កម្ពុជា -

អត្ថបទចុះផ្សាយនៅថ្ងៃ អង្គារ 30 តុលា 2012 - ព័ត៌មានទើបកែប្រើលើកចុងក្រោយ ថ្ងៃ អង្គារ 30 តុលា 2012

ការកសាងសហគមន៍សេដ្ឋកិច្ចអាស៊ាន នៅឆ្នាំ២០១៥ត្រូវបានពិភាក្សា

នាយករដ្ឋមន្រ្តីកម្ពុជា នៅក្នុងឱកាសសិក្ខាសាលាស្តីពីកសាងសហគមន៍សេដ្ឋកិច្ចអាស៊ាន នៅថ្ងៃទី ៣០ តុលា ២០១២

©RFI/ siv channa

ដោយ លី ម៉េងហួរ

ចក្ខុវិស័យនៃកសាងសហគមន៍សេដ្ឋកិច្ចអាស៊ាន នៅឆ្នាំ២០១៥ ជាប្រធានបទនៃសិក្ខាសាលារយៈពេលពីរថ្ងៃ ចាប់នៅព្រឹកថ្ងៃអង្គារទី ៣០ តុលា ក្នុងទីក្រុងភ្នំពេញ។ តាមលោកនាយករដ្ឋមន្ត្រី ហ៊ុន សែន ការកសាងសហគមន៍សេដ្ឋកិច្ចអាស៊ាន រួមមានបញ្ហាសំខាន់ៗ ដូចជា ការអភិវឌ្ឍសហគ្រាសធុនតូច និងមធ្យម សន្តិសុខថាមពល បរិស្ថាន ពាណិជ្ជកម្ម វិនិយោគ និងការតភ្ជាប់ហេដ្ឋារចនាសម្ព័ន្ធ ព្រមទាំងការអភិវឌ្ឍប្រកបដោយចីរភាព។

សេចក្តីរាយការណ៍របស់លី ម៉េងហួរពីទីក្រុងភ្នំពេញ

ស្តាប់ (03:16)

30/10/2012 by លី ម៉េងហួរ

ក្នុងពេលបើកកិច្ចប្រជុំ លោកនាយករដ្ឋមន្ត្រី ហ៊ុន សែន បានលើកឡើងថា "ជោគជ័យនៃការកសាងសហគមន៍សេដ្ឋកិច្ចអាស៊ាន នៅឆ្នាំ២០១៥ នឹងប្រែក្លាយអាស៊ាន ឲ្យទៅជាទីផ្សារសកលមួយ ដែលមានមូលដ្ឋានផលិតកម្មរឹងមាំ មានលំហូរដោយសេរីនៃទំនិញ សេវា ការវិនិយោគ ពលករជំនាញ និងទុនវិនិយោគ។

ដើម្បីសម្រេចឲ្យបាននូវការកសាងសហគមន៍សេដ្ឋកិច្ចអាស៊ាន លោកនាយករដ្ឋមន្ត្រី លើកឡើងថា ថ្នាក់ដឹកនាំនៃបណ្តាប្រទេសអាស៊ាន នឹងជួបប្រជុំគ្នា ក្នុងពេលឆាប់ៗនេះ នៅក្នុងកិច្ចប្រជុំកំពូលអាស៊ាន លើកទី២១ នៅខែវិច្ឆិកា ក្នុងទីក្រុងភ្នំពេញ ដើម្បីពិភាក្សាលើបញ្ហា សំខាន់ៗ ដូចជា ការអភិវឌ្ឍសហគ្រាសធុនតូច និងមធ្យម សន្តិសុខថាមពលបរិស្ថាន ពាណិជ្ជកម្ម វិនិយោគ និងការតភ្ជាប់ហេដ្ឋារចនាសម្ព័ន្ធ ព្រមទាំងការអភិវឌ្ឍប្រកបដោយចីរភាព។

ក្នុងកិច្ចប្រជុំនៅព្រឹកមិញ លោកនាយករដ្ឋមន្ត្រី ហ៊ុន សែន ក្នុងនាមជាប្រមុខអាស៊ាន បានរំលេចឡើងនូវកំណើនសេដ្ឋកិច្ចអាស៊ាន ដែលស្ថិតក្នុងកម្រិតជាវិជ្ជមាន ដើម្បីឆ្ពោះទៅដល់គោលដៅ បង្កើតសហគមន៍អាស៊ាន នៅឆ្នាំ២០១៥។ នោះគឺ សព្វថ្ងៃ អាស៊ាន មានកំណើនផលិតផលសរុប ចន្លោះពី ៥,២% ទៅ ៥,៩% ដែលជាកំណើនមួយ មានលក្ខណៈល្អប្រសើរ ក្នុងកម្រិតអន្តរជាតិ។ ការវិនិយោគក្នុងចំណោមប្រទេសសមាជិកអាស៊ាន បានកើនឡើង ២៣% ក្នុងឆ្នាំ២០១១ ដែលគិតជាទឹកប្រាក់ មានចំនួន ១៧,៥ ពាន់លានដុល្លារ ស្មើនឹង ១៩,៧% នៃលំហូរទុនវិនិយោគផ្ទាល់ពីបរទេសសរុប មកកាន់តំបន់អាស៊ាន។

ប្រការនេះ ត្រូវបានលោកនាយករដ្ឋមន្ត្រី ហ៊ុន សែន បានគូសបញ្ជាក់ថា "អាស៊ាននៅតែជាតំបន់មួយរបស់ពិភពលោក ដែលមានទាក់ទាញ ចំពោះការវិនិយោគផ្ទាល់ពីបរទេស"។

លោកនាយករដ្ឋមន្ត្រី ហ៊ុន សែន ក៏បានបន្ថែមថា "ពាណិជ្ជកម្មទំនិញរបស់អាស៊ាន បានកើនឡើង ១៦,៨% នៅក្នុងឆ្នាំ២០១១ ពោលគឺកើនឡើងពី ២,០៥ លាន-លានដុល្លារ ក្នុងឆ្នាំ២០១០ ទៅ ២,៣៩ លាន-លានដុល្លារ ទោះបីជាសកម្មភាពពាណិជ្ជកម្មពិភពលោក មានការធ្លាក់ចុះក៏ដោយ។ សកម្មភាពពាណិជ្ជរវាងសមាជិកអាស៊ាន មានភាពរឹងមាំក្នុងឆ្នាំ២០១១ ដោយបានបង្កើនទំហំទឹកប្រាក់ឡើងដល់ ៥៨៩ ពាន់លានដុល្លារ"។

យ៉ាងណាក៏ដោយ ក្នុងបុព្វហេតុឆ្ពោះទៅសម្រេចចក្ខុវិស័យនៃការកសាងសហគមន៍អាស៊ាន ឆ្នាំ២០១៥ លោកនាយករដ្ឋមន្ត្រី គូសបញ្ជាក់ថា អាស៊ានចាំបាច់ត្រូវបង្កើតសហគមន៍សេដ្ឋកិច្ចអាស៊ាន ដោយត្រូវបន្តខិតខំប្រឹងប្រែងដោះស្រាយនូវរាល់ឧបសគ្គនានា ជាពិសេសការអនុវត្ត “យន្តការច្រកចេញ-ចូលតែមួយ សម្រាប់អាស៊ាន” ការសម្រួលពាណិជ្ជកម្ម ការលុបបំបាត់នូវរបាំងពន្ធគយ និងវិធានការមួយចំនួនទៀត ដែលបានកំណត់នៅក្នុងផែនទីចង្អុលផ្លូវសហគមន៍សេដ្ឋកិច្ចអាស៊ាន៕