លោកកឹម សុខា ទទួលរងការវាយប្រហារពីសំណាក់ប្អូនប្រុសខ្លួនឯង
លោក កឹម សុខុន ប្អូនប្រុសរបស់លោក កឹម សុខា ដែលធ្លាប់ធ្វើការនៅក្នុងគណបក្សសិទ្ធិមនុស្សដែរនោះ បានចុះចូលជាមួយគណបក្សប្រជាជនកម្ពុជា កាលពីឆ្នាំ២០០៩។ នៅពេលនេះ មុនការបោះឆ្នោតតំណាងរាស្រ្តបន្តិច លោក កឹម សុខុន បានចេញមុខបកអាក្រាតអំពើអាក្រក់បងប្រុសរបស់លោក និងលោក សម រង្ស៊ី។ មន្ត្រីគណបក្សសង្រ្គោះជាតិពិពណ៌នាទង្វើរបស់លោក កឹម សុខុន ថា ធ្វើឡើងដើម្បីតែផលប្រយោជន៍ផ្ទាល់ខ្លួនប៉ុណ្ណោះ។
ចុះផ្សាយនៅថ្ងៃ៖
ស្តាប់ - ០២:២០
ក្នុងរយៈពេលប៉ុន្មានថ្ងៃចុងក្រោយនេះ គេសង្កេតឃើញមានតួអង្គអ្នកនយោបាយថ្មីមួយ ដែលត្រូវជាប្អូនប្រុសបង្កើតរបស់លោក កឹម សុខា ប្រធានស្តីទីគណបក្សសង្រ្គោះជាតិ ត្រូវបានគេបង្ហាញនៅតាមកញ្ចក់ទូរទស្សន៍ដែលមានទិន្នាការលម្អៀងទៅរកគណបក្សប្រជាជនកម្ពុជា។
នៅក្នុងសុន្ទរកថារបស់លោកថ្លែងទៅកាន់ប្រជាពលរដ្ឋនៅតាមខេត្ត លោក កឹម សុខុន បានធ្វើការរិះគន់ធ្ងន់ៗ ចំពោះលោក កឹម សុខា និងលោក សម រង្ស៊ី ប្រធាន និងអនុប្រធានគណបក្សសង្រ្គោះជាតិ។
លោក កឹម សុខុន ដែលធ្លាប់ជាសមាជិកគណបក្សហ៊្វុនស៊ិនប៉ិច គណបក្សសម រង្ស៊ី គណបក្សសិទ្ធិមនុស្ស និងចុងក្រោយនេះ ជាសមាជិកគណបក្សប្រជាជនកម្ពុជា បានចោទប្រកាន់លោក សម រង្ស៊ី និងលោក កឹម សុខា ថា ធ្វើអ្វីៗគ្រប់យ៉ាង ដើម្បីតែផលប្រយោជន៍ និងអំណាចផ្ទាល់ខ្លួន។
ស្របពេលជាមួយគ្នា លោក កឹម សុខុន បានលើកសរសើរការដឹកនាំរបស់គណបក្សប្រជាជនកម្ពុជា និងអំពាវនាវអោយប្រជាពលរដ្ឋបន្តបោះឆ្នោតជូនគណបក្សកាន់អំណាចមួយនេះ។
នៅថ្ងៃសៅរ៍នេះ វិទ្យុបារាំងអន្តរជាតិមិនអាចទាក់ទងលោក កឹម សុខា ដើម្បីធ្វើអត្ថាធិប្បាយជុំវិញការចោទប្រកាន់នេះបានទេ។ ប៉ុន្តែ លោក យ៉ែម ប៉ុញ្ញាឫទ្ធិ អគ្គនាយករដ្ឋបាលនៃគណបក្សសង្រ្គោះជាតិ បានហៅការរិះគន់របស់លោក កឹម សុខុន ដែលមានតួនាទីបច្ចុប្បន្នជាទីប្រឹក្សារាជរដ្ឋាភិបាលនោះថា ជាការរិះគន់ និងវាយប្រហារ ដើម្បីតែផលប្រយោជន៍ផ្ទាល់ខ្លួន។ លោក យ៉ែម ប៉ុញ្ញាឫទ្ធិ បានបញ្ជាក់ថា «លោក កឹម សុខុន គិតពីប្រយោជន៍ផ្ទាល់ខ្លួនខ្លាំងពេក និងម្យ៉ាងទៀត នេះគឺជាល្បិចកលរបស់គណបក្សប្រជាជនកម្ពុជា»។ លោក ប៉ុញ្ញាឫទ្ធិ បានបន្តទៀតថា បើទោះបីជាយ៉ាងណាក៏ដោយ ក៏ការវាយប្រហាររបស់លោក កឹម សុខុន មិនប៉ះពាល់ប្រជាប្រិយភាពគណបក្សសង្រ្គោះជាតិដែរ។
ប្រតិកម្មទៅនឹងសម្តីរបស់ លោក យ៉ែម ប៉ុញ្ញាឫទ្ធិ លោក កឹម សុខុន បានពន្យល់នៅថ្ងៃសៅរ៍នេះថា ប្រសិនបើលោកចង់បានផលប្រយោជន៍ លោកប្រាកដជាត្រូវស្ថិតនៅក្នុងគណបក្សសិទ្ធិមនុស្សដែលមានបងប្រុសលោកជាប្រធានទៅហើយ។
ឆ្លើយតបទៅនឹងសំណួរដែលសួរថា តើលោកមានអារម្មណ៍យ៉ាងដូចម្តេចដែរនៅពេលដែលបងប្អូនប្រុសបង្កើតមានជម្លោះផ្នែកនយោបាយជាមួយគ្នានោះ? លោក កឹម សុខុន បានអត្ថាធិប្បាយថា «យើងបងប្អូនគ្នាមែន មុខមាត់ស្រដៀងគ្នាមែន សំឡេងដូចគ្នាមែន។ ប៉ុន្តែយើងមានទស្សនៈនយោបាយខុសគ្នា ហើយនេះ វាបង្ហាញពីប្រជាធិបតេយ្យនៅកម្ពុជា»៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ