នៅរដ្ឋចចជៀ (Georgia) សហរដ្ឋអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ