លោកហ៊ុន សែនសន្យាប្រាប់វិញ្ញាណក្ខន្ធសម្តេចឪថានឹងការពាររាជានិយម
មុននឹងព្រះបរមសពសម្តេចឪ នរោត្តម សីហនុ ត្រូវយាងពីមន្ទីរពេទ្យទីក្រុងប៉េកាំងមកកម្ពុជា លោកនាយករដ្ឋមន្ត្រីហ៊ុន សែន បានអុជធូបសន្យានៅចំពោះមុខព្រះបរមសពសម្តេចឪថា លោកនឹងការពាររាជានិយម និងរាជបល្ល័ង្ក។ សេចក្តីថ្លែងដែលមានលាយឡំនឹងការយំសោកនេះត្រូវបានធ្វើឡើងនៅចំពោះព្រះភក្ត្រព្រះមហាក្សត្រ និងសម្តេចម៉ែ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២១
គឺនៅនាទីចុងក្រោយនៃការឃើញព្រះភក្រ្តសម្តេចឪ មុននឹងកងយោធាកិត្តិយសចិនលើកព្រះបរមសពសម្តេចឪដាក់ចូលក្នុងព្រះមឈូស ដែលប្រមុខរដ្ឋាភិបាលកម្ពុជា លោកហ៊ុន សែន បានថ្លែងពាក្យសន្យាដ៏មានន័យនេះ។ ដៃកាន់ធូបលើកប្រណមឡើង នៅចុងជើងព្រះបរមសព លោកនាយករដ្ឋមន្ត្រីកម្ពុជា ដែលសម្តេចឪបានចាត់ទុកជាកូនធម៌របស់ព្រះអង្គនោះ បាននិយាយឮៗ ចំពោះព្រះបរមសពសម្តេចឪយ៉ាងដូច្នេះថា៖ «ទូលបង្គំនឹងការពារព្រះរាជបល្ល័ង្ក ការពាររាជានិយម ការពារសម្តេចម៉ែ ការពារព្រះមហាក្សត្រ។ សូមព្រះអង្គកុំព្រួយព្រះទ័យ។ សូមព្រះអង្គយាងទៅកាន់សុគតិភព”។
បើយោងតាមឯកសារវីដេអូដែលចាក់ផ្សាយដោយទូរទស្សន៍ជាតិកម្ពុជា ការសន្យា ដែលបន្លឺឡើងជាមួយការយំសោករបស់លោកនាយករដ្ឋមន្ត្រី បានធ្វើឡើងនៅចំពោះព្រះភក្ត្រសម្តេចម៉ែ និងព្រះមហាក្សត្រនរោត្តម សីហមុនី ដែលកំពុងឈរកាន់ព្រះហស្ថគ្នាយ៉ាងស្អិត។ នៅក្បែរនោះ ក៏មានវត្តមានព្រះអង្គម្ចាស់នរោត្តម រណឫទ្ធិផងដែរ។
ការថ្លែងសន្យារបស់លោកនាយករដ្ឋមន្ត្រីនៅពេលនេះមិនបានធ្វើអោយព្រះអង្គម្ចាស់ស៊ីសុវត្ថិ ធម្មិកោភ្ញាក់ផ្អើលឡើយ។ ព្រះអង្គម្ចាស់ធម្មិកោ ដែលជាក្មួយផង និងជាព្រះរាជលេខាផ្ទាល់របស់សម្តេចតាផង បានមានបន្ទូលអោយដឹងថា នេះមិនមែនជាលើកទីមួយឡើយដែលលោកនាយករដ្ឋមន្ត្រីមានប្រសាសន៍យ៉ាងដូច្នេះ ហើយថា សកម្មភាពរបស់លោកនាយករដ្ឋមន្ត្រីក្នុងពេលកន្លងមកក៏បានស្តែងអោយឃើញពីការសន្យានេះដែរ។ ព្រះអង្គម្ចាស់ធម្មិកោមានបន្ទូលថា ព្រះអង្គមិនមានការព្រួយបារម្ភអ្វីឡើយ ពីព្រោះព្រះអង្គយល់ច្បាស់ថា ការសន្យារបស់លោកនាយករដ្ឋមន្ត្រី គឺជាការសន្យាចេញពីទឹកចិត្តរបស់លោកពិតប្រាកដជាអ្នករាជានិយម។
គួរបញ្ជាក់ថា រដ្ឋាភិបាលចិនបានចាត់តាំងទេសរដ្ឋមន្ត្រីចិនគឺលោក Dai Bingguo និងមន្ត្រីមួយចំនួនទៀត ដើម្បីចូលរួមដង្ហែព្រះបរមសពសម្តេចឪ ពីរដ្ឋធានីប៉េកាំងមកប្រទេសកម្ពុជា។ ឆ្លៀតក្នុងឱកាសនេះ លោក Dai Bingguo បានជួបសវនាការពិភាក្សាការងារ អំពីចំណងទ្វេភាគី រវាងកម្ពុជានិងចិន ជាមួយលោកនាយករដ្ឋមន្ត្រីហ៊ុន សែន និងលោករដ្ឋមន្ត្រីការបរទេសកម្ពុជា ហោ ណាំហុង ផងដែរ។ ក្រោយពីជួបជាមួយលោកទេសរដ្ឋមន្ត្រីចិន លោកហោ ណាំហុងបានអះអាងប្រាប់អ្នកសារព័ត៌មានថា ថ្វីដ្បិតតែសម្តេចឪបានសោយទិវង្គតមែន ប៉ុន្តែទំនាក់ទំនងមិត្តភាពដ៏យូរលង់នៃប្រទេសទាំងពីរ ចិន-កម្ពុជា នៅតែបន្តពង្រឹង និងពង្រីកថែមទៀតជារៀងរាល់ថ្ងៃ។ លោកបន្តថា ប្រទេសចិនត្រៀមខ្លួនជាស្រេច ក្នុងការជួយកម្ពុជាជានិច្ច នៅពេលណាដែលកម្ពុជាត្រូវការអភិវឌ្ឍន៍សេដ្ឋកិច្ច និងសង្គម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ