ក្រោយអំពើហិង្សា អាជ្ញាធរហុងកុងស្នើឲ្យមានកិច្ចចរចាជាមួយក្រុមបាតុករនិស្សិត
បន្ទាប់ពីមានការប៉ះទង្គិចគ្នា អស់បីយប់ជាប់គ្នា រវាងក្រុមបាតុករនិស្សិតនិងប៉ូលិសមក នៅថ្ងៃសោរ៍ទី ១៨តុលានេះ អាជ្ញាធរហុងកុងបានលើកសំណើ បើកតុចរចាជាមួយក្រុមនិស្សិតឡើងវិញ។ ក្រុមនិស្សិតដែលបានប្រមូលផ្តុំគ្នាធ្វើបាតុកម្ម តាំងពីជិតបីសប្តាហ៍មក បិទខ្ទប់សង្កាត់ខ្លះរបស់ក្រុង បង្កឱ្យសកម្មភាពនិងជីវិតរស់នៅរបស់ហុងកុង អតីតដែនដីក្រោមអាណានិគមអង់គ្លេស មួយភាគរងការប៉ះពាល់យ៉ាងខ្លាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៤
អំពើហិង្សាបានផ្ទុះឡើងជាថ្មីទៀត នៅយប់ថ្ងៃសុក្រឆ្លងមកថ្ងៃសៅរ៍ នៅពេលដែលក្រុមបាតុករនិស្សិតរាប់ពាន់នាក់ នាំគ្នាសំរុកមកសាកល្បងបិទផ្លូវនិងបោះទីតាំងជាថ្មី ដែលប៉ូលិសទើបបំបែបបានសោះ។ បាតុកររាប់ពាន់នាក់ ដែលប្រើឆ័ត្រជាអាវុធសម្រាប់ទប់ទល់នឹងកម្លាំងមានសមត្ថកិច្ច កាន់ដំបង និងឧស្ម័នបាញ់បង្ហូរទឹកភ្នែក បានសាកល្បងវិលមកកាន់នៅសង្កាត់ម៉ុងកុង។ សង្កាត់ម៉ុងកុង ដែលធ្លាប់រងគ្រោះ ប៉ះទង្គិចហិង្សា កាលពីដើមខែ រវាងក្រុមបាតុករជាមួយប្រជាជនដែលអស់អំណត់នឹងការមិនបិទខ្ទប់ផ្លូវ លាយលំទៅដោយពួកដៃជើងក្រុងប៉េកាំងផង។
សា្ថនការណ៍ហិង្សាថ្មីនេះ ទំនងជា បានរុញច្រានឱ្យរដ្ឋាភិបាលហុងកុង សុខចិត្តស្នើបើកការចរចាជាថ្មីជាមួយក្រុមបាតុករនិស្សិត ដែលពុំទាន់ឃើញមានផ្តល់ចម្លើយតបវិញទេ រហូតមកទល់នឹងយប់ថ្ងៃសៅរ៍នេះ។ បាតុករដែលតាំងពីថ្ងៃទី ២៨ កញ្ញា ២០១៤ មកបានប្រមូលផ្តុំគ្នា យ៉ាងច្រើនកកកុញនៅកណ្តាលក្រុងហុងកុង និងក្នុងសង្កាត់រដ្ឋាភិបាល។ រាល់សកម្មភាពសេដ្ឋកិច្ច នយោបាយ និងជីវិតរស់នៅប្រចាំថ្ងៃរងការរំខានយ៉ាងខ្លាំង។
បាតុករនិស្សិត មានកម្មវត្ថុច្បាស់លាស់ គឺទាមទារឱ្យលោកអភិបាលក្រុងហុងកុង លឿង ជន់យីង ចុះចេញពីតំណែង និងទាមទារឱ្យមានការបោះឆ្នោត ជ្រើសរើសប្រមុខដឹកនាំហុងកុងដោយសេរី តាមបែបលទ្ធិប្រជាធិបតេយ្យពិតៗ ដោយគ្មានការជ្រៀតជ្រែកពីប៉េកាំង។ ហុងកុងដែលទើបប្រគល់មកចិនវិញនៅឆ្នាំ១៩៩៧ មានលក្ខន្តិកៈរដ្ឋាបាលពិសេស មានស្វ័យភាពខ្លាំង តាមគំរូ “ប្រទេសមួយប្រព័ន្ធពីរ”។ ថ្វីបើរដ្ឋអំណាចក្រុងប៉េកាំង យល់ព្រមជាគោលការណ៍ឱ្យហុងកុងរៀបចំបោះឆ្នោតជាសកល ចាប់ពីឆ្នាំ២០១៧ទៅមែន ប៉ុន្តែប៉េកាំងជាអ្នកកំណត់និងជ្រើសរើសឈ្មោះបេក្ខជនដែលត្រូវឈរឈ្មោះឱ្យគេបោះឆ្នោត។ ជាហេតុធ្វើពលរដ្ឋហុងកុង ពិសេសនិស្សិត ខឹងសម្បារ នាំគ្នាធ្វើបាតុកម្មទ្រង់ទ្រាយ និងធ្លាក់ក្នុងវិបត្តិធំមិនធ្លាប់មានក្នុងប្រវត្តិហុងកុង គិតចាប់ពីឆ្នាំ១៩៩៧មក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ