ជប៉ុននិងឥណ្ឌាចរចាគ្នាលើកិច្ចព្រមព្រៀងពាណិជ្ជកម្មសេរីនិងនុយក្លេអ៊ែរ
នៅថ្ងៃចន្ទ ទី២៥ តុលា ២០១០នេះ លោកម៉ាន់ម៉ូហាន់ ស៊ីង (Manmohan Singh) នាយករដ្ឋមន្រ្តីឥណ្ឌា ចាប់ផ្តើមដំណើរទស្សនកិច្ចផ្លូវរដ្ឋរយៈពេល ៣ថ្ងៃ នៅប្រទេសជប៉ុន។ នៅក្នុងដំណើរទស្សនកិច្ចនេះ នាយករដ្ឋមន្រ្តីឥណ្ឌា និងនាយករដ្ឋមន្រ្តីជប៉ុននឹងបិទបញ្ចប់ការចរចាជុំវិញកិច្ចព្រមព្រៀង ពាណិជ្ជកម្មសេរី និងបន្តចរចាលើសំណុំរឿងសំខាន់មួយទៀត គឺកិច្ចសហប្រតិបត្តិការលើវិស័យនុយក្លេអ៊ែរស៊ីវិល។
ចុះផ្សាយនៅថ្ងៃ៖ កែប្រែថ្ងៃទី៖
បទវិភាគរបស់ សេង ឌីណា
ដំណើរទស្សនកិច្ចរបស់នាយករដ្ឋមន្រ្តីឥណ្ឌា នៅជប៉ុន នៅពេលនេះ គឺជាការគូសបញ្ជាក់អំពីភាពល្អូកល្អឺនរវាងមហាអំណាចសេដ្ឋកិច្ចអាស៊ី ទាំងពីរ ក្នុងពេលដែលជប៉ុនកំពុងមានជម្លោះការទូតជាមួយចិន។
នៅក្នុងអំឡុងដំណើរទស្សនកិច្ចនេះ នាយករដ្ឋមន្រ្តីទាំងពីរគ្រោងនឹងបិទបញ្ចប់ជាផ្លូវការនូវការចរចាលើ កិច្ចព្រមព្រៀងពាណិជ្ជកម្មសេរី។ ពិធីចុះហត្ថលេខាលើកិច្ចព្រមព្រៀងនេះគ្រោងធ្វើ នៅដើមឆ្នាំ២០១១ខាងមុខ។ យោងតាមកិច្ចព្រមព្រៀងនេះ ជប៉ុន និងឥណ្ឌានឹងចាប់ផ្តើមធ្វើការកាត់បន្ថយអត្រាពន្ធគយលើទំនិញ ប្រមាណជា ៩៤% ដើម្បីឈានទៅលុបបំបាត់របាំងពន្ធគយទាំងស្រុង នៅក្នុងរយៈពេល ១០ឆ្នាំខាងមុខ។ ការលុបបំបាត់របាំងពន្ធគយនេះ នឹងជួយឲ្យផលិតផលរបស់ជប៉ុន ជាពិសេស គ្រឿងបន្លាស់រថយន្ត អាចចូលទៅក្នុងទីផ្សារឥណ្ឌាបានកាន់តែងាយស្រួល។ ចំណែកថ្នាំពេទ្យរបស់ឥណ្ឌាវិញ ក៏អាចចូលទៅក្នុងទីផ្សាររបស់ជប៉ុនបានងាយស្រួលផងដែរ។
កិច្ចព្រមព្រៀងមួយទៀត ដែលឥណ្ឌាទន្ទឹងចង់បានពីជប៉ុនដែរនោះ គឺកិច្ចសហប្រតិបត្តិការខាងនុយក្លេអ៊ែរស៊ីវិល។ ឥណ្ឌា ដែលកំពុងមានតម្រូវការខ្ពស់ខាងថាមពលអគ្គិសនីនោះ កំពុងតែស្វះស្វែងចង់សាងសង់រោងចក្រអគ្គិសនីដើរដោយថាមពលនុយក្លេអ៊ែរ។ ជប៉ុន គឺជាប្រទេស ដែលមានបច្ចេកវិទ្យាខ្ពស់ខាងវិស័យនុយក្លេអ៊ែរស៊ីវិលនេះ។
កិច្ចចរចារវាងឥណ្ឌា និងជប៉ុន លើវិស័យនុយក្លេអ៊ែរនេះ បានចាប់បើកធ្វើ តាំងពីខែមិថុនាមកម៉្លេះ ក៏ប៉ុន្តែ នៅតែមិនទាន់រកបានការព្រមព្រៀងណាមួយនៅឡើយទេ។ នៅក្នុងអំឡុងដំណើរទស្សនកិច្ចរបស់លោកម៉ាន់ម៉ូហាន់ ស៊ីង នៅពេលនេះ ជប៉ុន និងឥណ្ឌាក៏ទំនងជាមិនអាចចុះកិច្ចព្រមព្រៀងលើវិស័យនុយក្លេអ៊ែរ នេះបាននោះដែរ។ ឧបសគ្គសំខាន់ គឺមកពីមានការប្រឆាំងពីសំណាក់ប្រជាជនជប៉ុន។
គួរបញ្ជាក់ថា ជប៉ុន គឺជាប្រទេសតែមួយគត់ ក្នុងប្រវត្តិសាស្រ្ត ដែលធ្លាប់រងគ្រោះដោយគ្រាប់បែកនុយក្លេអ៊ែរ។ រហូតមកទល់ពេលនេះ ប្រជាជនជប៉ុនភាគច្រើនលើសលុបមិនចង់ឲ្យជប៉ុនជាប់ប្រឡាក់ដៃក្នុង បញ្ហារីកសាយភាយអាវុធនុយក្លេអ៊ែរនេះឡើយ។ ហេតុដូច្នេះហើយ បានជាគេប្រឆាំងមិនឲ្យរដ្ឋាភិបាលជប៉ុនសហការជាមួយឥណ្ឌា ខាងវិស័យនុយក្លេអ៊ែរនេះ ពីព្រោះថា ឥណ្ឌា គឺជាប្រទេសមានអាវុធនុយក្លេអ៊ែរផង ហើយជាប្រទេសដែលបដិសេធមិនព្រមចុះសន្ធិសញ្ញាមិនរីកសាយភាយអាវុធ នុយក្លេអ៊ែរផង។
ទោះជាយ៉ាងណាក៏ដោយ ការសហការជាមួយឥណ្ឌា ក្នុងវិស័យនុយក្លេអ៊ែរស៊ីវិលនេះ អាចនឹងផ្តល់ផលប្រយោជន៍យ៉ាងច្រើនដល់សេដ្ឋកិច្ចជប៉ុន។ នុយក្លេអ៊ែរស៊ីវិលនៅឥណ្ឌា គឺជាទីផ្សារដ៏ធំមួយ (គិតជាទឹកប្រាក់រាប់ម៉ឺនលានដុល្លារ) ដែលប្រទេសជាច្រើន ដូចជា អាមេរិក បារាំង និងកូរ៉េខាងត្បូង ជាដើម កំពុងតែប្រកួតប្រជែងគ្នា។
នៅក្នុងបរិបទ ដែលជប៉ុន និងចិន កំពុងមានជម្លោះការទូតជាមួយគ្នា ឥណ្ឌា និងជប៉ុនក៏កាន់តែចង់ពង្រឹងទំនាក់ទំនងជាមួយគ្នាថែមទៀត។ មហាអំណាចសេដ្ឋកិច្ចអាស៊ីទាំងពីរនេះត្រូវការគ្នាទៅវិញទៅមក ដើម្បីទប់ទល់នឹងការពង្រីកឥទ្ធិពលរបស់ចិន នៅក្នុងតំបន់ ទាំងផ្នែកសេដ្ឋកិច្ច នយោបាយ និងយោធា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ