ទឹកជំនន់ជាប្រធានបទក្នុងកិច្ចប្រជុំកំពូលអាស៊ាននៅកោះបាលីសប្តាហ៍ក្រោយ
លោកនាយករដ្ឋមន្ត្រី ហ៊ុនសែន គ្រោងនឹងដឹកនាំគណៈប្រតិភូជាន់ខ្ពស់មួយក្រុម ឆ្ពោះទៅកាន់កោះបាលី នៅប្រទេសឥណ្ឌូនេស៊ី ដើម្បីចូលរួមកិច្ចប្រជុំកំពូលអាស៊ាន លើកទី១៩ ចាប់ពីថ្ងៃទី១៤ ដល់ថ្ងៃទី១៩ វិច្ឆិកា ឆ្នាំ២០១១។ ក្នុងកិច្ចប្រជុំនោះ បញ្ហាទឹកជំនន់នៅកម្ពុជា ថៃ វៀតណាម និងនៅហ្វីលីពីន នាពេលសព្វថ្ងៃនេះ នឹងក្លាយជាប្រធានបទសំខាន់មួយ។ ក្នុងកិច្ចប្រជុំនោះ កម្ពុជាក៏នឹងត្រូវទទួលសិទ្ធិ ជាប្រធានផ្លាស់វេនអាស៊ាន នៅឆ្នាំ២០១២ ផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
កិច្ចប្រជុំកំពូលអាស៊ាន លើកទី១៩ ចាប់ពីថ្ងៃទី១៤ ដល់ថ្ងៃទី១៩វិច្ឆិកា នៅសប្តាហ៍ក្រោយ នៅកោះបាលី ប្រទេសឥណ្ឌូនេស៊ី ជាឱកាសដែលកម្ពុជានឹងត្រូវទទួលសិទ្ធិ ធ្វើជាប្រធានអាស៊ាន សម្រាប់ឆ្នាំ២០១២។ នេះបើតាមលោក កុយ គួង អ្នកនាំពាក្យក្រសួងការបរទេស។
លោក កុយ គួង បន្ថែមថា ខ្លឹមសារពិស្តារនៃដំណើរទៅកាន់តុប្រជុំកំពូលអាស៊ាន នៅកោះបាលី ប្រទេសឥណ្ឌូនេស៊ី នឹងត្រូវក្រសួងការបរទេស ចេញសេចក្តីជូនព័ត៌មានជាផ្លូវការ នៅថ្ងៃច័ន្ទ ទី១៤វិច្ឆិកា ឆ្នាំ២០១១។
យ៉ាងណាក៏ដោយ មន្ត្រីជាន់ខ្ពស់រដ្ឋាភិបាលកម្ពុជា បានថ្លែងប្រាប់កាសែតអនឡាន ជាភាសាអង់គ្លេស The Cambodia Herald ដែលបានចេញផ្សាយដំបូង នៅថ្ងៃ១១វិច្ឆិកា ឆ្នាំ២០១១ បង្ហាញថា ក្នុងកិច្ចប្រជុំកំពូលអាស៊ាន នៅកោះបាលី ប្រមុខដឹកនាំអាស៊ាន និងមេដឹកនាំប្រទេសជាដៃគូរបស់អាស៊ាននឹងពិភាក្សាអំពីបញ្ហាសកល និងបញ្ហានៅក្នុងតំបន់ រួមទាំងគ្រោះទឹកជំនន់ នៅក្នុងបណ្តាប្រទេសសមាជិកអាស៊ាន ដូចជា នៅប្រទេសថៃ កម្ពុជា ហ្វីលីពីន និងប្រទេសវៀតណាម បូករួមទាំងវិបត្តិហិរញ្ញវត្ថុនៅអឺរ៉ុប បញ្ហាសមុទ្រចិនខាងត្បូង និងបញ្ហាជាច្រើនទៀតរបស់អាស៊ាន។
តាមឯកសារ ទឹកជំនន់នៅប្រទេសថៃ កម្ពុជា វៀតណាម និងហ្វីលីពីន នាពេលថ្មីៗនេះ បានសម្លាប់មនុស្សជាង ១.០០០ នាក់។ ទឹកជំនន់បានបំផ្លាញសន្ទូងស្រូវរាប់សែនហិកតា ព្រមទាំងទ្រព្យសម្បត្តិជាច្រើនផ្សេងទៀត ជាពិសេសនៅប្រទេសថៃ ជួបគ្រោះមហន្តរាយទឹកជំនន់ច្រើនជាងគេ។
តាមរបៀបវារៈ ប្រមុខដឹកនាំប្រទេសអាស៊ាននឹងឡើងថ្លែងការណ៍ អំពីគ្រោះទឹកជំនន់ ដ៏មហន្តរាយ ដែលបានវាយប្រហារលើប្រទេសថៃ កម្ពុជា វៀតណាម និងប្រទេសហ្វីលីពីន នៅក្នុងតំបន់អាស៊ាន។
ក្រៅពីចូលរួមកិច្ចប្រជុំកំពូលអាស៊ាន ចាប់ពីថ្ងៃទី១៤ ដល់ថ្ងៃទី១៩វិច្ឆិកា នៅកោះបាលី ថ្នាក់ដឹកនាំប្រទេសអាស៊ាន ក៏នឹងត្រូវចូលរួមប្រជុំជាមួយនឹងមេដឹកនាំប្រទេសដៃគូអាស៊ាន ដូចជា អូស្ត្រាលី ចិន ឥណ្ឌា ជប៉ុន កូរ៉េខាងត្បូង នូវែលសេឡង់ រុស្ស៊ី និងសហរដ្ឋអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ