អភិបាលខេត្តដ៏មានជាងគេរបស់ឥណ្ឌូណេស៊ី ជាប់ទោសពីបទពុករលួយ
ជាស្ត្រីដំបូងគេដែលមានតួនាទី ជាអភិបាលខេត្ត និងក៏ជាស្ត្រីដំបូងគេដែលបានទទួលការកាត់ទោសពីបទប្រព្រឹត្តអំពើពុករលួយ ! លោកស្រី រ៉ាទូ អាទូត ស្ហូហ្ស៊ីយ៉ាស (Ratu Atut Chosiyah) ដែលជាតំណាងត្រកូលអ្នកនយោបាយដ៏មានអំណាចបំផុតនៅឥណ្ឌូណេស៊ី ត្រូវបានតុលាការកាត់ទោសឱ្យជាប់ពន្ធនាគារបួនឆ្នាំ ពីបទបានយកលុយទៅសូកប៉ាន់អតីតប្រធានតុលាការធម្មនុញ្ញ ក្នុងជម្លោះប្តឹងផ្តល់ទាក់ទងនឹងការបោះឆ្នោត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៤
មានអាយុ ៥២ឆ្នាំ ជាអភិបាលខេត្តបានតិន (Banten) នៃកោះជ្វា ដ៏មានជាងគេរបស់ឥណ្ឌូណេស៊ី លោកស្រី រ៉ាទូ អាទូត ស្ហូហ្ស៊ីយ៉ាស ត្រូវបានតុលាការប្រឆាំងនឹងអំពើពុករលួយក្រុងហ្សាការតា បានរកឃើញថា បានយកលុយមួយពាន់លានរ៉ូពី (៦៥០០០អឺរ៉ូ) ទៅសូកអតីតប្រធានតុលាការធម្មនុញ្ញ លោក អាគីល ម៉ូឆា នៅប្រទេសសិង្ហបុរី កាលពីឆ្នាំ២០១៣ ឱ្យលុបចោលលទ្ធផលបោះឆ្នោតនៅខេត្តបានតិន ព្រោះមនុស្សជំនិតក្នុងក្រុមគ្រួសារជាអ្នកចាញ់ប្រៀប។
អតីតប្រធានតុលាការធម្មនុញ្ញ ដែលកាលពីខែមិថុនា ២០១៤ ត្រូវបានតុលាការកាត់ទោសឱ្យជាប់ពន្ធនាគារអស់មួយជីវិតពីបទប្រព្រឹត្តអំពើពុករលួយ ទទួលប្រាក់សំណូកជាថ្នូរនឹងការសម្រេចសាលក្រម ទាក់ទងនឹងរឿងក្តីបោះឆ្នោតជាច្រើន មានជាអាទិ៍រឿងក្តីត្រកូលស្ហូហ្ស៊ីយ៉ាស។ តុលាការប្រឆាំងនឹងអំពើពុករលួយបានបើកកកាយអង្កេត។ ប៉ុន្តែក្នុងករណីលោកស្រីអភិបាលខេត្តនេះ រដ្ឋអាជ្ញាហាក់ដូចមិនសូវតឹងតែងខ្លាំង ដោយទាមទារដាក់លោកស្រីត្រឹមតែ១០ឆ្នាំ។
ត្រកូលស្ហូហ្ស៊ីយ៉ាស គ្រប់គ្រងខេត្តបានតិនដ៏មានបាន ដល់ទៅ៥សង្កាត់ក្នុងចំណោមសង្កាត់សរុបទាំងអស់៨។ ត្រកូលជាតំណាងពូជពង្សអ្នកនយោបាយដែលបានជួយស្ថាបនាឥណ្ឌូណេស៊ីឱ្យត្រដែតឡើង ក្រោយពីរបបផ្តាច់ការស៊ូហាតូរលំរលាយទៅ។ ក្រៅអំពីរឿងអាស្រូវពុករលួយមួយនេះ ស្ហូហ្ស៊ីយ៉ាស ជាត្រកូលដ៏មានឥទ្ធិពលនិងអំណាចបំផុតប្រចាំតំបន់បានតិន។
បើតាមអង្គការតម្លាភាពអន្តរជាតិ Transparency International ប្រទេសឥណ្ឌូណេស៊ី ក្នុងលំដាប់លេខរៀងទី ១១៤ នៃប្រទេសដែលមានអំពើអំពើពុករលួយខ្លាំងបំផុត ក្នុងចំណោមប្រទេសសរុបទាំង១៧៧៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ