ជប៉ុន៖១ឆ្នំា ក្រោយគ្រោះរញ្ជួយដី មហន្តរាយនុយក្លេអ៊ែរនៅបន្តដក់ក្នុងអារម្មណ៍ប្រជាជនជប៉ុន
១១ មីនា ២០១១-១១ មីនា ២០១២ ថ្ងៃអាទិត្យ ទី១១ មីនានេះ ជាខួបគម្រប់ ១ឆ្នំាគត់នៃព្រឹត្តិការណ៍គ្រោះរញ្ជួយដីនៅក្នុងប្រទេសជប៉ុន។ គឺជាមហាសោកនាដកម្មមួយដែលបានសម្លាប់ប្រជាជនជប៉ុន ១៥ ៨៤៦នាក់ បាត់ខ្លួន ៣ ៣១៧នាក់ អ្នករងរបួសជាង ៦ ០០០នាក់ ព្រមទំាងបំផ្លិចបំផ្លាញហេដ្ឋារចនាសម្ព័ន្ធ និងផ្ទះសម្បែង-ទ្រព្យសម្បត្តិរបស់ប្រជាជនយ៉ាងច្រើនសម្បើម។ នៅថ្ងៃនេះ ពិធីគោរពវិញ្ញាណក្ខ័ន្ធជាតិចំពោះជនរងគ្រោះត្រូវបានគេរៀបចំឡើងនៅក្នុងទីក្រុងតូក្យូ ដោយមានវត្តមានអធិរាជ អាគីហ៊ីតូ និងនៅតាមកន្លែងកើតហេតុផ្ទាល់។ ១ឆ្នំា ក្រោយមក និងអ្វីដែលប្រជាជនជប៉ុនទូទៅនៅមិនអាចបំភ្លេចបាន និងពិបាកទទួលយកនោះ គឺគ្រោះថ្នាក់នៅមជ្ឈមណ្ឌលនុយក្លេអ៊ែរ Fukushima។
ចុះផ្សាយនៅថ្ងៃ៖
ស្តាប់ - ០៦:៥៥
រញ្ជួយដី គឺជាគ្រោះធម្មជាតិមួយដែលជប៉ុនធ្លាប់ជួបប្រទះញឹកញាប់ និងមិនគួរឲ្យភ្ញាក់ផ្អើលទេ។ សំណង់ផ្សេងៗ ក៏ដូចហេដ្ឋារចនាសម្ព័ន្ធរបស់ប្រទេសត្រូវបានសាងសង់-រៀបចំឡើងដោយបង្ការទប់នឹងគ្រោះរញ្ជួយដី។ ប៉ុន្តែអ្វីដែលថ្មី និងដែលមិនមែនជាទម្លាប់របស់ជប៉ុន គឺគ្រោះថ្នាក់នុយក្លេអ៊ែរ។ ក្រោយពីរលកយក្សស៊ូណាមីកំពស់ ១៤ម៉ែត្របានបោកបក់ទៅលើមជ្ឈមណ្ឌលនុយក្លេអ៊េរFukushima មក មានម៉ាស៊ីនប្រតិកម្មចំនួន ៣បានផ្ទុះបន្តបន្ទាប់គ្នា និងដែលបានធ្លាយចេញនូវធាតុវិទ្យុសកម្មប្រកបដោយគ្រោះថ្នាក់សម្រាប់ជីវិតមនុស្ស។ នេះជាគ្រោះថ្នាក់នុយក្លេអ៊ែរដ៏ធ្ងន់ធ្ងរលើកទីមួយក្នុងលោក គិតក្នុងរយៈពេល ២៥ឆ្នំាចុងក្រោយនេះ ពោល តំាងពីក្រោយគ្រោះថ្នាក់នុយក្លេអ៊ែរនៅឈែរណូប៊ីល (Tchernobyl) ក្នុងប្រទេសអ៊ុយក្រែន។
មហន្តរាយនុយក្លេអ៊ែរនៅបន្តដក់ក្នុងអារម្មណ៍ប្រជាជនជប៉ុន
១ឆ្នំា ក្រោយមក ប្រជារាស្រ្តជប៉ុនបន្តបញ្ចេញកំហឹងប្រឆំាងរដ្ឋាភិបាល និងក្រុមហ៊ុនតិបកូដែលជាអ្នកធ្វើអាជីវកម្មលើមជ្ឈមណ្ឌលនុយក្លេអ៊ែរ Fukushima ពីអសមត្ថភាពក្នុងការគ្រប់គ្រងស្ថានការណ៍ ក្រោយពីមានអគារម៉ាស៊ីនប្រតិកម្មបានផ្ទុះបន្តបន្ទាប់គ្នា។ ការផ្ទុះដែលបានបញ្ចេញធាតុវិទ្យុសកម្មទៅក្នុងបរិយាកាស ក្នុងកម្រិតខ្ពស់គួរឲ្យបារម្ភ។ កាលណោះ អាជ្ញាធរជប៉ុនបានសម្រេចជម្លៀសប្រជាជនដែលរស់ក្នុងរង្វង់ ២០គីឡូម៉ែត្រ ពីមជ្ឈមណ្ឌលនុយក្លេអ៊ែរ។ ទន្ទឹមគ្នានោះ ពីមួយថ្ងៃ ទៅមួយថ្ងៃ ក្រុមហ៊ុនតិបកូបានជូនព័ត៌មានមិនច្បាស់លាស់ និងមិនពិតជុំវិញស្ថានភាព និងផលវិបាកដែលនឹងអាចកើតចេញពីគ្រោះថ្នាក់នុយក្លេអ៊ែរ។ សរុប មានប្រជាជនជាង ៣៤ម៉ឺននាក់ត្រូវបានអាជ្ញាធរជម្លៀសចេញពីលំនៅដ្ឋាន ទៅដាក់កន្លែងផ្សេងៗនៅទូទំាងប្រទេស។ តែ ១ ឆ្នំា ក្រោយមក មានគ្រួសារមួយចំនួនធំមិនអាចវិលត្រឡប់ទៅកាន់ផ្ទះសម្បែងដើមរបស់គេវិញបានទេ ពីព្រោះជាកន្លែងដែលលែងរស់នៅបានទៀតឡើយ។
ពិតណាស់ថា ១ឆ្នំាក្រោយមក ទោះបីជានៅមិនទាន់មានប្រជាជនជប៉ុនណាម្នាក់បានស្លាប់ដោយទទួលរងធាតុវិទ្យុសកម្មក៏ដោយ ក៏លទ្ធផលនៃការសិក្សាឯករាជ្យជាច្រើនបានបង្ហាញយ៉ាងច្បាស់ថា ឥទ្ធិពលនៃធាតុវិទ្យុសកម្មនឹងអាចធ្វើឲ្យប៉ះពាល់ដល់រាងកាយមនុស្សដែលរស់នៅជាង ២០០គីឡូម៉ែត្រ ពីមជ្ឈមណ្ឌលនុយក្លេអ៊ែរ Fukushima។ អ្នកដែលងាយទទួលរងគ្រោះជាងគេ គឺកូនក្មេង។
១ឆ្នំា ក្រោយមក និងអ្វីដែលប្រជាជនជប៉ុនទូទៅកំពុងបារម្ភខ្លំាងជាងគេ គឺបញ្ហាសុខភាព បញ្ហាគុណភាពទឹក ផលិតផលកសិកម្ម និងការចិញ្ចឹមសត្វ។ បើយោងតាមក្រុមអ្នកវិទ្យាសាស្រ្ត ជំងឺមហារីកដែលបង្កដោយធាតុវិទ្យុសកម្ម នឹងអាចលេចរូបរាង ក្នុងរយៈពេល ១០ ឬ ២០ ឬក៏ ៣០ឆ្នំាខាងមុខ។
ប្រជាជនជប៉ុនទាមទារឲ្យបោះបង់ថាមពលនុយក្លេអ៊ែរ
ទន្ទឹមគ្នានឹងពិធីរលឹកខួប ១ឆ្នំានៃព្រឹត្តិការណ៍គ្រោះរញ្ជួយដីថ្ងៃនេះ ក៏មានក្បួនបាតុកម្មប្រឆំាងនឹងថាមពលនុយក្លេអ៊ែរដែលរៀបចំដោយប្រជាជនក្នុងទីក្រុង Fukushima។ ពួកគេបានដង្ហែក្បួនបាតុកម្មទាមទារឲ្យរដ្ឋាភិបាលបោះបង់ចោលទំាងស្រុងនូវថាមពលនុយក្លេអ៊ែរ។ ក្រុមបាតុករបានលើកផ្ទំាងបដាដែលសរសេរថា គ្រោះរញ្ជួយដី ជាព្រឹត្តិការណ៍មិនអាចបំភ្លេចបានទេ តែមហន្តរាយនុយក្លេអ៊ែរ ជាព្រឹត្តិការណ៍មិនអាចបំភ្លេចបានផង និងមិនអាចអត់ឱនឲ្យបានផង។ អ្វីដែលក្រុមបាតុករចង់បាន គឺសុំឲ្យរដ្ឋាភិបាលបោះបង់ចោលទំាងស្រុងនូវថាមពលនុយក្លេអ៊ែរ។ គួរជម្រាបជូនថា បច្ចុប្បន្ន ជប៉ុនមានម៉ាស៊ីនប្រតិកម្មចំនួន ៥៤គ្រឿង និងមានតែ ២គ្រឿងប៉ុណ្ណោះកំពុងដំណើរការសព្វថ្ងៃ។ កាលពីពេលថ្មីៗកន្លងទៅ លោកនាយករដ្ឋមន្រ្តីជប៉ុន ណូដាធ្លាប់បានសន្យាថា ជប៉ុននឹងផ្តើមដកខ្លួនជាបណ្តើរៗ ចេញពីថាមពលនុយក្លេអ៊ែរ។
១ឆ្នំា ក្រោយគ្រោះរញ្ជួយដី សេដ្ឋកិច្ចជប៉ុនបានកម្រើកឡើងវិញ
១ឆ្នំា ក្រោយគ្រោះរញ្ជួយដី ជប៉ុននៅតែបន្តទទួលផលវិបាកយ៉ាងធ្ងន់ធ្ងរទំាងផ្នែកសេដ្ឋកិច្ច និងនយោបាយ ពិសេសគឺសេដ្ឋកិច្ច។ ក្រៅពីទទួលផលវិបាកដោយគ្រោះរញ្ជួយដីនៅផ្ទះខ្លួនឯង ជប៉ុនក៏បានទទួលផលវិបាកនៅក្នុងគ្រោះទឹកជំនន់ក្នុងប្រទេសថៃ កាលពីពេលថ្មីៗកន្លងទៅ។ មានរោងចក្រសហគ្រាសជប៉ុននៅថៃជាច្រើនបានទទួលរងការខូតខាតដោយទឹកជំនន់ និងមានមួយចំនួនធំនៅមិនទាន់អាចដំណើរការឡើងវិញបានទេ។ ក្រៅពីនេះ នៅមានបរិបទសេដ្ឋកិច្ចពិភពលោកទៀត ពិសេស វិបត្តិប្រាក់បំណុលនៅក្នុងប្រទេសអឺរ៉ុប។ កត្តាទំាងអស់នេះបានធ្វើឲ្យប្រទេសមហាអំណាចសេដ្ឋកិច្ចទី៣ក្នុងលោកមួយនេះ កំពុងរងផលប៉ះពាល់យ៉ាងខ្លំាង។ តែបើគេក្រឡេកមើលក្រោយ អំពីប្រវត្តិសាស្រ្តរបស់ជប៉ុន ប្រទេសមួយនេះមិនដែលបណ្តោយខ្លួន តាមយថាកម្មទេ។ ជាក់ស្តែង ក្រោយសង្គ្រាមលោកលើកទី២ ជប៉ុនបានស្គាល់កំណើនសេដ្ឋកិច្ចយ៉ាងឆាប់រហ័ស។ ក្រោយវិបត្តិប្រេងកាតពិភពលោក ជប៉ុនបានរកឃើញប្រភពថាមពលដ៏មានប្រសិទ្ធិភាពដោយខ្លួនឯង។
ឥឡូវនេះ និងក្នុងឆ្នំា ២០១១ ដែលខ្លួនបានជួបគ្រោះរញ្ជួយដី និងនុយក្លេអ៊ែរ ជប៉ុនបានបាត់បង់កំណើនសេដ្ឋកិច្ចតែ ០,៧% ប៉ុណ្ណោះ។ ក្នុងរយៈពេលប៉ុន្មានខែចុងក្រោយនេះ កំណើនតម្រូវការក្នុងស្រុកបានចូលរួមជួយផ្តល់សន្ទុះកំណើនសេដ្ឋកិច្ចជប៉ុន។ តាមការប៉ាន់ប្រមាណមើល ជប៉ុនអាចនឹងស្គាល់ស្ថានភាពសេដ្ឋកិច្ច ដូចមុនគ្រោះរញ្ជួយដី ដោយសារផែនការអភិវឌ្ឍន៍របស់រដ្ឋាភិបាលជាមួយនឹងកញ្ចប់ថវិកា ២៣ម៉ឺនលានដុល្លារ សម្រាប់រយៈពេល ១០ឆ្នំាខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ